हवामान बदलाचा विपरीत परिणाम कोकणातील हापूस आंब्यावर झाला आहे. फेब्रुवारी महिन्याच्या अखेरच्या आठवडयात बाजारात हापूसची आवक सुरू झाली.  त्यानंतर मार्च महिन्यात ती नियमित झाली. हंगामाच्या पहिल्या टप्प्यात हापूसचे दर जास्त होते. आवक नसल्याने आंब्यांचे दर सामान्यांच्या आवाक्यात नव्हते.

अक्षयतृतीयेदरम्यान आंब्याची आवक वाढली. गेल्या आठवडयात १ ते ३ मेदरम्यान पुण्यातील मार्केट यार्डातील फळबाजारात कोकणातून एकूण मिळून २५ ते ३० हजार पेटया हापूसची आवक झाली. आंब्यांची आवक वाढल्याने आता दरात मोठी घट झाली आहे. किरकोळ बाजारात एक डझन आंब्याचे दर प्रतवारीनुसार ४०० ते ८०० रुपये दरम्यान आहेत. हापूसच्या पेटीमागे एक हजार ते १२०० रुपयांनी घट झाल्याचे सांगितले जात आहे.

गुजरात को-ऑपरेटिव्ह मिल्क मार्केटिंग फेडरेशनने एक वर्ष पूर्ण होण्यापूर्वीच दुधाच्या दरात वाढ केली आहे. यापूर्वी जुलै 2021 मध्ये दुधाच्या दरात वाढ करण्यात आली होती. अमूल दुधाच्या सर्व ब्रँडवर ही दरवाढ लागू होणार आहे. यामध्ये टी-स्पेशल, सोना, ताजा, शक्ती याशिवाय गाय आणि म्हशीचे दूध इत्यादींचा समावेश आहे. तब्बल सात महिने 27 दिवसांनी दरात वाढ करण्यात आली आहे. उत्पादन खर्चात झालेली वाढ हेच किमती वाढण्याचे कारण असल्याचे कंपनीचे म्हणणे आहे.

या दरवाढीवर अमूलने सांगितले की, 2 रुपयांची वाढ ही प्रति लीटरच्या वाढीमागे अन्नधान्याच्या सरासरी महागाईपेक्षा खूपच कमी आहे. गेल्या दोन वर्षांत अमूलने आपल्या ताज्या दुधाच्या श्रेणीत दरवर्षी 4 टक्क्यांनी वाढ केली आहे. ऊर्जा, पॅकेजिंग, वाहतूक आणि पशुखाद्य यांच्या किमतीत वाढ झाल्यामुळे दूध उत्पादन खर्चात वाढ झाली आहे, एकूण कामकाजाचा खर्च वाढला आहे. हे पाहता अमूलने शेतकऱ्यांचा दूध खरेदी दर 35 रुपयांवरून 40 रुपये प्रति किलो केला आहे, जो गेल्या वर्षीच्या तुलनेत पाच टक्के अधिक आहे. दुधाच्या खरेदीवर भरलेल्या प्रत्येक रुपयापैकी सुमारे 40 पैसे शेतकऱ्यांना परत केले जातात, असे अमुलने म्हटले आहे.