माजी नगरसेवक अमोल बालवडकर म्हणाले, “आमच्या भागातील श्री शिवछत्रपती क्रीडा संकुलाचे नाव काही समाजकंटकांनी जाणीवपूर्वक बदलले आहे. यामुळे भागातील शिवप्रेमी, खेळाडू आणि नागरिक अत्यंत संतप्त झाले आहेत. अशा समाजकंटकांवर तातडीने कारवाई करावी.”

अमोल बालवडकर यांनी पुढे सांगितले की, गुगल मॅपवर जाऊन अशा प्रकारे लोकेशन एडिट करणे आणि नाव बदलणे हा समाजात तेढ निर्माण करण्याचा प्रयत्न आहे. हा तंत्रज्ञानाचा चुकीचा वापर असून, याचा गैरफायदा घेऊन इंटरनेटवरील हॅकर इतरही गुन्हे करू शकतात. त्यांनी पोलिसांना या प्रकरणाची तातडीने चौकशी करून दोषींना शोधून कठोर कारवाई करण्याची मागणी केली आहे. तसेच, गुगल मॅपवरील हे बदललेले नाव त्वरित पूर्ववत करण्याची विनंती त्यांनी केली आहे.