या मुलींच्या वसतिगृहात किमान ८५ विद्यार्थिनींची सोय होणार आहे. प्रवेश मिळालेल्या विद्यार्थिनींना शासनामार्फत निवास, भोजन, स्टेशनरी साहित्य, आंथरुन – पांघरून व दरमहा खर्चासाठी प्रत्येकी १५०० रूपये प्रमाणे निर्वाह भत्ता व स्वच्छता प्रसाधनासाठी प्रत्येकी १५० रुपये देण्यात येतात. वसतिगृहात स्वतंत्र संगणक कक्ष (कॉम्प्युटर लॅब Computer Lab), अद्यावत ग्रंथालय (Library) यांची सुविधा आहे.
सन २०२६-२७ या वर्षात सामाजिक न्याय विभागामार्फत वसतिगृह प्रवेशासाठी सर्व अभ्यासक्रमाचे
ऑनलाइन प्रवेश प्रक्रिया सुरू झालेली आहे. तरी त्यानुसार विद्याथ्यांनी ऑनलाइन फॉम Website – https://hmasnew.mahait.org वर अर्ज करण्यात यावे. अधिक माहितीसाठी क्रांतीज्योती सावित्रीबाई फुले मुलींचे शासकिय वसतिगृह, येरवडा, पुणे येथील गृहपाल श्रीमती एस. एन. शेलार यांच्याकडे कार्यालयीन वेळेत संपर्क साधावा. या वसतिगृह योजनेचा जास्तीत जास्त विद्यार्थिनींनी लाभ घ्यावा, असे आवाहन महाराष्ट्र शासनाकडून करण्यात येत आहे.

पुणे : प्रतिनिधी

स्पर्धा परीक्षांच्या क्षेत्रात करिअर करू इच्छिणाऱ्या गुणवंत व आर्थिकदृष्ट्या दुर्बल विद्यार्थ्यांसाठी साऊ फाउंडेशन पुणे आणि जनसेवा फाउंडेशन पुणे यांच्या संयुक्त विद्यमाने ‘UPSC सुपर 40 प्रशिक्षण’ हा उपक्रम राबविण्यात येत आहे. या उपक्रमांतर्गत निवड झालेल्या 40 विद्यार्थ्यांना नागरी सेवा (UPSC) परीक्षेच्या तयारीसाठी मोफत निवासी प्रशिक्षण दिले जाणार आहे.

या योजनेअंतर्गत विद्यार्थ्यांना राहण्याची व भोजनाची मोफत सुविधा, सुसज्ज ग्रंथालय, तज्ज्ञ मार्गदर्शन तसेच UPSC पूर्व व मुख्य परीक्षेच्या तयारीसाठी आवश्यक प्रशिक्षण उपलब्ध करून दिले जाणार आहे. मुख्य परीक्षेतील मागील वर्षांच्या प्रश्नपत्रिकांवर आधारित लेखन सराव, नियमित अभ्यासाचे नियोजन आणि प्रगतीचे मूल्यमापन यावर विशेष भर देण्यात येणार असल्याचे आयोजकांनी सांगितले.

प्रशिक्षणासाठी अर्ज करणाऱ्या उमेदवारांनी UPSC नागरी सेवा पूर्व परीक्षा दिलेली असणे आवश्यक आहे. पात्रतेसाठी GS-I मध्ये किमान 60 गुण, CSAT मध्ये किमान 50 गुण तसेच कुटुंबाचे वार्षिक उत्पन्न 2.50 लाख रुपयांपेक्षा कमी असणे आवश्यक आहे.

उमेदवारांची निवड UPSC पूर्व परीक्षेतील गुणांच्या आधारे करण्यात येणार असून त्यानंतर मुलाखतीद्वारे अंतिम निवड केली जाईल. आर्थिक अडचणींमुळे गुणवंत विद्यार्थ्यांचे UPSC चे स्वप्न अपूर्ण राहू नये, या उद्देशाने हा उपक्रम राबविण्यात येत असल्याचे संस्थेने स्पष्ट केले.

या उपक्रमास सहाय्यक आयुक्त, समाज कल्याण, पुणे विशाल मंगल अशोक लोंढे यांचे मार्गदर्शन लाभत आहे. इच्छुक व पात्र विद्यार्थ्यांनी ऑनलाइन अर्ज करावा. अर्ज सादर करण्याची अंतिम मुदत 20 जून 2026 आहे.

अधिक माहितीसाठी व अर्ज प्रक्रियेसंदर्भातील मार्गदर्शनासाठी श्री. अमृत साळुंखे ( 7900112373) श्री.गुणवंत सावळजकर ( 9890414342) आणि श्री संदीप कांबळे (8378989942) यांच्याशी संपर्क साधावा, असे आवाहन आयोजकांनी केले आहे.

शालेय शिक्षणमंत्री दादा भुसे यांचे चालू शैक्षणिक वर्षात कार्यवाहीचे आश्वासन

मुंबई : राज्यभरात NEET परीक्षा पेपरफुटी प्रकरणानंतर शिक्षण व्यवस्थेतील विविध अनियमितता व खासगी कोचिंग क्लासेसच्या वाढत्या हस्तक्षेपाबाबत विद्यार्थी, पालक आणि शैक्षणिक क्षेत्रातून गंभीर चिंता व्यक्त होत आहे. या पार्श्वभूमीवर राष्ट्रवादी काँग्रेस शरदचंद्र पवार पक्षाचे प्रदेश प्रवक्ते तथा युवक मुंबई अध्यक्ष ॲड. अमोल मातेले यांनी महाराष्ट्र राज्याचे शालेय शिक्षण मंत्री मा. दादा भुसे यांची मंत्रालयात भेट घेऊन मुंबईसह संपूर्ण महाराष्ट्रातील ज्युनिअर कॉलेज आणि खासगी कोचिंग क्लासेस यांच्यातील कथित अनधिकृत व्यावसायिक संबंधांवर तातडीने नियंत्रण आणण्याची मागणी केली.
यावेळी ॲड. अमोल मातेले यांनी मंत्री महोदयांकडे सविस्तर निवेदन सादर करत अनेक गंभीर मुद्द्यांकडे लक्ष वेधले. काही ठिकाणी कनिष्ठ महाविद्यालये आणि खासगी कोचिंग संस्थांमध्ये थेट अथवा अप्रत्यक्ष व्यावसायिक संबंध निर्माण झाल्याने विद्यार्थ्यांच्या प्रवेश प्रक्रियेवर, उपस्थिती व्यवस्थेवर, फी संरचनेवर आणि शैक्षणिक स्वातंत्र्यावर विपरीत परिणाम होत असल्याचे त्यांनी निदर्शनास आणून दिले.

निवेदनामधील प्रमुख मागण्या पुढीलप्रमाणे ज्युनिअर कॉलेज आणि खासगी कोचिंग क्लासेसमधील थेट भागीदारीवर बंदी घालण्यासाठी विशेष शासन निर्णय (GR) जारी करणे. “कॉलेज प्रवेशासोबत मोफत क्लास” किंवा “क्लास घेतल्यास प्रवेश निश्चित” अशा एकात्मिक प्रवेश योजनांना बेकायदेशीर घोषित करणे. कॉलेज संचालक, विश्वस्त आणि संबंधित व्यक्तींनी कोचिंग व्यवसायातील हितसंबंध शपथपत्राद्वारे जाहीर करणे बंधनकारक करणे. पालक व विद्यार्थ्यांसाठी स्वतंत्र ऑनलाइन तक्रार पोर्टल सुरू करणे. जिल्हास्तरीय विशेष तपास समिती स्थापन करून कॉलेज-कोचिंग व्यवहारांची चौकशी करणे. नियमभंग करणाऱ्या संस्थांवर मान्यता निलंबन अथवा रद्द करण्याची कारवाई करणे.

आर्थिक व्यवहारांचे स्वतंत्र लेखापरीक्षण करणे. केवळ नावापुरत्या उपस्थितीवर आधारित शिक्षण पद्धतीला आळा घालणे. संबंधित कायद्यांमध्ये आवश्यक सुधारणा प्रस्तावित करणे. मुंबई, पुणे, ठाणे, नाशिक व नागपूरसह राज्यातील प्रमुख शहरांमध्ये विशेष तपास मोहीम राबविणे.

बैठकीदरम्यान शालेय शिक्षण मंत्री मा. दादा भुसे यांनी विषयाची गंभीरता लक्षात घेऊन सकारात्मक भूमिका व्यक्त केली. सदर विषय विद्यार्थ्यांच्या भविष्याशी निगडित असून चालू शैक्षणिक वर्षामध्ये यासंदर्भात आवश्यक प्रशासकीय कार्यवाही सुरू करण्याबाबत सकारात्मक निर्णय घेतला जाईल, असे आश्वासन त्यांनी दिले.
यावेळी ॲड. अमोल मातेले यांनी स्पष्ट केले की, विद्यार्थ्यांच्या शिक्षणाचे व्यापारीकरण रोखण्यासाठी, शैक्षणिक प्रक्रियेत पारदर्शकता वाढविण्यासाठी आणि विद्यार्थ्यांचे हित जपण्यासाठी शासनाने कठोर पावले उचलणे आवश्यक आहे.

पुणे – डॉ. बाबासाहेब आंबेडकर संशोधन व प्रशिक्षण संस्था (बार्टी), पुणे या महाराष्ट्र शासनाच्या सामाजिक न्याय व विशेष सहाय्य विभागाच्या स्वायत्त संस्थेमार्फत महाराष्ट्र राज्यातील अनुसूचित जातीतील विद्यार्थ्यांसाठी संघ लोकसेवा आयोग (युपीएससी) मार्फत घेण्यात येणाऱ्या परीक्षांचे पूर्व प्रशिक्षण देण्यात येते. तसेच मुख्य परीक्षा व मुलाखत चाचणी परीक्षेकरिता पात्र झालेल्या उमेदवारांना आर्थिक साहाय्य दिले जाते.

मे 2026 रोजी जाहीर झालेल्या संघ लोकसेवा आयोग(UPSC)- वन सेवा – 2025 परीक्षेच्या निकालात बार्टीच्या 2 विद्यार्थ्यांनी उज्वल यश संपादन केले आहे.

या निकालात बार्टी (BARTI) संस्थेच्या विद्यार्थ्यांची निवड झाली असून विद्यार्थ्यांना खालील प्रमाणे रँक मिळाल्या आहेत.

संघ लोकसेवा आयोग-वन सेवा – २०२५ मुख्य परीक्षेकरीता ५२ विद्यार्थ्यांनी आर्थिक सहाय्य व त्यापैकी १० विद्यार्थ्यांनी मुलाखत आर्थिक सहाय्य योजनेचा लाभ घेतला होता.

या सर्व विद्यार्थ्यांना बार्टी संस्थेकडून परीक्षेच्या विविध टप्प्यावर मार्गदर्शन व आर्थिक साहाय्य देण्यात आले आहे.

यशस्वी विद्यार्थ्यांचे बार्टीच्या महासंचालक श्रीमती दीपा मुधोळ- मुंडे, निबंधक डॉ सुचिता शिंदे व विभागप्रमुख डॉ बबन जोगदंड यांनी अभिनंदन करुन त्यांना पुढील वाटचालीकरिता शुभेच्छा दिल्या आहेत.

पुणे – जेजुरीच्या माजी नगराध्यक्षा अमृता संदीप घोणे यांनी सावित्रीबाई फुले पुणे विद्यापीठाच्या वाणिज्य शाखेमार्फत बँकिंग आणि वित्त या अभ्यास मंडळातून ‘विद्यावाचस्पती (Ph.D.)’ पदवी संपादन केली आहे. “पुणे जिल्हा मध्यवर्ती सहकारी बँकेची वित्तीय कामगिरी आणि समस्यांचा चिकित्सक अभ्यास” या विषयावर त्यांनी आपले संशोधन यशस्वीरीत्या पूर्ण केले.

हे संशोधन एम.एम.सी.सी. कॉलेजचे प्राचार्य डॉ. किशोर निकम यांच्या मार्गदर्शनाखाली डॉ. डी. वाय. पाटील कला वाणिज्य व विज्ञान महाविद्यालय, पुणे या संशोधन केंद्रातून पूर्ण करण्यात आले. तसेच संशोधन कार्यादरम्यान त्यांनी आपल्या विषयाशी संबंधित ९ संशोधन पत्रे राज्यस्तरीय तसेच आंतरराष्ट्रीय स्तरावर सादर करून प्रसिद्ध केली आहेत.

सौ. अमृता संदिप घोणे या जेजुरीच्या माजी नगराध्यक्ष असून राष्ट्रवादी काँग्रेस पक्षाच्या प्रदेश संघटक सचिव म्हणून कार्यरत आहेत. तसेच, कोल्हापूर जिल्ह्याच्या निरीक्षक म्हणूनही त्या जबाबदारी पार पाडत आहेत. त्याच बरोबरीने आपल्या उत्कृष्ट वकृत्व शैलीसाठी सुद्धा त्या ओळखल्या जातात. राजकीय क्षेत्रातील जबाबदाऱ्या प्रभावीपणे सांभाळत असतानाही त्यांनी शिक्षणाची ओढ जपली. लग्नानंतर त्यांनी एम. कॉम. पदवी, पहिल्याच प्रयत्नात SET परीक्षा उत्तीर्ण, जीडीसी अँड ए आणि आता विद्यावाचस्पती ही पदवी संपादन करून उल्लेखनीय शैक्षणिक यश मिळवले आहे.

राजकीय आणि शैक्षणिक क्षेत्रात एकाच वेळी उत्तुंग यश संपादन करणे ही अत्यंत उल्लेखनीय बाब असून त्या इतर महिलांसाठी प्रेरणादायी आदर्श ठरत आहेत. यामुळे समाजातून त्यांचे कौतुक होत आहे.

या यशस्वी प्रेरणेमागे शाहु, फुले आंबेडकर यांची विचारधारा मार्गदर्शक ठरली, असे त्यांनी सांगितले. शिकण्याची आवड निर्माण करणारे आपले वडील श्री. अनिल ज्ञानेश्वर कांबळे यांचे त्यांनी ऋण व्यक्त केले. तसेच या यशस्वी शैक्षणिक व राजकीय प्रवासात त्यांना त्यांचे पती श्री. संदीप अशोक घोणे (माजी अध्यक्ष, खंडोबा देवस्थान ट्रस्ट, जेजुरी) यांचा मोलाचा पाठिंबा व प्रोत्साहन व सतत मिळणारा आधार हेच त्यांच्या यशामागील महत्त्वाचे बळ असल्याचे त्यांनी नमूद केले. याबद्दल त्यांनी मनःपूर्वक कृतज्ञता व्यक्त केली. तसेच त्यांचा परिवार आणि सहकार्य करणाऱ्या सर्व हितचितंकांचे त्यांनी आभार मानले.

पुणे – डॉ. बाबासाहेब आंबेडकर संशोधन व प्रशिक्षण संस्था (बार्टी) पुणे मार्फत यु.पी.एस.सी. केंद्रिय सशस्त्र
पोलीस दल (CAPF) मुलाखत परीक्षा (UPSC CAPF – Personality Test Examination) या परीक्षेस पात्र असलेल्या महाराष्ट्र राज्यातील अनुसूचित जातीच्या उमेदवारांना मुलाखत परीक्षेच्या तयारीसाठी प्रती विद्यार्थी रक्कम रु. 25,000/- आर्थिक सहाय्य देण्यात येणार आहे.

दि. 17 एप्रिल 2026 रोजी संघ लोकसेवा आयोगाने केंद्रिय सशस्त्र पोलीस दल (CAPF) मुख्य परीक्षेचा निकाल घोषित केला आहे. सदर निकालानुसार केंद्रिय सशस्त्र पोलीस दल (CAPF) Personality Test Examination करिता पात्र असलेल्या उमेदवारांना एकरकमी रक्कम रु. 25,000/- चे आर्थिक सहाय्य देण्यात येत आहे. त्याबाबत सविस्तर जाहिरात व ऑनलाईन फॉर्म बार्टी संस्थेच्या संकेतस्थळावर प्रसिद्ध करण्यात आला आहे. जास्तीत जास्त पात्र उमेदवारांनी सदर योजनेचा लाभ घ्यावा असे आवाहन बार्टी संस्थेमार्फत करण्यात येत आहे. अधिक माहितीसाठी- http://barti.maharashtra.gov.in > NOTICE BOARD> UPSC CAPF Assistant Commandant Service – Personality Test Examination 2026 Financial assistance Scheme येथे भेट द्यावी.

पुणे – डॉ. बाबासाहेब आंबेडकर संशोधन व प्रशिक्षण संस्था (बार्टी) पुणे,मार्फत महाराष्ट्र लोकसेवा आयोग अराजपत्रित गट-ब पूर्व परीक्षा २०२५ उत्तीर्ण झालेल्या उमेदवारांना मुख्य परीक्षा तयारी करिता एक रक्कमी आर्थिक सहाय्य देण्यात येणार आहे. या परीक्षेस पात्र असलेल्या महाराष्ट्र राज्यातील अनुसूचित जातीच्या उमेदवारांना मुख्य परीक्षेच्या तयारीसाठी प्रती विद्यार्थी रक्कम रु १०,०००/ एक रक्कमी आर्थिक सहाय्य देण्यात येणार आहे.

महाराष्ट्र लोकसेवा आयोग अराजपत्रित गट-ब पूर्व परीक्षा २०२५ उत्तीर्ण झालेल्या उमेदवारांना मुख्य परीक्षेच्या तयारीसाठी आर्थिक सहाय्य देणेबाबत घोषित केले आहे. सदर निकालानुसार महाराष्ट्र लोकसेवा आयोग अराजपत्रित गट-ब पूर्व परीक्षा २०२५ उत्तीर्ण झालेल्या उमेदवारांना मुख्य परीक्षा तयारी करिता आर्थिक सहाय्य देणेबाबत. पात्र असलेल्या उमेदवारांना एक रक्कमी प्रती रक्कम रु. १०,०००/चे आर्थिक सहाय्य देण्यात येत आहे. त्याबाबत सविस्तर जाहिरात व ऑनलाईन फॉर्म बार्टी संस्थेच्या संकेतस्थळावर प्रसिद्ध करण्यात आला आहे. जास्तीत जास्त पात्र उमेदवारांनी सदर योजनेचा लाभ घ्यावा असे आवाहन बार्टी संस्थे मार्फत करण्यात येत आहे. अधिक माहितीसाठी http://barti.maharashtra.gov.in > NOTICEBOARD > Maharashtra Public Service Commission Non-Gazetted Group-B Main Examination २०२५ येथे भेट द्यावी.

पुणे : डॉ. बाबासाहेब आंबेडकर संशोधन व प्रशिक्षण संस्था (बार्टी) पुणे संस्थेने मला दिलेल्या शिष्यवृत्तीमुळेच माझ्यासारखा सामान्य कुटुंबातील मुलगा यूपीएससी स्पर्धा परीक्षेत उत्तीर्ण होऊन भारत सरकारच्या सहाय्यक संचालक सुक्ष्म लघु आणि मध्यम उद्योग मंत्रालयात अधिकारी म्हणून रुजू झाला, अशा भावना बार्टीची शिष्यवृत्ती घेतलेल्या राहुल कांबळे यांनी व्यक्त केल्या.

डॉ. बाबासाहेब आंबेडकर संशोधन व प्रशिक्षण संस्था (बार्टी) पुणे संस्थेतील संशोधक विद्यार्थी राहुल कांबळे यांनी दिनांक ४ मार्च २०२६ रोजी बार्टी संस्थेला भेट दिली. यावेळी त्यांचा विभागप्रमुख रविंद्र कदम, डॉ. बबन जोगदंड, शुभांगी पाटील, लेखाधिकारी नितिन चव्हाण यांच्या हस्ते भारताचे संविधान, सन्मानचिन्ह देऊन सन्मानित करण्यात आले.

याप्रसंगी मनोगत व्यक्त करताना डॉ. जोगदंड म्हणाले की, बार्टी संस्थेचे महासंचालक सुनील वारे यांच्या मार्गदर्शनाखाली स्पर्धा परीक्षेत बार्टीचे विद्यार्थी यशस्वी होण्यासाठी विद्यार्थ्यांना दर्जेदार व नाविन्यपूर्ण प्रशिक्षण देण्यात येत आहे. बार्टीचे युपीएससी उत्तीर्ण विद्यार्थी राहुल कांबळे यांनी पीएचडी करत असताना स्पर्धा परीक्षेचाही अभ्यास केला. त्यात त्यांनी यश मिळवले.  बार्टीच्या अनेक विद्यार्थ्यांनी राज्य व नागरी सेवेत अधिकारी म्हणून बार्टीचा नावलौकिक मिळविला आहे. विद्यार्थ्यांनी अधिकारी झाल्यानंतर बार्टीकडे आणि नव्या विद्यार्थ्याकडे लक्ष देऊन त्यांना मार्गदर्शन करावे, असे आवाहन करुन बार्टी संस्थेच्या वतीने त्यांनी राहुल कांबळे यांचे अभिनंदन केले.

सहाय्यक लेखाधिकारी उल्हास शिंदे, प्रकल्प व्यवस्थापक डॉ. सारिका थोरात, डॉ. अंकुश गायकवाड, विकास गायकवाड, धीरज खाडे, अमिर मुलानी यांच्यासह बार्टी संस्थेतील अधिकारी व कर्मचारी उपस्थित होते.
सूत्रसंचालन विकास गायकवाड यांनी केले.
आभार रामदास लोखंडे यांनी मानले.

• डॉ नरेंद्र दाभोलकर लोकविद्यापीठ सुरु होणार

पुणे : महाराष्ट्र अंधश्रद्धा निर्मूलन समिती मार्फत सुरु करण्यात येणाऱ्या डॉ. नरेंद्र दाभोलकर लोकविद्यापीठाचे लोकार्पण प्रसिद्ध सिने अभिनेत्री सोनाली कुलकर्णी यांच्या हस्ते आणि राज्यशास्त्राचे ज्येष्ठ अभ्यासक सुहास पळशीकर यांच्या उपस्थितीमध्ये पुणे येथील पत्रकार भवन येथे रविवार १६ नोव्हेंबर रोजी सकाळी १०.३० वाजता होणार आहे, अशी माहिती महाराष्ट्र अंनिस मार्फत मिलिंद देशमुख, श्रीपाल ललवाणी, राहुल थोरात आणि हमीद दाभोलकर यांनी दिली.

या विद्यापीठातील अभ्यासक्रमांमुळे वैज्ञानिक दृष्टिकोनाचे प्रशिक्षण घेतलेल्या नागरिकांना भोंदूबाबा बुवा ओळखणे आणि स्वत:ची फसवणूक थांबवणे सहज शक्य होणार आहे.

अंधश्रद्धा निर्मूलन समितीचे कार्यकर्ते सप्रयोग व्याख्यानातून सातत्याने विद्यार्थी व इतर नागरिकांसोबत अंधश्रद्धा निर्मूलनाशी संबंधित वेगवेगळ्या विषयांवर संवाद साधत असतात. मुलांना प्रत्यक्ष भेटून संवाद साधणे हे सर्वात प्रभावी असते परंतु त्याला मर्यादा असतात त्यामुळे अधिकाधिक विद्यार्थ्यांपर्यंत पोचण्यासाठी डॉ. नरेंद्र दाभोलकर लोकविद्यापीठ या माध्यमातून अंधश्रद्धा निर्मूलनाशी संबंधित वेगवेगळ्या विषयांवर छोटे ऑनलाइन कोर्सेस अंनिस उपलब्ध करून देत आहे.
राष्ट्रीय शिक्षण धोरणामध्ये वैज्ञानिक दृष्टिकोनाचा महत्वाचा भाग म्हणून सहभाग असताना असताना देखील प्रत्यक्षात शैक्षणिक अभ्यासक्रमात अनेक अवैज्ञानिक गोष्टी घुसडल्या जात आहेत. डार्विनच्या सिद्धांता सारख्या गोष्टी अभ्यासक्रमांतून वगळण्यात आल्या आहेत. या पार्श्वभूमीवर वैज्ञानिक दृष्टीकोन प्रचार प्रसार होणारे अभ्यासक्रम हे नागरिकांना सहज उपलब्ध असावेत या साठी हे अभ्यासक्रम तयार करण्यात आले आहेत.
पुढच्या दुसऱ्या टप्प्यात फलज्योतिष फोलपणा, मानसिक आरोग्य अशा स्वरूपाचे कोर्स देखील सुरु केले जाणार आहेत  

सुरुवातीला या प्लॅटफॉर्मवर पुढील सहा कोर्सेस उपलब्ध असतील.  
   1.वैज्ञानिक दृष्टिकोन 

2. अंगात येणे 
3. भुताने झपाटणे 
4. भ्रामक वास्तुशास्त्र 
      5. छद्म विज्ञान 
5. व्यसनमुक्ती
   तेरा वर्षांवरील मुलांपासून पुढे कोणताही नागरिक हे कोर्सेस करू शकेल. ऑनलाइन परीक्षा दिल्यानंतर प्रसिद्ध लेखक अच्युत गोडबोले यांच्या सहीचे एक आकर्षक प्रमाणपत्र मिळेल. परीक्षेतील प्रश्न देखील केवळ माहिती नाही तर आकलन तपासणारे आहेत. 

www.anisvidya.org.in वेबसाईटवर जाऊन आपली नोंदणी करून अभ्यासक्रम पूर्ण करायचा आहे. सर्व अभ्यासक्रम आणि परीक्षा नि:शुल्क आहेत.

पुणे – ” पुणे महापालिकेच्या शाळेत शिक्षक म्हणून काम करत असताना विद्यार्थ्यांना यशस्वी नागरिक म्हणून उभे करण्यासाठी पायाभरणी करणारे आदर्श शिक्षक मुख्याध्यापक म्हणून सुरज कुलकर्णी यांचा गौरव करावा लागेल, असे मत राजकीय विश्लेषक ऍड. भाऊसाहेब आजबे यांनी व्यक्त केले.

पुणे महापालिकेच्या माध्यमिक विभागातील कर्मवीर भाऊराव पाटील विद्यानिकेतन शाळेचे मुख्याध्यापक सुरज कुलकर्णी यांच्या सेवापूर्ती गौरव समारंभात प्रमुख पाहुणे म्हणून ते बोलत होते. या कार्यक्रमाला माजी नगरसेवक ऍड. अविनाश साळवे, युवा उद्योजक सुरेंद्र पठारे, निवृत्त महापालिका उपायुक्त वसंत पाटील, ज्येष्ठ साहित्यिक डॉ. दिलीप गरुड, माजी शिक्षणाधिकारी पोपट काळे, माध्यमिक विभागाचे उपशिक्षणाधिकारी दामोदर उंडे, विठ्ठल भरेकर, सामाजिक कार्यकर्ते निखिल गायकवाड यांच्यासह कुलकर्णी कुटुंबातील सदस्य मित्रपरिवार व मान्यवर उपस्थित होते. अध्यक्षस्थानी माध्यमिक विभागाच्या शिक्षणाधिकारी आशा उबाळे होत्या. 37 वर्षाच्या प्रदीर्घ सेवेत सुरज कुलकर्णी यांनी इंग्रजी या विषया सोबतच विद्यार्थ्यांना शालेय शिस्त, बाह्य परीक्षा, आर.एस.पी. तसेच सांस्कृतिक व क्रीडा या विषयांमध्ये बहुमोल मार्गदर्शन केले. त्यांचे असंख्य विद्यार्थी आज देश परदेशात उच्चपदस्थ अधिकारी म्हणून कार्यरत आहेत.

त्यासोबतच जनगणना, मतदान या महत्वपूर्ण शासकीय कार्यामध्ये शिक्षकांच्या प्रशिक्षणाचे तज्ञ मार्गदर्शक म्हणून त्यांचा सक्रिय सहभाग राहिलेला आहे. भारतीय संविधान जनजागृती, व्यसनमुक्ती, अंधश्रद्धा निर्मूलन, स्त्री-पुरुष समानता या विषयांवर देखील सरांनी सक्रिय कार्य केलेले आहे.

येरवड्यातील नेताजी बोस हायस्कूलमध्ये 33 वर्ष सेवा देणारे परिपूर्ण शिक्षक म्हणून सरांनी इंग्रजी विषयाच्या अध्यापन सोबतच त्यापलीकडे जाऊन बहुआयामी “समाज शिक्षक” म्हणून काम केल्याचा उल्लेख शिक्षण अधिकारी आशा उबाळे यांनी केला. उपस्थित मान्यवरांनी त्यांच्या कार्यकाळातील आठवणींचा उल्लेख करत यशस्वी सेवापुर्ती निमित्त कौतुक केले. या कार्यक्रमाला विविध क्षेत्रातील मान्यवरांसह अनेक माजी विद्यार्थी तसेच त्यांच्या बालपणीचे मूळ गावाकडील सहकारी मित्र आवर्जून उपस्थित होते. कार्यक्रमाचे प्रास्ताविक सुप्रिया आन्नलदास यांनी केले. निवेदन संगीता लांडे यांनी तर आभार ज्योती लोंढे यांनी मानले. कार्यक्रम यशस्वी करण्याकरिता कर्मवीर भाऊराव पाटील माध्यमिक विद्यानिकेतन प्रशालेचे सर्व शिक्षक, शिक्षकेतर कर्मचारी, विद्यार्थी यांचे बहुमोल सहकार्य लाभले.