शिवाजीनगर मतदारसंघात बालेवाडी, बावधन आणि म्हाळुंगे या वेगाने वाढणाऱ्या भागांना एनसीएल उपकेंद्रातून (सबस्टेशन) वीज पुरवठा केला जातो. या परिसरात लोकवस्ती वेगाने वाढल्यामुळे एनसीएल उपकेंद्रावर भार पडत आहे. याचा थेट फटका शिवाजीनगर भागाला बसत असून येथील वीज पुरवठा वारंवार विस्कळीत होतो, असे आमदार शिरोळे यांनी सभागृहात सांगितले.

यावर कायमस्वरूपी तोडगा काढण्यासाठी २२०/२२ (केव्ही) बालेवाडी आणि २२०/२२ (केव्ही) बावधन या वीज उपकेंद्रांना मंजुरी मिळाली आहे. बालेवाडी उपकेंद्रासाठी जागा संपादित झाल्या आहेत, निविदा मंजुरीची प्रक्रिया सुरू झाली आहे. ११० मेगावॅट क्षमतेच्या या उपकेंद्राची कामे पुर्ण होण्यास दोन वर्ष लागतील, असे सांगितले जाते, परंतु युद्धपातळीवर हे काम होणे गरजेचे आहे. या उपकेंद्रामुळे एनसीएल उपकेंद्रावरील ताण कमी होईल. तांत्रिक बिघाड झाल्यास शिवाजीनगर परिसरासाठी ही उपकेंद्र उपयोगी ठरतील.

बावधन उपकेंद्राला (सबस्टेशन) अजून जागा मिळाली नसून शासनाने सदर उपकेंद्रासाठी लवकरात लवकर जागा उपलब्ध करून देणे गरजेचे आहे. शिवाजीनगरमधील जनतेला या त्रासातून लवकर मुक्त करण्यासाठी या दोन्ही उपकेंद्रांची (सबस्टेशन) कामे युद्धपातळीवर होणे गरजेचे आहे, असे आमदार सिद्धार्थ शिरोळे यांनी सांगितले.

पुणे : चांदणी चौकातून बालेवाडीकडे येणाऱ्या 1000 मि.मी. व्यासाच्या मुख्य जलवाहिनीवरील व्हॉल्व्हमध्ये बिघाड झाल्यामुळे मागील दोन दिवसांपासून बालेवाडी, संपूर्ण बाणेर, पाषाण, सुस रोड, सुतारवाडी, पंचवटी आणि विधातेवस्ती परिसरातील पाणीपुरवठा विस्कळीत झाला होता. स्थानिक नगरसेवक अमोल बालवडकर यांच्या पाठपुराव्यानंतर दुरुस्तीचे काम पुर्ण करण्यात आले.

अमोल बालवडकर म्हणाले, या तांत्रिकदृष्ट्या अत्यंत गुंतागुंतीच्या दुरुस्तीचे काम पुणे महानगरपालिकेच्या पाणीपुरवठा विभागाने अहोरात्र परिश्रम घेऊन यशस्वीरित्या पूर्ण केले असून, खराब झालेला व्हॉल्व्ह बदलण्यात आला आहे.त्यामुळे आज संध्याकाळपासून संबंधित परिसरात टप्प्याटप्प्याने पाणीपुरवठा सुरू करण्यात येणार आहे.

या कालावधीत नागरिकांनी दाखवलेल्या संयम व सहकार्याबद्दल मनःपूर्वक आभार. तसेच दुरुस्तीचे काम वेगाने पूर्ण करण्यासाठी परिश्रम घेतलेल्या पाणीपुरवठा विभागातील सर्व अधिकारी व कर्मचाऱ्यांचेही आभार व्यक्त करतो. नागरिकांनी पाणीपुरवठा पूर्ववत होईपर्यंत आवश्यकतेनुसार पाण्याचा जपून व जबाबदारीने वापर करावा. असे आवाहन अमोल बालवडकर यांनी केले आहे.

महावितरण अधिकाऱ्यांना तातडीच्या उपाययोजनांच्या सूचना

पुणे : बाणेर-बालेवाडी परिसरात गेल्या काही दिवसांपासून वारंवार होत असलेल्या वीजपुरवठा खंडित होण्याच्या घटनांमुळे नागरिकांमध्ये तीव्र नाराजी निर्माण झाली आहे. नागरिकांकडून सातत्याने येणाऱ्या तक्रारींच्या पार्श्वभूमीवर राज्याचे उच्च व तंत्र शिक्षणमंत्री चंद्रकांत पाटील यांनी आज कोथरूड येथील आपल्या निवासस्थानी महावितरणच्या वरिष्ठ अधिकाऱ्यांची आढावा बैठक घेत संबंधित समस्यांवर तातडीने उपाययोजना करण्याच्या सूचना दिल्या. तसेच, नागरिकांना गुणवत्तापूर्ण वीजपुरवठा मिळावा, यासाठी प्रशासनाने जबाबदारीने काम करावे, असेही त्यांनी यावेळी अधिकाऱ्यांना बजावले. 

बैठकीदरम्यान बाणेर-बालेवाडी भागातील वीजपुरवठा खंडित होण्यामागील कारणांचा सविस्तर आढावा घेण्यात आला. या भागात सुरू असलेले रस्ता रुंदीकरण तसेच मेट्रो प्रकल्पाची कामे यामुळे अनेक ठिकाणी वीजवाहिन्या तुटण्याच्या घटना घडल्या आहेत. परिणामी, जोडणीच्या ठिकाणी केबल नादुरुस्त होण्याचे प्रमाण वाढले असून; त्याचा थेट परिणाम नागरिकांच्या दैनंदिन जीवनावर होत आहे.

याशिवाय, बाणेर-बालेवाडी परिसरात मोठ्या प्रमाणावर नवीन निवासी व व्यावसायिक प्रकल्प उभे राहत असल्याने विद्युत भारात सातत्याने वाढ होत आहे. मात्र, त्या तुलनेत विद्यमान वीज यंत्रणा अपुरी पडत असल्याचे अधिकाऱ्यांनी पाटील यांच्या निदर्शनास आणून दिले. त्यावर भविष्यातील वाढती मागणी लक्षात घेऊन बाणेर-बालेवाडी-पाषाण-सूस आदी भागातील वीज वितरण यंत्रणांचे सक्षमीकरण करण्यावर भर देण्याचे निर्देश चंद्रकांत पाटील यांनी अधिकाऱ्यांना दिले.

याशिवाय या भागासाठी नवीन अतिउच्चदाब उपकेंद्र उभारण्याचा प्रस्ताव प्रलंबित असून, त्याबाबत महापारेषण कंपनीच्या अधिकाऱ्यांसोबत स्वतंत्र बैठक घेऊन कामाला गती देण्याचे निर्देश देण्यात येणार असल्याचे त्यांनी स्पष्ट केले. दरम्यानच्या काळात नागरिकांना सुरळीत वीजपुरवठा मिळावा यासाठी NCL अतिउच्चदाब केंद्रातून दोन नवीन फीडर सुरू करण्यासाठी निविदा काढण्यात आल्याची माहिती अधिकाऱ्यांनी दिली. येत्या सहा महिन्यांत ही कामे पूर्ण करण्याच्या सूचना ना. पाटील यांनी महावितरणच्या अधिकाऱ्यांना दिल्या.

वरील कामांमध्ये कोणत्याही स्तरावर अडथळे निर्माण झाल्यास मंत्रालय स्तरावर अथवा महावितरण मुख्यालय स्तरावर स्वतंत्र बैठका घेऊन प्रश्न तातडीने मार्गी लावण्यात येतील, असेही चंद्रकांत पाटील यांनी स्पष्ट केले. विशेषतः अत्यावश्यक वीज दुरुस्तीच्या कामांसाठी रस्ते खोदाई परवानग्यांमध्ये येणाऱ्या अडचणींबाबत पुणे महापालिका आणि महावितरणच्या अधिकाऱ्यांची संयुक्त बैठक घेऊन सदर प्रश्न सोडविण्यात येईल, असेही त्यांनी यावेळी अधिकाऱ्यांना आश्वास्त केले.

तसेच, बाणेर-बालेवाडी परिसरातील वीजपुरवठ्याचा नियमित आढावा घेण्यासाठी दरमहा बैठक घेण्याचाही निर्णय यावेळी घेण्यात आला. नागरिकांना अखंडित व गुणवत्तापूर्ण वीजपुरवठा मिळावा, यासाठी प्रशासनाने अधिक जबाबदारीने काम करावे, अशा स्पष्ट सूचना चंद्रकांत पाटील यांनी अधिकाऱ्यांना दिल्या.

या बैठकीला नगरसेविका मयूरी कोकाटे, महावितरणचे गणेशखिंड मंडळाचे अधिक्षक अभियंता सिंहजीराव गायकवाड, शिवाजीनगर विभागाचे कार्यकारी अभियंता नितीन शिंदे, कोथरूड विभागाचे कार्यकारी अभियंता गणेश सामसे, पंडित दांडगे, उमेश उर्पे, भाजप कोथरूड उत्तर मंडल अध्यक्ष सचिन पाषाणकर, गणेश कळमकर, प्रल्हाद सायकर, लहू बालवडकर, प्रकाश बालवडकर, राहुल कोकाटे, मोरेश्वर बालवडकर,उमा गाडगीळ, अनिकेत चांदेरे,निकीता माथाडे तसेच BBPRA (बाणेर, बालेवाडी, पाषाण रेसिडेंस असोसिएशन)चे अध्यक्ष विजय वरणगावकर, सारंगजी वाबळे, संजयजी वाघूलदे, अमेय जगताप, सारंग रानडे यांच्यासह बाणेर-बालेवाडी परिसरातील नागरिक उपस्थित होते.

नगरसेवक अमोल बालवडकर म्हणाले, सध्या बाणेर-बालेवाडी भागाला NCL EHV मधून सुमारे १५० मेगावॅट, तर सुस-म्हाळुंगे भागाला हिंजवडी EHV मधून ७५ मेगावॅट वीजपुरवठा केला जात आहे. मात्र वाढत्या आयटी हब आणि लोकसंख्येमुळे नव्या सबस्टेशनची गरज अत्यंत महत्त्वाची बनली आहे.

२०१९-२०२० मध्येच या सबस्टेशनसाठी जागा सुचवूनही प्रशासन काळामध्ये व आपले उदासीन आमदार मंत्री यांच्यामुळे सदर कामामध्ये कोणतीही प्रगती झाली नाही. महापारेषणने २०२७-२८ मध्ये निधीची तरतूद प्रस्तावित केली असली तरी हे काम लवकर पूर्ण व्हावे यासाठी मुख्यमंत्री मादेवेंद्रजी फडणवीस व उपमुख्यमंत्री सुनेत्राताई पवार यांच्याकडे पाठपुरावा करणार असल्याचे बालवडकर म्हणाले.

सदर जागेवरील अनेक वर्षांपासूनचा डेब्रीस व राडारोडा हटविण्याची प्रक्रिया सुरू झाली असून, लवकरच तो हटवून सबस्टेशनचे काम मार्गी लावण्याचा प्रयत्न राहील. हे सबस्टेशन पूर्ण झाल्यानंतर बाणेर-बालेवाडी भागातील वीजपुरवठा अधिक सक्षम आणि नियमित होण्यास मोठी मदत होणार आहे.यावेळी महावितरणचे अति. कार्यकारी अभियंता कर्पे, सहा-अभियंता पठाडे व मोमीन उपस्थित होते.

बाणेर-बालेवाडी परिसरातील सुमारे सव्वाशे नागरिक शनिवारी एलाईट एम्पायर सोसायटी येथे मोठ्या उत्साहात एकत्र आले होते. या संवादातून नागरिकांनी आपल्या दैनंदिन अडचणी आणि स्थानिक प्रश्न मोकळेपणाने मांडले.

यामध्ये अपूर्ण रस्ते, तुटलेले फुटपाथ, सुरक्षा व्यवस्था, ड्रेनेज समस्या, साई चौकातील कचरा प्रश्न, भाजी मंडई परिसरातील अडचणी, राधा चौक, एस्केपी कॅम्प व रविंद्रनाथ शाळेजवळील वाहतूक कोंडी, ममता चौकात सिग्नलची आवश्यकता, जुपिटर चौकातील वाहतूक नियमन, फूटपाथवरील आठवडी बाजार, वारंवार खंडित होणारा वीजपुरवठा, बालेवाडीतील दारू दुकानामुळे निर्माण होणारा त्रास तसेच एमएनजीएलच्या नवीन कनेक्शनसंदर्भातील प्रश्न यांचा समावेश होता.

यावेळी नगरसेवक अमोल बालवडकर, नगरसेवक बाबूराव चांदेरे, नगरसेविका तथा औंध प्रभाग समिती अध्यक्षा रोहिणी चिमटे, नगरसेविका व स्थायी समिती सदस्या मयुरी कोकाटे यांनी नागरिकांच्या समस्या जाणून घेतल्या व त्या लवकरात लवकर मार्गी लावण्याचे आश्वासन दिले.

नागरिकांच्या सहकार्याने आणि सर्वांच्या एकत्रित प्रयत्नांतून बाणेर-बालेवाडी परिसराचा सर्वांगीण विकास घडवून आणू, असा विश्वास यावेळी स्थानिक नगरसेवकांनी व्यक्त केला.

नुकतीच उच्च व तंत्रशिक्षण मंत्री, चंद्रकांतदादा पाटील, यांच्या अध्यक्षतेखाली सुस-बाणेर-पाषाण प्रभागातील मिसिंग लिंकबाबत मा. महापालिका आयुक्त व अन्य अधिकारी यांचे समवेत बैठक झाली. सदर बैठकीत झालेल्या चर्चेस अनुसरून ही पाहणी करण्यात आली.

नगरसेवक अमोल बालवडकर म्हणाले, रस्त्यांच्या कामांची सद्यस्थिती, भूसंपादन व तांत्रिक अडचणी, तसेच नागरिकांना भेडसावणाऱ्या वाहतूक समस्यांचा सखोल आढावा घेण्यात आला. प्रलंबित कामे वेगाने पूर्ण करण्यासाठी आवश्यक ती प्रशासकीय प्रक्रिया तात्काळ सुरू करावी, अशा सूचना संबंधित अधिकाऱ्यांना दिल्या.

ही महत्त्वाची मिसिंग लिंक पूर्ण झाल्यानंतर पाषाण, सुतारवाडी, बाणेर व बालेवाडी परिसरातील वाहतूक व्यवस्थेत लक्षणीय सुधारणा होणार आहे. पर्यायी मार्ग उपलब्ध झाल्यामुळे वाहतूक कोंडी कमी होऊन नागरिकांचा वेळ व इंधन दोन्हीची बचत होईल. तसेच नोकरदार, विद्यार्थी, व्यावसायिक आणि आपत्कालीन सेवांना याचा मोठा फायदा होणार आहे.

परिसराचा नियोजनबद्ध व सर्वांगीण विकास साधण्यासाठी, नागरिकांच्या सोयीसुविधांना प्राधान्य देत अशी विकासकामे गतीने पूर्ण व्हावीत, यासाठी माझा सातत्याने पाठपुरावा सुरू आहे. सुरक्षित, सुसज्ज आणि ट्रॅफिकमुक्त परिसर घडविण्याचा संकल्प यामागे असून, येत्या काळातही विकासाची ही गती कायम ठेवली जाईल अशी ग्वाही अमोल बालवडकर यांनी दिली आहे.

कस्पटेवस्ती येथील पुणे व वाकड भागाला जोडणाऱ्या पुलाजवळील सुरू असलेल्या रस्त्याच्या कामाची तसेच उर्वरीत आवश्यक जागेची पाहणी केली तसेच सोमेश्वर मंदिरामागील डीपी रस्ते व अन्य मीसिंग लिंकच्या जागांची पाहणी करून त्या व्यतिरिक्त बालेवाडी येथील सुस नांदे रस्त्यावरील सनीज वर्ल्ड येथील खिंडीच्या रुंदीकरणाच्या कामाचीही पाहणी करण्यात आली.

यावेळी संबंधित जागा मालक यांना तडजोडीने एफ.एस.आय. किंवा टी.डी.आर. मोबदल्यात जागा त्वरित मनपाचे ताब्यात देणेबाबत विनंती करण्यात आली. भूसंपादन आणि कोर्ट केसेस याबाबत अतिरिक्त महापालिका आयुक्त यांनी यावेळी माहिती घेतली असून त्याबाबत तातडीने चर्चा करणेबाबत पथ विभाग, बांधकाम विकास विभाग आणि भूसंपादन विभाग यांना आदेश दिले आहेत व  पुढील तीन महिन्यात महत्वाच्या मिसिंगलिंकचे रस्ते जागा ताब्यात घेऊन रस्ते करणेबाबत पाठपुरावा करण्याचे निर्देश देण्यात आले. त्यानुसार या तिन्ही विभागांकडून कार्यवाही सुरू करण्यात आली आहे.

सदर पाहणीदरम्यान खालील प्रमाणे अधिकारी उपस्थित होते.

नगरसेवक अमोल बालवडकर, नगरसेवक बाबुराव चांदेरे, नगरसेविका रोहिणी चिमटे,राहुल कोकाटे, पथ विभाग मुख्य अभियंता राजेश बनकर, अधिक्षक अभियंताअभिजित आंबेकर

तसेच पथ विभाग, बांधकाम विकास विभाग व भूसंपादन विभाग इत्यादी विभागाचे अभियंते व सर्व संबंधित अधिकारी उपस्थित होते.

अमोल बालवडकर यांनी या अटीतटीच्या लढतीत राष्ट्रवादी काँग्रेस (अजित पवार गट) च्या तिकीटावर भाजप उमेदवार लहू बालवडकर यांचा ९०३ मतांच्या फरकाने पराभव केला. तर बाबुराव चांदेरे यांनीही त्याच प्रभागातील आपल्या जागेवर दणदणीत विजय मिळवला. या निवडणुकीत प्रभागातील प्रत्येक नागरिकाने दिलेला विश्वास, प्रेम आणि मोलाची साथ हाच या यशामागील मुख्य ताकद असल्याचे दोघांनीही सांगीतले.

अमोल बालवडकर यांनी सर्वांना मनापासून धन्यवाद व्यक्त केला. हे यश फक्त आमचे नाही, तर प्रभागातील प्रत्येक नागरिकाचे आहे. यापुढेही विकास आणि सेवेसाठी पूर्ण निष्ठेने काम करू,नागरिकांनी दाखवलेल्या विश्वासामुळे मी पुन्हा विजयी झालो आहे. या प्रभागातील अनेक प्रलंबीत कामे आता मार्गी लागतील. निधीची कोणतीही कमी पडणार नाही. कारण अजितदादा आपल्या पाठीशी आहेत. असे त्यांनी सांगितले.

अमोल बालवडकर यांना अखेरच्या क्षणी भारतीय जनता पक्षाने उमेदवारी नाकारल्या नंतर अमोल बालवडकर हे राष्ट्रवादी काँग्रेस पक्षाचे उमेदवार म्हणून रिंगणात उतरले होते. राज्याचे उच्च तंत्र शिक्षण मंत्री चंद्रकांत पाटील यांच्या वर आरोप करत बालवडकर यांनी प्रचारास सुरूवात केली होती. हि निवडणूक नेता विरुद्ध कार्यकर्ता असे म्हणत बालवडकर यांनी भाजप नेतृत्वाला आव्हान दिले होते. अखेर या लढतीत अमोल बालवडकर यांचा विजय झाला.

अखेरच्या फेरी पर्यंत क्षणा क्षणाला उत्सुकता वाढत चाललेल्या या लढतीत कधी भाजपचे लहू बालवडकर पुढे तर कधी राष्ट्रवादी काँग्रेसचे अमोल बालवडकर पुढे असे सुरू होते. मात्र अखेरच्या फेरी मध्ये अमोल बालवडकर यांनी 35604 मते घेत लहू बालवडकर यांचा 903 मतांनी पराभव केला. 

पुणे : पुणे महानगरपालिका निवडणूकीत रंगत निर्माण झाली असून राष्ट्रवादी काँग्रेस पक्षाचे उमेदवार अमोल बालवडकर, बाबुराव चांदेरे, गायत्री मेढे–कोकाटे, पार्वती निम्हण यांच्या सुस येथे भव्य पदयात्रेला नागरिकांचा प्रचंड आणि उत्स्फूर्त प्रतिसाद मिळाला. भगवती नगर ते भैरवनाथ मंदिरपर्यंत फुलांचा वर्षाव, घोषणाबाजी आणि मोठ्या सहभागामुळे संपूर्ण परिसरात उत्साहाचे वातावरण होते.

भगवती नगर ते भैरवनाथ मंदिरापर्यंतच्या या पदयात्रेत फुलांचा वर्षाव, जोरदार घोषणाबाजी आणि मोठ्या संख्येने नागरिकांचा सहभाग पाहायला मिळाला. संपूर्ण परिसर उत्साहाने न्हाऊन निघाला होता. कार्यकर्ते, पदाधिकारी आणि स्थानिक रहिवाशांच्या उत्साहपूर्ण सहभागामुळे हि पदयात्रा  प्रभावी ठरत आहे.

या पदयात्रेदरम्यान उमेदवारांनी नागरिकांशी थेट संवाद साधला आणि स्थानिक विकासकामे, पाणीपुरवठा, रस्ते आणि इतर मूलभूत सुविधांबाबत चर्चा केली. नागरिकांनी रस्त्याच्या दुतर्फा उभे राहून पदयात्रेचे स्वागत केले आणि प्रचाराला सकारात्मक प्रतिसाद दिला.अमोल बालवडकर यांनी नागरिकांच्या या प्रेमळ प्रतिसादाबद्दल आभार मानले आणि म्हणाले, “हा उत्साह पाहून आम्हाला अधिक जबाबदारीची जाणीव होते. प्रभागातील सर्वांगीण विकासासाठी आम्ही कटिबद्ध आहोत. 

भाजप ने ऐनवेळी उमेदवारी नाकारल्या नंतर भाजपमधून पक्षांतर करून राष्ट्रवादीत दाखल झालेले राष्ट्रवादी काँग्रेस पक्षाचे अधिकृत उमेदवार अमोल बालवडकर यांचा हा संदेश केवळ राजकीय नाही, तर कार्यकर्त्यांच्या समर्पणाला, त्यांच्या घामाला आणि अथक जिद्दीला खरा दिलाचा सलाम आहे. संदेश वाचताना अनेकांच्या डोळ्यात अक्षरशः पाणी आले, तर काहींनी कमेंट्समध्ये “तुमच्यासाठी जीवाची बाजी लावू” अशा भावना व्यक्त केल्या.

अमोल बालवडकर आपल्या संदेशात म्हणतात, “अमोल बालवडकर फाऊंडेशनचे सदस्य म्हणजे माझे कुटुंब.. या लढाईत माझ्या नावापेक्षा मोठं एकच सत्य आहे—तुमची मेहनत. उमेदवार निवडणूक लढवतो, पण तो जिंकतो तुमच्या घामावर, तुमच्या धावपळीवर, तुमच्या न थांबणाऱ्या जिद्दीवर.”ते पुढे त्यांच्या स्वतःवर झालेल्या अन्यायाचा उल्लेख करतात, पण तो अन्याय त्यांना कार्यकर्त्यांच्या खऱ्या ताकदीची जाणीव करून देतो. 

“माझ्यावर अन्याय झाला, हो. पण त्या अन्यायाने मला एक गोष्ट दिली—तुमच्या डोळ्यातला राग नाही, जिद्द दिसली. तुमच्या हातात थकवा नाही, हिम्मत दिसली. प्रत्येकाने मनाशी ठरवलंय की ‘आपण मागे हटायचं नाही.’ हेच खरं बळ आहे. दहा हत्तीचं नाही—शंभर हत्तीचं.”सकाळी लवकर उठून लोकांना भेटणारे, रात्री उशिरापर्यंत धावपळ करणारे, घरची सुख दुःख बाजूला ठेवून मैदानात उतरलेले कार्यकर्ते – हे सगळे बालवडकरांच्या डोळ्यांसमोर आहे. “हे सगळं ‘कुठल्या फायद्यासाठी?’ तर एका विश्वासासाठी—की आपल्याला न्याय मिळवायचा आहे आणि आपला प्रभाग बदलायचा आहे.

”अत्यंत भावुक शब्दांत ते कार्यकर्त्यांना आश्वस्त करतात: “एक लक्षात ठेवा ही मेहनत कधी वाया जाणार नाही. मी तुम्हा प्रत्येकाचा ऋणी आहे. तुमच्या परिश्रमांचं चीज होईल—हे वाक्य मी आश्वासन म्हणून नाही, खात्री म्हणून सांगतो. कारण तुम्ही फक्त प्रचार करत नाही आहात, तुम्ही इतिहास लिहित आहात.”शेवटी ठाम विश्वासाने ते म्हणतात, “विजय आपलाच होणार.”हा संदेश पोस्ट होताच कार्यकर्त्यांमध्ये उत्साहाची लाट उसळली. अनेकांनी कमेंट्समध्ये बालवडकरांना पाठिंबा देताना त्यांच्या भावना उफाळून आल्या. भाजपने तिकीट नाकारल्याने राष्ट्रवादीत प्रवेश केलेल्या बालवडकरांच्या या संदेशाने प्रभागातील लढत आणखी तीव्र झाली आहे. अन्यायाच्या पार्श्वभूमीवर कार्यकर्त्यांच्या या एकजुटीने आणि जिद्दीने विजय निश्चित आहे, असा विश्वास समर्थक व्यक्त करत आहेत.

अमोल बालवडकर फाऊंडेशनच्या माध्यमातून वर्षानुवर्षे सामाजिक कार्य करणाऱ्या बालवडकरांचा हा संदेश केवळ निवडणुकीपुरता मर्यादित न राहता, कार्यकर्त्यांच्या निष्ठेला आणि समर्पणाला खरी मानवंदना देणारा ठरला आहे. प्रचाराच्या अंतिम टप्प्यात हा संदेश राष्ट्रवादीच्या मोहिमेला नक्कीच भावनिक बळ देईल.