रायगडच्या दिवेआगारमध्ये मोठी दुर्घटना घडली आहे. समुद्रात पोहोण्यासाठी उतरलेले आठ विद्यार्थी समुद्रात बुडाले आहेत. पाण्याचा अंदाज न आल्याने ही दुर्घटना घडल्याचा प्राथमिक अंदाज आहे. हे सर्व विद्यार्थी आळंदीवरून सहलीसाठी दिवेआगार येथे आले होते. 

परंतु पाण्याचा अंदाज न आल्याने हे विद्यार्थी समुद्रात बुडाले आहेत. या आठही विद्यार्थ्यांचे मृतदेह सापडले आहेत.  ज्या विद्यार्थ्यांचा मृत्यू झाला आहे, ते सर्व विद्यार्थी आळंदीच्या विनर्स अकॅडमी क्लासचे विद्यार्थी असल्याची  माहिती समोर येत आहे. हे सर्व विद्यार्थी आकरावी आणि बारावीमध्ये शिकत होते, अशी देखील माहिती समोर आली आहे. या घटनेमुळे हळहळ व्यक्त होत आहे.

घटनेबाबत समोर आलेल्या माहितीनुसार, आळंदीच्या विनर्स अकॅडमी क्लासची ही सहल होती. एकूण 42 विद्यार्थी या सहलीमध्ये सहभागी झाले होते. हे सर्व विद्यार्थी सहलीसाठी दिवेआगर येथे आले होते. यातील आठ विद्यार्थी हे पोहोण्यासाठी समुद्रात उतरले. परंतु पाण्याचा अंदाज न आल्याने ते समुद्रात बुडाले. या सर्व विद्यार्थ्यांचे मृतदेह सापडले आहेत.  या घटनेमुळे पुन्हा एकदा विद्यार्थ्यांच्या सुरक्षेचा प्रश्न ऐरणीवर आला आहे. आठ विद्यार्थ्यांचा बुडून मृत्यू झाला आहे.

पुणे : महाराष्ट्रातील सर्वोच्च शिखर, सह्याद्रीचा मुकुटमणी असलेल्या कळसुबाई शिखरावर (समुद्रसपाटीपासून १६४६ मीटर) हॅप्पी फॅमिली ट्रेकर्स असोसिएशनच्या २० शिलेदारांनी यापूर्वी किल्ले राजगड, तोरणा, रायगड, ब्रह्मगिरी, अंजनेरी तर आता कळसुबाई येथे यशस्वी चढाई करून एक नवा इतिहास रचला आहे.

दिनांक २६ ऑक्टोबर २०२६, पहाटे ४ वाजता काळोखातच या मोहिमेला सुरुवात झाली. हातात टॉर्च, डोक्यावर हेडलॅम्प आणि मनात जिद्द घेऊन सर्व ट्रेकर्सनी बारी गावातून चढाईला प्रारंभ केला. थंडी, दाट धुके आणि खडतर चढण यावर मात करत सकाळी ठीक १० वाजता सर्व ट्रेकर्स कळसुबाई मंदिर परिसरात पोहोचले. शिखरावर पोहोचताच सर्वांनी “हर हर महादेव” आणि “जय महाराष्ट्र” चा जयघोष केला.ही मोहीम फक्त ट्रेक नव्हता, तर आरोग्य, एकी आणि निसर्गप्रेमाचा संगम होता.

इंडो अथलेटिक्स सोसायटीचे संस्थापक अध्यक्ष अँड. गजानन खैरे, जिल्हा पोलीस अधीक्षक प्रशांत खैरे, भारत फोर्ज मधील अधिकारी दत्तात्रय कदम, पोलीस अधिकारी श्रीरंग निगडे, उद्योजक पांडुरंग सोनवणे, उद्योजक सुदेश कोलते, पुणे जिल्हा परिषद चे गटविकास अधिकारी संजय ढमाळ, टाटा मोटर्स मधील अधिकारी संजय कदम, बजाज ऑटो मधील अधिकारी  युवराज जगताप, सहाय्यक वनसंरक्षक नितीश निगडे, अँड. शुभम कदम, अनुज खैरे, अभिषेक जगताप, चालुक्य खैरे, दिशा खैरे, राजवर्धन खैरे तर महिलांमध्ये वैशाली कदम, वंदना कदम, रजनी खैरे यांनी यशस्वी सहभाग नोंदवला.

विशेष म्हणजे या संपूर्ण मोहिमेचे अचूक नियोजन, मार्गदर्शन आणि लॉजिस्टिकची जबाबदारी वरील सर्व सदस्यांनी अत्यंत कुशलतेने पार पाडली. संस्थेचे प्रमुख विश्वस्त उद्योजक देवानंद कदम यांच्या नियोजनामुळे कोणतीही अडचण न येता मोहीम यशस्वी झाली.

यावेळी बोलताना असोसिएशनचे सदस्य गजानन खैरे म्हणाले, “कळसुबाई म्हणजे फक्त ट्रेक नाही, ती एक साधना आहे. अंधारातून प्रकाशाकडे जाण्याचा हा प्रवास आहे. हॅप्पी फॅमिली ट्रेकर्स असोसिएशन फक्त कुटुंबाला एकत्र आणत नाही, तर महाराष्ट्राच्या कणखर सह्याद्रीची ओळख नव्या पिढीला करून देते.”

संस्थेच्या वतीने लवकरच पुढील मोहिमांचे आयोजन करण्यात येणार असून, निसर्गप्रेमींनी मोठ्या संख्येने सहभागी व्हावे असे आवाहन करण्यात आले आहे.

आधार सक्तीचा निर्णय रद्द पण का घेतला होता स्पष्टीकरणाची मागणी

परिवहन कार्यालयाने घेतलेल्या निर्णयानंतर मतदान ओळखपत्र, पॅनकार्ड, पासपोर्ट आदी कागदपत्रे नाव आणि पत्त्याचे कागद पत्र म्हणून सादर करता येणार आहे.आधार सक्तीचे नसताना देखील परिवहन विभागाने आधार सक्तीचे केले होते. याचे नेमके कारण काय आहे.? या निर्णयामुळे नागरिकांना मोठा मनस्ताप सहन करावा लागला. आधार सक्तीचा निर्णय केंद्र सरकारच्या की राज्य सरकारच्या आदेशाने लागू करण्यात आला होता. याचे स्पष्टीकरण देखील राज्य परिवहन आयुक्त राजेश नार्वेकर यांनी दिले पाहिजे. अशी मागणी नागरिकांनी केली आहे.

याबाबतीत बोलताना महाराष्ट्र राज्य मोटार ड्रायव्हिंग स्कूल संघटनेचे अध्यक्ष विजय कुमार दुग्गल म्हणाले, आधार आणि वाहनाच्या कागदपत्रावरील नावात साम्य नसल्याने नागरिकांना अनेक अडचणी येत होत्या. त्यामुळे राज्यात अनेक नागरिकांची कामे रखडली होती. नव्या निर्णयामुळे निश्चितच फायदा होणार असून नागरिकांची कामे मार्गी लागणार आहेत.

काय आहे नव्या परिपत्रकात

रस्ते वाहतूक व महामार्ग मंत्रालय (MoRTH), नवी दिल्ली यांनी जारी केलेल्या अधिसूचनेनुसार वाहन संबंधी सर्व कामकाज हे आधार प्रमाणीकरण (Aadhaar Authentication)
नुसार करण्याचे निर्देश दिलेले आहेत. तथापि, आधारकार्ड वरील डेटा हा वाहन मालकाच्या नोंदणी प्रमाणपत्रातील तपशीलाशी जुळत नाही. त्यामुळे बऱ्याच वाहन मालक/युनियन यांच्या वाहन हस्तांतरण/ नाहरकत प्रमाणपत्राचे अर्ज वाहन प्रणालीवर करता येत नसल्याने तक्रारी या कार्यालयात प्राप्त होत आहेत. रस्ते वाहतूक व महामार्ग मंत्रालय (MoRTH) यांनी दिलेले निर्देश बंधनकारक नसल्याने यासाठी या कार्यालयाने वाहन ४.०
प्रणालीमध्ये सुधारणा करणेसाठी निर्देशक MoRTH व उप महासंचालक NIC यांना कळविले आहे.

तथापि, NIC कडून वाहन ४.० प्रणालीमध्ये यासाठी कोणताही बदल करण्यात आला नाही. सबब, राज्यातील बहुतांश परिवहन कार्यालयामध्ये नागरिकांची वाहन ४.० संबंधीत कामे प्रलंबित आहेत. सदर कामाचा निपटारा करणेसाठी खालीलप्रमाणे निर्देश देण्यात येत आहेत.

१. वाहन मालकाचे नोंदणी प्रमाणपत्रावरील नाव/पत्ता आधारकार्ड प्रमाणे जुळत नसल्यास संबंधीत वाहन मालकांकडून वाहन नोंदणी प्रमाणपत्रावरील नाव/पत्ता दुरूस्ती करणेसाठी अर्ज घेऊन
नाव व पत्ता संबंधी आवश्यक पुरावे घ्यावे, जसे, आधारकार्ड/मतदान ओळखपत्र/पॅनकार्ड/पासपोर्ट इ. सदर पुराव्यांची पडताळणी करून वाहन मालकाचे नोंदणी प्रमाणपत्र दुरूस्त करून त्यांचे वाहनविषयी कामकाज करून द्यावे.

किंवा

वाहन प्रणालीवर ‘Please visit Aadhaar centre to update the pin code or visit
RTO/apply using mobile authentication, to avail contactless services. Name is
not matching in vahan and aadhaar.’ असा संदेश येतो. त्याप्रमाणे वाहन मालकास आधारकार्डमध्ये आवश्यक दुरूस्ती करून घेण्यास कळवावे.

२. रस्ते वाहतूक व महामार्ग मंत्रालय (MoRTH) यांचे निर्देशामध्ये नमूद केल्यानुसार वाहन मालकाचे वाहनविषयक अर्ज मॅन्युअल पद्धतीने आपल्या कार्यालयात स्वीकारावे. तसेच वाहन मालकाचे कार्यालयीन कामकाजासंबंधी सर्व कागदपत्रे स्कॅन करून ठेवावे व त्यानंतर संबंधीत कामकाज करावे. असे परिपत्रक परिवहन आयुक्त राजेश नार्वेकर यांनी काढले आहे.

प्रादेशिक परिवहन कार्यालयाकडून निर्णयास टाळाटाळ;नागरिकांचा प्रचंड संताप 

पुणे : प्रादेशिक परिवहन कार्यालयाने सोमवार पासून ड्रायव्हिंग लायसन्स आणि वाहन हस्तांतरण, नूतनीकरणाच्या कामासाठी मोबाईल OTP द्वारे प्रमाणीकरण करण्यात येणार असल्याचे सांगण्यात आले होते. मात्र आज या कामास सुरवात करण्यात आली नाही.मोबाईल OTP द्वारे प्रमाणीकरण करण्याच्या कामाला MORTH कडे मंजुरी साठी पाठवण्यात आले असून त्यानंतरच जुनी पध्दत सुरू करण्यात येईल.अशी भूमिका परिवहन कार्यालयाने घेतली आहे. या प्रकारामुळे अधिकाऱ्यांकडून टाळाटाळ होत असल्याचा आरोप नागरिकांनी केला आहे. 

सरकारच्या सारथी प्रणाली द्वारे आधारकार्ड आणि ड्रायव्हिंग लायसन्स वरील नावात साम्य असल्यासच नूतनीकरण व नोंदणी करण्यास पुणे परिवहन कार्यालयाने सुरुवात केली असून यामुळे ड्रायव्हिंग लायसन्स नूतनीकरणाचे आणि वाहन हस्तांतरण कामे रखडली असून याचा फटका नागरिकांना बसत आहे. नागरिकांना मोठ्या प्रमाणात मनस्ताप सहन करावा लागत आहे. याबाबत नागरिकांनी तक्रार केल्यानंतर सोमवार पासून जुनी पध्दत सुरू करण्यात येईल असे सांगण्यात आले. मात्र दोन दिवसांत यात बदल करीत मोबाईल OTP द्वारे प्रमाणीकरण करण्याच्या कामाला MORTH कडे मंजुरी साठी पाठवण्यात आले असून त्यानंतरच जुनी पध्दत सुरू करण्यात येईल.अशी भूमिका परिवहन कार्यालयाने घेतली आहे. यामुळे नागरिकांनी संताप व्यक्त केला आहे.

आधार कार्ड आणि आर सी कार्ड वरील आधार नंबर वरून प्रमाणीकरण का नाही?

आधार कार्ड आणि वाहनांचे RC card वर नागरिकाचे नाव लिहण्याची पद्धत वेगळी आहे. RTO कडून नावानुसार प्रमाणीकरण करण्यात येत आहे. दोन्ही कागदपत्रांवर नावात साम्य आहे. मात्र लिहण्याची पद्धत वेगळी असल्याने कागदपत्र प्रमाणित होण्यास अडचण येत आहे. आरटीओ कार्यालयाने जर आधार कार्ड वरील आधार क्रमांक आणि RC कार्ड वरील आधार क्रमांक तपासला तर तो एकच येईल. आणि प्रमाणीकरण प्रक्रिया पूर्ण होऊ शकते. मात्र अशा प्रकारे नागरिकांना का त्रास दिला जात आहे. असा संतप्त प्रश्न नागरिक विचारत आहेत.

आधार कार्ड वरून सक्तीचे प्रमाणीकरण करण्यासाठी प्रादेशिक परिवहन विभाग का आग्रही आहे. जुन्या पद्धतीनुसार मोबाईल OTP द्वारे प्रमाणीकरण करण्यासाठी का टाळाटाळ करण्यात येत आहे. यामागे नक्की कोणाचा काय उद्देश आहे. हे समजत नाही. असा प्रश्न नागरिक उपस्थित करीत आहेत.तातडीने निर्णय घेऊन जुन्या पद्धतीनुसार मोबाईल OTP द्वारे प्रमाणीकरण करण्याचे काम सुरू करण्यात यावे. अशी अपेक्षा नागरिक व्यक्त करीत आहेत. 

MoRTH कडे मंजुरी मागितली आहे. ती मिळाल्यानंतरच मोबाईल OTP द्वारे प्रमाणीकरण-प्रादेशिक परिवहन सहाय्यक अधिकारी शैलेश कामत

याबाबतीत बोलताना प्रादेशिक परिवहन सहाय्यक अधिकारी शैलेश कामत म्हणाले, जुन्या पद्धतीनुसार मोबाईल OTP द्वारे प्रमाणीकरण करण्यासाठी NIC ने MoRTH कडे मंजुरी मागितली आहे. ती मिळाल्यानंतरच मोबाईल OTP द्वारे प्रमाणीकरण करता येईल. सध्या आधार प्रमाणीकरण द्वारे आरटीओ कार्यालयात जाऊन प्रमाणीकरण आणि हस्तांतरण, NOC आदी कामे करता येणार आहेत. 

आधार प्रमाणीकरण सक्तीचे असल्याचा कोणताही आदेश किंवा जी आर दाखवा – विजय कुमार दुग्गल

याबाबतीत बोलताना महाराष्ट्र राज्य मोटार ड्रायव्हिंग स्कूल संघटनेचे अध्यक्ष विजय कुमार दुग्गल म्हणाले, केंद्र सरकारच्या वतीने आधार कार्ड सक्तीचे नसल्याचे सांगण्यात आले असताना देखील केवळ राज्यात परिवहन कार्यालय या विषयी सक्ती का करीत आहे? आधार प्रमाणीकरण सक्तीचे असल्याचा कोणताही आदेश किंवा जी आर असेल तर परिवहन कार्यालयाच्या अधिकाऱ्यांनी आम्हास दाखवावा. या नव्या नियमांमुळे नागरिकांना नाहक त्रास सहन करावा लागत आहे. तातडीने जुन्या पद्धतीनुसार मोबाईल OTP द्वारे प्रमाणीकरण करण्यास सुरुवात करण्यात यावी. 

याबाबतीत प्रादेशिक परिवहन अधिकारी राजेश नार्वेकर यांच्याशी संपर्क साधण्याचा प्रयत्न केला असता त्यांच्याशी संपर्क होऊ शकला नाही.

काय आहे नवा नियम? 

वाहनाच्या मालकी हक्क हस्तांतरण (TO) व ना हरकत प्रमाणपत्र (NOC) या ऑनलाईन सेवांची एकसमान व प्रमाणित पद्धतीने अंमलबजावणी तसेच संबंधीत आधार प्रमाणीकरण करण्याचा निर्णय परिवहन कार्यालयाने घेतला आहे. सरकारच्या रस्ते वाहतूक व महामार्ग मंत्रालय (MoRTH) यांचे दिनांक ०४.०५.२०२६ रोजीच्या पत्रानुसार देशातील सर्व राज्ये / केंद्रशासीत प्रदेशांमध्ये ऑनलाईन परिवहन सेवांची एकसमान व प्रमाणित पद्धतीने अंमलबजावणी करण्याच्या अनुषंगाने Transfer of Ownership (TO) व No Objection Certificate (NOC) या सेवांसाठी सुधारित कार्यप्रवाह निश्चित करण्यात आला आहे. सदर सुधारित कार्यप्रवाहामध्ये संबंधीत अर्जदाराची Aadhaar Authentication/eKYC प्रक्रिया समाविष्ट करण्यात आलेली आहे. सदर कार्यप्रवाहास सक्षम प्राधिकाऱ्याची मान्यता प्राप्त असून त्यानुसार सदर सेवांची सुधारित पद्धतीने अंमलबजावणी करण्याचे निर्देश देण्यात आले आहेत.

पुणे : डॉ. बाबासाहेब आंबेडकर संशोधन व प्रशिक्षण संस्था (बार्टी) यांच्यामार्फत अनुसूचित जातीतील संशोधक विद्यार्थ्यांसाठी डॉ. बाबासाहेब आंबेडकर राष्ट्रीय संशोधन अधिछात्रवृत्ती (BANRF) योजना सन 2013 पासून राबविण्यात येत आहे. सदर योजनेच्या प्रभावी अंमलबजावणीसाठी महाराष्ट्र शासनाने सर्वंकष धोरण निश्चित केले आहे. सदर धोरणानुसार, दिनांक 1 जानेवारी 2023 ते 31 डिसेंबर 2025 या कालावधीत पीएच.डी. अभ्यासक्रमासाठी कायमस्वरूपी नोंदणी (Permanent Registration) झालेल्या अनुसूचित जातीतील संशोधक विद्यार्थ्यांकडून पीएच.डी. अधिछात्रवृत्ती शैक्षणिक वर्ष 2023, 2024 व 2025 करिता दिनांक 01 ऑगस्ट 2026 पासून ऑनलाइन अर्ज मागविण्यात येत आहेत.

वयोमर्यादेबाबत महत्त्वाची सूचना
बार्टी, पुणे यांच्या संकेतस्थळावर प्रसिद्ध करण्यात आलेल्या मार्गदर्शक सूचनांनुसार पीएच.डी. अधिछात्रवृत्तीसाठी कमाल वयोमर्यादा 35 वर्षे निश्चित करण्यात आली होती. त्यानुसार शैक्षणिक वर्ष 2023 करिता दिनांक 01 जून 2023 रोजी संशोधक विद्यार्थ्याचे वय 35 वर्षांपेक्षा अधिक नसावे, अशी अट नमूद करण्यात आली होती. तथापि पीएच.डी अधिछात्रवृत्ती वर्ष 2023 करिता वयोमर्यादा 45 वर्ष करण्याचा निर्णय घेण्यात आला. दिनांक 01 जानेवारी 2023 ते 31 डिसेंबर 2023 या कालावधीत पीएच.डी. अभ्यासक्रमासाठी कायमस्वरूपी नोंदणी झालेल्या अनुसूचित जातीतील संशोधक विद्यार्थ्यांसाठी सदर वयोमर्यादेत शिथिलता देण्यात येत आहे.त्यामुळे शैक्षणिक वर्ष 2023 करिता पीएच.डी. अधिछात्रवृत्तीच्या अर्जासाठी कमाल वयोमर्यादा 45 वर्षे करण्यात येत आहे.
सदर वयोमर्यादा शिथिलतेचा लाभ फक्त शैक्षणिक वर्ष 2023 करिता दिनांक 01 जानेवारी 2023 ते 31 डिसेंबर 2023 या कालावधीत पीएच.डी.साठी कायमस्वरूपी नोंदणी झालेल्या अनुसूचित जातीतील संशोधक विद्यार्थ्यांना लागू राहील.
तरी पात्र संशोधक विद्यार्थ्यांनी वरील बाबींची नोंद घेऊन बार्टी, पुणे यांच्या अधिकृत संकेतस्थळावर उपलब्ध मार्गदर्शक सूचनांचा अभ्यास करून दिनांक 15/09/2026 पर्यंत ऑनलाइन अर्ज सादर करावा, असे आवाहन मा. महासंचालक, बार्टी, पुणे यांनी केले आहे.

पुणे : शैक्षणिक वर्ष 2026-27 मधील राज्य सामाईक प्रवेश परीक्षा कक्षाकडून उच्च शिक्षण, तंत्रशिक्षण, कृषी शिक्षण, वैद्यकीय/आयुष शिक्षण आणि कला शिक्षण विभागाच्या विविध पदवी व पदव्युत्तर पदवी या व्यावसायिक अभ्यासक्रमांच्या प्रवेशासाठी राखीव प्रवर्गामधून प्रवेशासाठी केंद्रभुत प्रवेश प्रक्रिया राबविण्यात आलेल्या आहेत. अभ्यासक्रमाच्या प्रवेश घेण्याच्या तारखा राज्य सामाईक प्रवेश परीक्षा कक्षाकडून जाहीर करण्यात आलेल्या आहेत. तथापि समित्यांकडे प्रत्यक्षात अनेक विद्यार्थ्यांनी उशीराने अर्ज सादर केल्याचे दिसून येते.

व्यवसायिक अभ्यासक्रमाच्या पात्र विद्या‍र्थ्यांना त्रुटी पूर्तता करण्याबाबत Sms/ Email व पत्राव्दारे संबंधित समित्यांमार्फत कळविण्यात येऊनही अनेक अर्जदार/विद्यार्थी यांनी संबंधीत समित्यांशी संपर्क साधलेला दिसून येत नाही. त्रुटी पूर्तता करण्याबाबतची सर्वस्वी जबाबदारी अर्जदारांची आहे. अर्जदारांची गैरसोय होऊ नये याकरिता आवश्यकतेनुसार जिल्हा जात प्रमाणपत्र पडताळणी समित्यांनी सुटटीच्या दिवशी कार्यालय सुरु ठेवावे असे निर्देश मा. महासंचालक, बार्टी तथा मुख्य समन्वयक  यांनी जिल्हा जात प्रमाणपत्र पडताळणी समिती यांना दिले आहेत.

जात वैधता प्रमाणपत्राअभावी मागासवर्गीय विद्यार्थी व्यावसायिक अभ्यासक्रमास प्रवेश मिळणेपासून वंचित राहू नये याकरिता ज्या अर्जदार/विद्यार्थ्यांनी अद्यापही वैधता प्रमाणपत्राबाबत त्रुटींची पूर्तता केलेली नाही, त्यांनी संबंधीत जिल्हा जात प्रमाणपत्र पडताळणी समितीशी त्वरीत संपर्क साधावा व त्रुटींची पूर्तता करावी जेणेकरुन समितीला विहित वेळेत निर्णय घेता येईल असे आवाहन दिपा मुधोळ-मुंडे, महासंचालक डॉ. बाबासाहेब आंबेडकर संशोधन व प्रशिक्षण संस्था (बार्टी), पुणे तथा मुख्य समन्वयक, जिल्हा जात प्रमाणपत्र पडताळणी समित्या (सर्व) महाराष्ट्र राज्य यांच्या वतीने करण्यात येत आहे.

परळी तालुक्यात ठिकठिकाणी सोयाबीन आणि कापसाला सध्या फुल आलेली असतानाच पाऊस नसल्यामुळे पिकांची वाढ खुंटल्याचे दिसून येत आहे. यामुळे उत्पन्न घटणार असल्याचे शेतकऱ्यांनी सांगितले. येत्या दोन दिवसात पाऊस न झाल्यास हे पीक हातातून जाणार असल्याचे शेतकऱ्यांकडून सांगण्यात आले. सोयाबीन लागवडीसाठी व्याजाने पैसे काढून एकरी 18 ते 20 हजार रुपये खर्च केल्याचं शेतकऱ्यांनी सांगितलं. हा केलेला खर्चही वसूल होईल का नाही, याची चिंता शेतकऱ्यांना लागून राहिली. शासनाने या सगळ्याची त्वरीत दखल घेऊन शेतकऱ्यांना दिलासा द्यावा, अशी अपेक्षा ते व्यक्त करत आहेत.

पुणे : सीओईपी तंत्रज्ञान विद्यापीठात शैक्षणिक वर्ष २०२६-२७ पासून प्रवेश घेणाऱ्या विद्यार्थ्यांसाठी जाहीर करण्यात आलेल्या शुल्क रचनेबाबत विद्यार्थी तसेच विविध क्षेत्रांतून प्राप्त झालेल्या निवेदनांची दखल घेत राज्याचे उच्च व तंत्र शिक्षण मंत्री चंद्रकांत पाटील यांनी शुल्क रचनेत फेररचना करण्याचे निर्देश दिले आहेत.

या संदर्भात मंगळवारी (१८ ऑगस्ट) उच्च व तंत्र शिक्षण मंत्री चंद्रकांत पाटील यांच्या दालनात अपर सचिव रेड्डी तसेच वरिष्ठ अधिकाऱ्यांसोबत बैठक झाली. या बैठकीत विद्यार्थ्यांच्या मागण्यांवर सविस्तर चर्चा करण्यात आली.

विद्यार्थ्यांना शिक्षण शुल्क परताव्याचा अधिकाधिक लाभ मिळावा, यासाठी विद्यापीठाने शुल्क नियामक प्राधिकरणाच्या (FRA) मार्गदर्शक तत्त्वांनुसार विद्यार्थ्यांसाठी सुधारित शुल्क रचना करावी, असे निर्देश मंत्री पाटील यांनी दिले. तसेच शुल्क रचनेतील ‘Other Fee’ हा घटक ‘Tuition Fee’मध्ये समाविष्ट करण्याचेही निर्देश देण्यात आले आहेत.

या सुधारीत शुल्क रचनेचा लाभ इतर मागासवर्गीय (OBC), विमुक्त जाती व भटक्या जमाती (VJ/NT), आर्थिकदृष्ट्या दुर्बल घटक (EWS) आणि सामाजिक व शैक्षणिकदृष्ट्या मागासवर्ग (SEBC) प्रवर्गातील विद्यार्थ्यांना मिळणार आहे. तसेच विद्यार्थिनींना शासनाकडून मिळणाऱ्या शिक्षण शुल्क परताव्याचा अधिकाधिक लाभ मिळण्यास मदत होणार आहे.

विद्यार्थ्यांच्या हिताच्या दृष्टीने सकारात्मक निर्णय घेण्यासाठी मार्गदर्शन केल्याबद्दल सीओईपी तंत्रज्ञान विद्यापीठ प्रशासनाने राज्य शासनाचे आभार मानले आहेत.

पुणे : महात्मा ज्योतिराव फुले यांच्या द्विशताब्दी जन्मदिनानिमित्त राष्ट्र सेवा दल, पुणे आणि समाज साहित्य प्रतिष्ठान, सिंधुदुर्ग यांच्या संयुक्त विद्यमाने दीर्घ लेखन काव्य स्पर्धा आयोजित करण्यात आली आहे. ‘फुले यांचे विचार आणि कार्य’ या विषयावर ही स्पर्धा घेण्यात येत असून 30 सप्टेंबर 2026 पर्यंत स्पर्धेसाठी कविता पाठविण्याचे आवाहन राष्ट्र सेवा दल दिवाळी अंक संपादक तथा अ. भा. साहित्य संमेलनाचे माजी अध्यक्ष, ज्येष्ठ कादंबरीकार लक्ष्मीकांत देशमुख आणि समाज साहित्य प्रतिष्ठानचे मार्गदर्शक कवी अजय कांडर यांनी केले आहे.

पहिल्या तीन विजेत्यांना अनुक्रमे पाच हजार, तीन हजार आणि दोन हजार रुपये तसेच उत्तेजनार्थ एक हजाराची तीन पारितोषिके दिली जातील. या सर्व विजेत्यांना स्मृतीचिन्ह, शाल आणि ग्रंथ भेट देण्यात येणार आहे. पहिल्या तीन पारितोषिक विजेत्या कविता किंवा फार दीर्घ असल्यास त्यांचा काही भाग राष्ट्र सेवा दलाच्या 2026 च्या दिवाळी अंकात प्रसिद्ध करण्यात येणार आहे.
स्पर्धेचे नियम :

1. कविता किमान 20 पानांची असावी. त्यापेक्षा कितीही मोठी चालेल.
   (टीप : मराठीत दीर्घ कविता लिहिली गेली आहेच. त्यामुळे ज्यांना त्याविषयी काहीच माहिती नाही त्यांनी “20 ओळी की 20 पाने” असे प्रश्न संयोजकांना फोन करून विचारू नयेत.)
2. पंधरा ते वीस ओळींच्या दरम्यान एक पान असेल असे समजावे. छंदोबद्ध कविता असेल तर पाच कडव्यात एक पान असेल असे समजावे.
3. कवितेच्या टपालावर कवीने आपला मोबाईल नंबर स्पष्ट वाचता येईल असा लिहावा.
4. कविता पानाच्या एकाच बाजूला, वाचता येईल अशा अक्षरात लिहून किंवा टाईप करून कुरियर किंवा पोस्टाने एका प्रतीत पाठवावी.
   कविता पाठविण्याचा पत्ता :
   बुद्धभूषण रवींद्र बगाडे
   द्वारा
   राष्ट्र सेवा दल
   मध्यवर्ती कार्यालय
   सिंहगड रोड
   पर्वती
   पुणे 411030

शरद पवारांच्या 8 खासदारांनी संसद भवानातील पंतप्रधान कार्यालयात पीएम नरेंद्र मोदींची भेट घेतली. भेटीनंतर झालेल्या बैठकीत महत्त्वाच्या विषयांवर चर्चा झाली. सर्व खासदार भेटीसाठी पोहोचल्यानंतर पंतप्रधान नरेंद्र मोदींनी सुप्रिया सुळे यांच्याकडे शरद पवार यांच्या प्रकृतीची विचारणा केली. त्यानंतर शरद पवार यांच्या एनर्जीचा सर्वांनी आदर्श घेतला पाहिजे, अशा शब्दात मोदींनी कौतुक केलं.त्यानंतर सर्व खासदारांनी पंतप्रधान मोदींकडे मतदारसंघातील प्रश्न मांडले.

खासदार बजरंग सोनवणे यांनी बीडच्या पाण्याचा प्रश्न मांडला. उजनी धरणातून बीड जिल्ह्याला पाणी सोडा, अशी मागणी खासदार बजरंग सोनवणे यांनी केली. पीएम केअरमधून खासदारांना 35 प्रकरणांसाठी पैसे मिळतात, त्यांची संख्या वाढवावी. केवळ एका खासदारांसाठी नव्हे, तर सर्व खासदारांसाठी ही वाढ करावी, असा मुद्दा सोनवणे यांनी मांडला.

नवी मुंबईच्या विमानतळाला दिवंगत दि. बा. पाटील यांचं नाव देण्याची मागणी जोर धरू लागली आहे. यासाठी दिल्लीत आंदोलन देखील सुरू आहे. या पार्श्वभूमीवर नवी मुंबई विमानतळाला दि. बा. पाटलांचं नाव देण्याची मागणी खासदार सुरेश म्हात्रे यांनी केली. नावाविषयी राज्य सरकारने प्रस्ताव मान्य केला आहे. आता प्रस्ताव केंद्र सरकारकडे आला आहे. त्यामुळे केंद्र सरकारने निर्णय घ्यावा, अशी विनंती खासदार म्हात्रे यांनी केली. नगरचे खासदार निलेश लंके यांनी कर्करोगाविषयीचा मुद्दा हा पंतप्रधान मोदींकडे मांडला. खासदार अमोल कोल्हे यांनी नाशिक-पुणे हायस्पीड रेल्वे प्रकल्पाचा मुद्दा मांडला. खासदार अमर काळे यांनीही पंतप्रधान मोदींकडे त्यांच्या मतदारसंघाचा मुद्दा मांडला आहे.