पुणे : छत्रपती शिवाजी महाराज जंयती नाचुन नाही वाचुन हा उपक्रम मोरया मित्र मंडळाच्या माध्यमातून दरवर्षी राबवण्यात येतो. यंदा ही छत्रपती श्री शिवाजी महाराज यांच्या जीवनावरील शिवचरित्र पुस्तके  विविध शाळांमध्ये भेट देऊन महाराजांचे विचार व पराक्रम नव्या पिढीपर्यंत पोहचवण्याचे काम मंडळाकडून करण्यात आले.

यावेळी शिवव्याख्याते सी ए प्रसाद मोरे यांनी आपल्या व्याख्यानाच्या माध्यमातून छत्रपती शिवाजी महाराज यांचे विचार विद्यार्थ्यांपर्यंत पोहचवले. शिवचरित्र विद्यार्थ्यांसाठी कायम प्रेरणादायी राहणार असून विद्यार्थ्यांनी शिवचरित्र वाचले पाहिजे. शिवचारित्राचा अभ्यास करून विद्यार्थ्यांनी ते आत्मसात केले पाहिजे आणि शिवाजी महाराजांना आदर्श त्यांनी डोळ्यासमोर ठेवला पहिजे असे ते म्हणाले.

मोरया मित्र मंडळाच्या वतीने  कर्वेनगर भागातील, पोलीस अधिकारी, प्रशासकीय अधिकारी, आणि वारजे पुल ते डेक्कन भागामधील ४० शाळांमध्ये जाऊन  छत्रपती श्री शिवाजी महाराज यांच्या जीवनावरील शिवचरित्र पुस्तके भेट देण्यात आली.

ह्या कार्यक्रमाचे आयोजन मंडळाचे संस्थापक केदार वसंत मारणे यांनी केले होते. यावेळी ते म्हणाले मोरया मित्र मंडळ सतत सामाजिक उपक्रम राबवत असते. गेल्या काही वर्षापासून शिवाजी महाराज जयंती नाचून नाही वाचुन साजरी करावी हि संकल्पना पुढे आली आणि मंडळाने ती उत्स्फूर्त राबवली. शिवाजी म्हणजे
शि म्हनजे शिका
वा म्हनजे वाचा
जी म्हनजे जिंका
म्हणून शिक्षण घेणाऱ्या मुलांना शिवाजी महाराज कळावे म्हणून आम्ही ही पुस्तके त्याच्या पर्यंत पोहचवत आहोत. आम्हाला शिवछत्रपती आणि संभाजी महाराजांच्या विचारांची पिढी निर्माण करायची आहे. विद्यार्थ्यांवर संस्कार व्हावेत म्हणून आम्ही हा उपक्रम राबवत आहे. शिवचरित्र हे प्रेरणादायी आहे. भविष्यात विद्यार्थी शिवचरित्राचं वाचणं केल्यानंतर जग जिंकल्या शिवाय राहणार नाही असे वाटते.

ही पुस्तके भारतीय इतिहास संशोधक मंडळ सभासद मंगेश नवघणे, व्याख्याते प्रसाद जी मोरे, मयुर बनकर, राहुल विभुते यांच्या हस्ते देण्यात आली. यावेळी सिनेअभिनेत्री पायल गणपत जाधव, डी.सी.पी संभाजी कदम, मंडळाचे अध्यक्ष अथर्व भरम, अमृत मारणे, रोहिदास जाधव, संदिप शितोळे, प्रमोद वारशेट्टी, अनिल कडू, गणेश शिंदे ,विजय औजी, ब्रम्हानंद टाक , कैलास सरतापे आणि मुख्याध्यापक, शिक्षक उपस्थित होते.

कर्वेनगर : कर्वेनगर मधील नदी पात्रालगत असणाऱ्या १२० फुटी डीपी रस्त्यावर राजाराम पूल ते दुधाने लॉन्स परिसरात वाढलेली लोकवस्ती, व्यायामासाठी येणारे नागरिक आणि या रस्त्यावर असणारा तरुण तरुणींचा वावर या सर्वांचा विचार करता सुरक्षेच्या दृष्टिकोनातून ठोस आणि कायमस्वरूपी उपाययोजनेसाठी नगरसेवक स्वप्नील दुधाने यांनी पुणे पोलिस आयुक्तांकडे महत्वाची मागणी केली आहे.

कर्वेनगर हद्दीमधील नदी पात्रालगत असणाऱ्या १२० फुटी डीपी रस्ता परिसरात पोलीस चौकी करण्याची मागणी स्वप्नील दुधाने यांनी पुणे पोलिस आयुक्त अमितेश कुमार यांच्याकडे केली आहे. दुधाने यांनी अमितेश कुमार यांची भेट घेऊन या संदर्भात चर्चा केली असून पोलीस चौकीच्या मागणीच्या संदर्भातील निवेदन त्यांना दिले आहे.   या भागातील नागरिकांच्या सुरक्षेच्या दृष्टिकोनातून स्वप्नील दुधाने यांनी घेतलेली भूमिका आणि केलेली मागणी म्हणजे एक महत्वपूर्ण पाऊल आहे. या परिसरात पोलीस चौकी झाल्यानंतर या भागातील नागरिकांच्या सुरक्षेचा महत्वाचा प्रश्न मार्गी लागणार आहे.

नगरसेवक स्वप्नील दुधाने म्हणाले, या परिसरात लोकवस्ती वाढत असून परिसराचा विकास झपाट्याने होत आहे. यामुळे परिसरात कायदा व सुव्यवस्था राखणे नागरिकांच्या सुरक्षिततेच्या दृष्टीने महत्वाचे आहे. या परिसरापासून पोलीस चौकी जवळ नसल्याचा फटका नागरिकांना बसत आहे. आपत्कालीन परिस्थिती आली असता ज्येष्ठ नागरिक, स्त्री वर्ग तसेच सर्वसामान्य नागरिकांना गैरसोयीचा सामना करावा लागत असून नियमित गस्त आणि तक्रारीवर उपाययोजना करण्यामध्ये पोलीस बांधवांवरही तणाव दिसून येतो.

यावर उपाययोजना म्हणून सदर परिसरात नव्याने पोलीस चौकी उभारण्यात यावी, अशी मागणी करणारे निवेदन आज पुणे शहर पोलीस आयुक्त अमितेश कुमार यांना सुपूर्द करण्यात आले. याप्रसंगी परिस्थितीचे गांभीर्य लक्षात घेता त्यांनीही सकारात्मक प्रतिसाद दिला असून लवकरच नागरिकांच्या सुरक्षिततेला प्राधान्य देत कार्यवाही करण्याचा शब्द दिला असल्याचे दुधाने यांनी सांगितले.

कर्वेनगर : कर्वेनगर मधील मोरया मित्र मंडळामध्ये गणेश जन्म सोहळा उत्साहात संपन्न झाला. होम हवन, महाआरती, महाप्रसाद, अशी विधिवत पूजा करत मंडळाच्या वतीने सर्वांना गणेश जयंतीच्या शुभेच्छा देण्यात आल्या. यावेळी महिलांसाठी हळदीकुंकू समारंभ आयोजित करण्यात आला होता. 

यावेळी मंडळाचे जेष्ठ नागरिक निजाप्पा वाघमारे, सुभाष भवर, शिवाजी बोरकर, महादेव शिनगारे यांच्या हस्ते नवनिर्वाचित नगरसेवक स्वप्नील दुधाने यांचा पुस्तक, शाल श्रीफळ देऊन नागरी सत्कार करण्यात आला. स्वप्नील दुधाने म्हणाले, मोरया मित्र मंडळ हे संस्कृती जोपासणारे मंडळ असून ते सामाजिक भान जपत सातत्याने नवनवीन उपक्रम राबवत असते, त्यामुळे कायमच मंडळाच्या कामाचे कौतुक वाटते.

” हळदकुंकू हा समारंभ प्रेम, आनंद व सकारात्मकतेचा संदेश देतो. तिळगुळाच्या गोडव्याप्रमाणे आपल्या भागातील नागरीकांचे नातेही गोड राहो, आपापसातील प्रेम आणि सलोखा वाढत राहण्यासाठी, सुखी आणि समृद्ध आयुष्यासाठी सर्व एकत्र येऊन नवीन वर्षाची सुरुवात नवचैतन्यात करावी म्हणून ह्या हळद कुंकू समारंभाचे दरवर्षी मोरया मित्र मंडळाच्या वतीने आयोजित करण्यात येते असे प्रतिपादन कार्यक्रमाचे आयोजक मोरया मित्र मंडळ संस्थापक केदार वसंत मारणे यांनी यावेळी केले.

यावेळी माजी नगरसेविका लक्ष्मी दुधाने, विजय खळदकर, संगिता बराटे, निवेदिता जोशी,शैलेश जोशी,समिता थोरवे मंडळाच्या कमल गायकवाड, स्वाती दारवटकर, संगिता भरम, रेणुका जावळे, सुरेखा जोशी, वर्षा शिगवन, मनिषा जावळे , ललिता नवघणे, अंजली साकळे, उपस्थित होते.

पुणे : पुणे महापालिका निवडणुकीसाठी आज अर्ज मागे घेण्याच्या शेवटच्या दिवशी कर्वेनगर, हिंगणे होम कॉलनी प्रभाग क्रमांक 30 मध्ये लक्ष लागले होते ते राष्ट्रवादी काँग्रेस पक्षाकडून उमेदवारी कापण्यात आलेल्या तेजल दुधाने नक्की काय भूमिका घेणार याकडे..मात्र तेजल दुधाने यांनी माघार न घेता आपला उमेदवारी अर्ज कायम ठेवत क गटातून अपक्ष निवडणूक लढवणार असल्याचे निश्चित केले आहे. त्यांच्या या निर्णयामुळे कर्वेनगर मधील निवडणूक रंगतदार होणार असल्याचे चित्र स्पष्ट झाले आहे.

तेजल दुधाने अपक्ष निवडणूक लढवणार असल्याने त्या लढत असलेल्या क गटातच नाही तर संपूर्ण प्रभाग क्रमांक ३० कर्वेनगर, हिंगणे होम कॉलनी मधील निवडणुकीवर त्याचे परिणाम दिसून येतील असे बोलले जात आहे. तेजल दुधाने मागील अनेक वर्षापासून या प्रभागातून निवडणूक लढवण्यासाठी तयारी करत होत्या. आपल्या सामाजिक आणि राजकीय कार्यातून त्यांनी आपली ओळख निर्माण केली असून त्यांच्या पाठीमागे मोठे महिला संघटन आहे. राष्ट्रवादी काँग्रेस पक्षाचे दोन भाग झाल्यानंतर त्या उपमुख्यमंत्री अजित पवार यांच्या राष्ट्रवादी काँग्रेस पक्षाबरोबर राहिल्या होत्या. राष्ट्रवादी काँग्रेस पक्षाच्या त्या या भागातील ओळख होत्या. अर्ज भरण्याच्या शेवटच्या क्षणापर्यंत त्यांची राष्ट्रवादी काँग्रेस पक्षाकडून उमेदवारी निश्चित मानली जात होती, मात्र ऐनवेळेस त्यांची उमेदवारी कापण्यात आली.

उमेदवारी कापण्यात आल्यानंतर त्यांनी घेतलेला मेळाव्यात कर्वेनगर मधील अनेक महिला व नागरिकांनी उपस्थित राहून त्यांना पाठिंबा दर्शवला होता तर अनेक महिलांच्या डोळ्यात अश्रू पाहायला मिळाले होते. या मेळाव्यानंतर त्या अपक्ष निवडणूक लढवणार असल्याचे मानले जात होते आणि आज अर्ज माघार घेण्याचे दिवशी त्यांनी आपला उमेदवारी अर्ज कायम ठेवल्याने त्या अपक्ष उमेदवार असणार आहेत यावर शिक्कामोर्तब झाला आहे.

तेजल दुधाने अपक्ष निवडणूक लढवत असलेल्या क गटात भाजप कडून तेजश्री महेश पवळे, राष्ट्रवादी काँग्रेस पक्षाकडून निवेदिता शैलेश जोशी, शिवसेनेकडून प्रतीक्षा जावळकर, राष्ट्रवादी काँग्रेस (शरदचंद्र पवार) पक्षाकडून मनिषा विरेश शितोळे, काँग्रेस- मनसे- शिवसेना (उबाठा) आघाडी कडून वैशाली दिघे या महिला उमेदवार निवडणुकीच्या रिंगणात आहेत. तेजल दुधाने यांच्या अपक्ष उमेदवारी मुळे या गटातील निवडणूक चुरशीची होणार असल्याची चर्चा कर्वेनगर परिसरात आहे.

कर्वेनगर : राजकीय घडामोडींनी प्रभाग क्रमांक ३० कर्वेनगर हिंगणे होम कॉलनी व ३२ वारजे पॉप्युलरनगर मधील राजकीय वातावरण आज ढवळून निघाले. उमेदवारी अर्ज भरण्याच्या आजच्या शेवटच्या दिवशी अनेक अनपेक्षित राजकीय उपथापालथ पाहायला मिळाली. कुणाची उमेदवारी कापण्यात आली तर कोणी दुसऱ्या पक्षात प्रवेश घेत उमेदवारी मिळवली. तर कोणी वेगळा पॅनल बनवला.  युती, आघाडीच्या गोंधळात राजकीय समीकरणे जुळवत उमेदवारांनी आज उमेदवारी अर्ज दाखल केले. दाखल झालेले उमेदवारी अर्ज पाहता प्रभाग ३० कर्वेनगर हिंगणे होम कॉलनी व ३२ वारजे पॉप्युलरनगर मध्ये तुल्यबळ लढती पाहायला मिळणार आहेत.

प्रभाग 30 कर्वेनगर, हिंगणे होम कॉलनी प्रभागात आज सुरवातच राष्ट्रवादीतून आलेल्या मोठ्या अनपेक्षित बातमीने झाली. या प्रभागात राष्ट्रवादी पक्षाकडून उमेदवारीसाठी महिला गटातून दावेदार असणाऱ्या तेजल दुधाने यांची उमेदवारी कापण्यात आली आणि या बातमीने राजकीय वातावरण ढवळून निघाले. कालपर्यंत उमेदवारी निश्चित मानली जात असताना काल रात्रीत घडलेल्या घडामोडींनी तेजल दुधाने यांच्या उमेदवारीवर गदा आली. त्यामुळे त्यांच्या समर्थकांमध्ये नाराजी पसरली . भाजप शिवसेना युती न झाल्याने शिवसेनेचा ही पॅनल तयार झाला आहे. त्यामुळे भाजप, राष्ट्रवादी काँग्रेस, शिवसेना, काँग्रेस- शिवसेना- मनसे आघाडी असे चार पॅनल या प्रभागात तयार झाले आहेत. भाजपचे विनोद मोहिते यांना शिवसेनेकडून उमेदवारी देण्यात आली आहे तर मनसेचे शैलेश जोशी यांनी राष्ट्रवादी काँग्रेस पक्षाकडून महिला गटात पत्नी निवेदिता जोशी यांच्यासाठी उमेदवारी मिळवली आहे. तर राष्ट्रवादी काँग्रेस (शरदचंद्र पवार) पक्षातून मनिषा विरेश शितोळे यांना उमेदवारी मिळाली आहे.

प्रभाग क्रमांक ३० मध्ये 

भाजप :  गट अ सुशील मेंगडे, गट ब रेश्मा संतोष बराटे, गट क तेजश्री महेश पवळे, गट ड राजाभाऊ बराटे

राष्ट्रवादी काँग्रेस : गट अ  स्वप्निल दुधाने, गट ब संगीता बराटे, क गट निवेदिता शैलेश जोशी, गट ड विजय खळदकर, 

शिवसेना (शिंदे) गट अ विनोद मोहिते, गट ब मानसी गुंड,            गट क प्रतीक्षा जावळकर, गट ड प्रणव थोरात

राष्ट्रवादी काँग्रेस (शरदचंद्र पवार) : क गट मनिषा विरेश शितोळे,

काँग्रेस शिवसेना मनसे : गट अ मोहित बराटे, गट ब सुनिता विष्णू सलगर, गट क वैशाली दिघे,  गट ड सचिन विप्र

प्रभाग क्रमांक ३२ वारजे, पॉप्युलरनगर

या प्रभागात भाजप आणि राष्ट्रवादी काँग्रेस पक्षात सरळ लढत पाहायला मिळणार आहे वर्षं वर्ष राष्ट्रवादीचा बालेकिल्ला म्हणून या प्रभागाकडे पाहिले जाते. ह्या प्रभागाला सुरुंग लावण्याचा प्रयत्न भाजपाकडून करण्यात आला असून राष्ट्रवादी काँग्रेसचे माजी नगरसेवक फोडून भाजपने त्यांना आपल्या पक्षातून उमेदवारी दिली आहे. परंतु हे करत असताना भाजप पक्षाचे काम करणारे कार्यकर्ते व पदाधिकारी यांच्यात नाराजी पसरली आहे. भाजपच्या मतदारांमध्ये ही याबाबत चर्चा आहे. या घडामोडीत भाजपचे किरण बारटक्के यांना राष्ट्रवादी काँग्रेस पक्षातून उमेदवारी जाहीर करण्यात आली आहे. कालच बारटक्के अजित पवार यांची भेट घेतली होती तेव्हाच ते राष्ट्रवादीत येतील असे  बोलले जात होते. काँग्रेसचे सचिन बराटे यांनीही राष्ट्रवादी काँग्रेसमध्ये प्रवेश करत उमेदवारी घेतली आहे. राष्ट्रवादी काँग्रेस पक्षातील माजी नगरसेवक भाजपमध्ये गेल्याने पक्षाचे खडकवासला मतदारसंघाचे अध्यक्ष व माजी नगरसेवक बाबा धुमाळ यांनी चांगला पॅनल बनावट बनवत भाजप समोर आव्हान उभे केले आहे.

राष्ट्रवादी काँग्रेस : अ गट अश्विनी किशोर कांबळे, ब गट किरण बारटक्के, क गट दिपाली धुमाळ, ड गट सचिन बराटे

भाजप : अ गट हर्षदा भोसले, ब गट भारतभूषण बराटे, क गट सायली वांजळे, ड गट सचिन दोडके

मनसे : अ गट अनुसूचित प्रवर्ग केशर सोनवणे, ब गट गणेश धुमाळ, क गट भाग्यश्री दांगट, ड गट रियाज शेख

शिवसेना शिंदे गट : गट अ दीपाली धिवार, ड गट अजय भलशंकर

आप पक्ष :  निलेश वांजळे, क गट सुरेखा भोसले

समाजवादी पक्ष :  ड गट विनायक लांबे

कर्वेनगर : काँग्रेस पक्षाचे कोथरूड मतदार संघाचे माजी अध्यक्ष व मैत्री प्रतिष्ठानचे अध्यक्ष विजय खळदकर यांनी आज उपमुख्यमंत्री अजित पवार यांच्या उपस्थितीत राष्ट्रवादी काँग्रेस पक्षामध्ये प्रवेश केला. विजय खळदकर यांच्या पक्षातील प्रवेशामुळे राष्ट्रवादी काँग्रेस पक्षाची कर्वेनगर भागातील ताकद वाढली असून होत असलेल्या महापालिका निवडणुकीत त्याचा पक्षाला फायदा होणार असल्याचे दिसत आहे.

विजय खळदकर यांची गेले अनेक दिवसांपासून पक्षांतराची चर्चा सुरू होती, आज अखेर त्यांचा राष्ट्रवादी काँग्रेस पक्षात प्रवेश पार पडला आहे. होऊ घातलेल्या पुणे महापालिका निवडणुकीत कर्वेनगर प्रभाग 30 मध्ये खळदकर यांच्या प्रवेशामुळे राष्ट्रवादी काँग्रेस पक्षाचे बळ वाढले आहे. दोन्ही राष्ट्रवादी काँग्रेस ही निवडणुकीत एकत्र येऊन लढवणार असल्याचे  निश्चित झाले असल्याने या प्रभागात भाजपच्या विरोधात राष्ट्रवादी काँग्रेसचा तगडा पॅनल पाहायला मिळणार आहे.

प्रभागातील नागरिकांचा सर्वांगीण विकास आणि त्यांच्या समस्या प्रभावीपणे सोडवता याव्यात, या उद्देशाने मी राष्ट्रवादी काँग्रेस पक्षामध्ये प्रवेश केला आहे. राष्ट्रवादी काँग्रेस पक्षाने माझ्यावर दाखवलेला विश्वास ही मोठी जबाबदारी असून, तो विश्वास प्रामाणिकपणे, निष्ठेने आणि पूर्ण क्षमतेने पार पाडण्याचा निर्धार केला असून जनतेच्या प्रश्नांसाठी सातत्याने लढत राहून, विकासकामांच्या माध्यमातून पक्षाचा आणि नेतृत्वाचा विश्वास सार्थ ठरवण्यासाठी कटिबद्ध राहीन अशी भावना विजय खळदकर यांनी पक्ष प्रवेशानंतर व्यक्त केली आहे.

कर्वेनगर : कर्वेनगर मधील वडार वस्ती श्रमिक वसाहतीमध्ये दोन दिवसापूर्वी अचानक पोलीस फौज फाट्यासह एसआरए, अधिकारी आणि विकासाचे कर्मचारी यांनी सर्वे सुरू केल्याने तणाव निर्माण झाला होता. तसेच रहिवाशांमध्ये भीतीचे वातावरण निर्माण झाले होते.  नागरिकांच्या रोषणानंतर त्या दिवशी सर्व्हे थांबवण्यात आला. याच पार्श्वभूमीवर राष्ट्रवादी काँग्रेस (श.प.)कोथरूड मतदार संघाचे अध्यक्ष स्वप्निल दुधाने यांनी अधिकाऱ्यांशी भेट घेऊन चर्चा केली आहे.

या संदर्भात आज स्वप्नील दुधाने यांनी झोपडपट्टी पुनर्वसन प्राधिकरण-पुणे क्षेत्राचे मुख्य कार्यकारी अधिकारी सतीशकुमार खडके आणि त्यांच्या अखत्यारीत कार्यरत असणाऱ्या उपजिल्हाधिकारी तथा सक्षम प्राधिकारी अधिकारी क्र. २ मा. अर्चना यादव यांची भेट घेतली आणि या प्रश्नावर सविस्तर चर्चा केली.

नागरिक सदर ठिकाणी गेल्या अनेक वर्षांपासून वास्तव्यास असून त्यांचा सदर उपक्रमास विरोध आहे. यामुळे नागरिकांचे हक्क आणि भविष्य सुरक्षित राखण्यासाठी नागरिकांच्या संपूर्ण संमतीविना कोणतीही कार्यवाही केली जाऊ नये, अशी मागणी  स्वप्नील दुधाने यांनी अधिकाऱ्यांकडे केली तसेच यावर सकारात्मक विचार न झाल्यास प्रशासनाला नागरिकांच्या रोषास सामोरे जावे लागेल, असा इशारा ही त्यांनी दिला.

याप्रसंगी अधिकारी वर्गानेही सकारात्मक प्रतिसाद दिला असून  नागरिकांच्या या लढाईत आम्ही त्यांच्यासोबत असून त्यांच्या हक्कांसाठी सदैव कटिबद्ध आहोत असे स्वप्नील दुधाने यांनी म्हंटले आहे.

अमोल साबळे

पुणे महापालिकीचा निवडणूक कार्यक्रम येत्या काही दिवसात जाहीर होईल. या निवडणुकीसाठी प्रभाग निहाय आरक्षणे जाहीर झाल्यापासून राजकीय घडामोडींना वेग आला आहे. प्रभागातील इच्छुक उमेदवार कोणत्या गटातून निवडणूक लढवायची आहे याची चाचपणी करून तयारीला लागलेला आहे. कर्वेनगर हिंगणे होम कॉलनी या प्रभाग क्रमांक 30 मध्ये राजकीय डावपेच आखले जात असून पक्षांतर्गत व पक्ष विरोधी प्रतिस्पर्ध्याला कसं नामोहरम करायचं याची रणनीती प्रत्येक जण तयार करताना दिसत आहे. पडद्यामागे अनेक घटना घडत असून त्याची चर्चा रंगताना दिसत आहे. पक्षांतराच्या चर्चा ही जोरात सुरू आहेत. अद्यापपर्यंत युती आघाड्यांचे चित्र स्पष्ट झाले नसले तरी इच्छुक उमेदवार मात्र कोणत्याही परिस्थितीत निवडणूक लढवण्याच्या तयारीत आहे.

आपला पॅनल चांगला व्हावा यासाठी मातब्बर काय खेळी खेळत आहेत आणि कोणाच्या डोक्यात काय सुरू आहे याचा अंदाज लावत उमेदवारीसाठी इच्छुक असणारा कार्यकर्ता वाटचाला करत आहे. प्रभाग या क्रमांक 30 कर्वेनगर मध्ये  अ) OBC,  ब)सर्वसाधारण महिला, क) सर्वसाधारण महिला आणि ड) सर्वसाधारण असं आरक्षण जाहीर झालेलं आहे. 2017 च्या आरक्षणाप्रमाणेच हे आरक्षण पडले आहे. त्यामुळे 2017 ला जे नगरसेवक निवडून आले होते ते पुन्हा त्याच गटातून निवडणूक लढवतील असे वाटत असताना काही माजी नगरसेवकांनी आपले गट वेगळे जाहीर केल्याने पुढे जाऊन निवडणुकीचे चित्र काय असणार आहे हे स्पष्ट होत आहे. 2017 ला झालेल्या निवडणुकीत या प्रभागातून भाजपचे राजाभाऊ बराटे, सुशील मेंगडे, वृषाली चौधरी तर राष्ट्रवादी काँग्रेसच्या लक्ष्मी दुधाने निवडून आल्या होत्या म्हणजे भाजपचे ३ व राष्ट्रवादी काँग्रेसचा एक नगरसेवक असे पक्षीय बलाबाल होते. मोदी लाटेतही आघाडीच्या उमेदवारांना या प्रभागात चांगली मते मिळाली होती.

2017 च्या महापालिका निवडणुकीत कोणाला किती मते मिळाली…
2017 मध्ये झालेल्या निवडणुकीत अ  गटासाठी नागरिकांचा मागास हे आरक्षण होते या गटात भाजपचे सुशील मेंगडे  16 हजार 835 मते मिळवत विजयी झाले होते तर राष्ट्रवादी काँग्रेसचे विनोद मोहिते हे 8 हजार 612 मते मिळवत दुसऱ्या क्रमांकावर होते. तर शिवसेनेचे सचिन थोरात यांना 3916, मते,  महाराष्ट्र नवनिर्माण सेनेचे उमेदवार संजय नांगरे यांना 3713 मते मिळाली होती.

सर्वसाधारण जागेसाठी ब गटातून राष्ट्रवादी काँग्रेस पक्षाच्या लक्ष्मी दुधाने यांना 14,942  मते मिळाली होती. त्या विजयी झाल्या होत्या. भाजपच्या रोहिणी भोसले यांना 14,361 ही दुसऱ्या क्रमांकाची मते मिळाली होती. क गटामधून भाजपच्या  वृषाली चौधरी 15543 मध्ये मिळाली होती. तर राष्ट्रवादी काँग्रेस पक्षाच्या रेश्मा बराटे यांना 10842 मते मिळवत दुसऱ्या क्रमांकावर राहिल्या होत्या. शिवसेनेच्या वैशाली दिघे यांना 3256 तर मनसेच्या सुरेखा मकवान यांना 2737 मते मिळाली होती.

ड गटातून भाजपचे राजाभाऊ बराटे 17060 मते मिळवून विजयी झाले होते तर काँग्रेस पक्षाचे विजय खळदकर यांना 9713 मते मिळवत दुसऱ्या क्रमांकावर राहिले होते. मनसेच्या कैलास दांगट यांना 3541 शिवसेनेच्या मयूर वांजळे यांना 2763 मते मिळाली होती.

2017 च्या महापालिका निवडणुकीत मोदी लाट असतानाही  आघाडीच्या उमेदवारांना मिळालेले मतदान उल्लेखनीय होते. त्यामुळे या प्रभागाला केवळ भाजपचे वर्चस्व असणारा प्रभाग असे म्हणता येणार नाही. या प्रभागाचा भौगोलिक विचार केला तर कर्वेनगर गावठाण, वडार वस्ती, हिंगणे होम कॉलनी, आकाशनगर, इंगळेनगर, मातोश्री कॉलनी, शाहू कॉलनी, कॅनॉल वरील गल्ल्या, मावळेआळी, श्रीमान सोसायटी, वेदांत कॉलनी, कुलश्री सोसायटी, सहवास सोसायटी असा संमिश्र भाग येतो. त्यामुळे भाजपला फॉर असणारा हा प्रभाग आहे असे म्हणता येणार नाही. सोसायट्या, बैठी घरे असलेल्या वसाहती, आणि वस्ती विभाग समाविष्ट असलेल्या या प्रभागात वैयक्तिक जनसंपर्क, केलेली कामे, आणि पक्षाला मानणारा वर्ग यात जमेची बाजू ठरणारे उमेदवार बाजी मारू शकतील.

युती आणि आघाडीचे चित्र अस्पष्ट आहे. राष्ट्रवादी काँग्रेस आणि  शिवसेना यांचे दोन भाग झाले आहे. या निवडणुकीसाठी दोन्ही राष्ट्रवादी काँग्रेस पुन्हा एकत्र येण्याची चर्चा आहे. मनसे आणि उद्धव ठाकरेंची शिवसेना एकत्र निवडणूक लढवण्याबाबत हालचाली सुरू आहेत. यात एकनाथ शिंदेंची शिवसेना आणि भाजप यांची युती होणार का ? आणि काँग्रेस काय भूमिका घेणार या सर्व गोष्टी येणाऱ्या काही दिवसात स्पष्ट होतील. महापालिका निवडणूक महायुती एकत्र लढेल असे मुख्यमंत्री देवेंद्र फडणवीस यांनी नुकतेच म्हंटले असले तरी अधिकृत काही जाहीर झालेले नाही. त्यामुळे या पुढे घडणाऱ्या  राजकीय समीकरणातून पुढील चित्र स्पष्ट होईल.

सध्या मात्र या प्रभागात भाजप आणि राष्ट्रवादी काँग्रेस आणि राष्ट्रवादी काँग्रेस (शरद पवार) पक्ष यांच्या जोरदार राजकीय हालचाली सुरू आहेत. राष्ट्रवादी काँग्रेसचे दोन्ही पक्ष एकत्र झाल्यास या प्रभागात भाजपसमोर मोठे आव्हान उभे असेल. काँग्रेसला मानणारा मतदार ही या प्रभागात आहे. 2017 ला झालेल्या निवडणुकांनंतर आज 2025 पर्यंत म्हणजे साधारण 8 वर्षाच्या कालावधीत बऱ्याच राजकीय, सामाजिक घडामोडी घडलेल्या आहेत. त्या परिणामांचा विचारही करावा लागणार आहे. भाजप पक्षात इतर पक्षातील पदाधिकाऱ्यांच्या प्रवेशाच्या चर्चा आहेत. त्याचबरोबर उमेदवारी नाही मिळाल्यास इच्छुक कार्यकर्ते इतर पक्षाचा पर्याय निवडू शकतात. त्यात दोन्ही शिवसेना, मनसे यांनाही तगडे उमेदवार मिळू शकतात त्यामुळे लढतीचे खरे चित्र उमेदवारी वाटपानंतरच स्पष्ट होईल.

या निवडणुकीसाठी इच्छुक असलेले उमेदवार
भाजप :  राजाभाऊ बराटे, सुशील मेंगडे, विनोद मोहिते, विठ्ठल बराटे, महेश पवळे, वृषाली चौधरी, एकता रामदासी, मानसी गुंड

राष्ट्रवादी काँग्रेस (शरदचंद्र पवार): लक्ष्मी दुधाने, स्वप्नील दुधाने, ॲड. नीता शिंदे, प्रमोद शिंदे, पल्लवी शेडगे, विष्णुपंत सरगर, सुनीता सरगर,

राष्ट्रवादी काँग्रेस अजित पवार : तेजल दुधाने, संगीता बराटे, आनंद तांबे, मोहित बराटे

मनसे : शैलेश जोशी, सचिन विप्र, अशोक कदम, आनंद पाटील

काँग्रेस : शारदा वीर, योगेश नायडू, बालाजी शिंदे

शिवसेना (उद्धव बाळासाहेब ठाकरे) दिनेश बराटे, वैशाली दिघे, नंदू घाटे, अजय भुवड

शिवसेना : सचिन थोरात, प्रतीक्षा जावळकर,

तसेच विजय खळदकर, संतोष बराटे, चेतन भालेकर, विरेश शितोळे यांच्याकडूनही निवडणुकीची तयारी सुरू असून ते कोणत्या पक्षाकडून उमेदवारी घेणार याबाबतची त्यांची भूमिका अजून गुलदस्त्यात आहे.

कर्वेनगर : कर्वेनगर मधील वडारवस्ती, श्रमिक वसाहतीमध्ये आज अचानक झोपडपट्टी पुनर्वसन प्रकल्प (एस आर ए) सर्व्हेसाठी पोलिस बंदोबस्तात एसआरए अधिकारी व बिल्डरची लोक आल्याने मोठा गोंधळ उडाला. स्थानिक नागरिकांकडून या सर्व्हेला व घर क्रमांक देण्याच्या कामाला प्रचंड विरोध करण्यात आला. 

कर्वेनगरमधील वडारवस्ती, श्रमिक वसाहतीच्या झोपडपट्टी पुनर्वसन प्रकल्पाचे काम गेली अनेक वर्ष चर्चेत आहे. काही महिन्यांपूर्वी  या कामाला विरोध करणारे फ्लेक्स या भागात लावण्यात आल्याने पुन्हा हा विषय चर्चेत आला होता. या वस्तीमध्ये झोपडपट्टी धारकांचे आग्रिमेंट करण्याचे काम गेले अनेक वर्ष चालू आहेत त्यातही अनेक गोंधळ असल्याचे सातत्याने चर्चेतून पुढे आले आहे.

आज सकाळी अचानक एसआरए अधिकारी व बिल्डर ची लोक मोठ्या पोलिस फौज फाट्यासह वस्त्यांमध्ये घुसल्याने नागरिकांमध्ये भीतीचे वातावरण निर्माण झाले होते. मात्र मोठ्या संख्येने नागरिकांनी रस्त्यावर उतरत याला विरोध केला. यामुळे वातावरण चिघळले होते. स्थानिक लोकप्रतिनिधी सुशील मेंगडे, विनोद मोहिते, राजाभाऊ बराटे, यांनी वस्तीत येऊन सुरू असलेला सर्व्हे थांबवला. त्यामुळे निर्माण झालेली तणावपूर्ण परिस्थिती निवळली.

विनोद मोहिते म्हणाले की, कोणती नोटीस, किंवा पूर्वसूचना न देता पोलिसांना घेऊन ही लोकं वस्तीमध्ये कसे घुसू शकतात. त्यांना वस्तीत दहशतीचे वातावरण निर्माण करायचे होते का ? या प्रकारामुळे नागरिकांमध्ये भीतीचे वातावरण निर्माण झाले आहे. हे नेमकं कशासाठी करण्यात आलं. यामागे कोणाचा विशेष हेतू आहे का असा प्रश्न यामुळे निर्माण होत आहे.

कर्वेनगर : मोरया मित्र मंडळाच्या वतीने दुर्गम भागात शालेय साहित्य वाटप करण्यात आले. मोरया मित्र मंडळाने या वर्षी सार्वजनिक गणेशोत्सव काळात तुमचे शैक्षणिक दान ठरेल विद्यार्थांसाठी योगदान हा उपक्रम राबविला होता. मंडळाने एक आवाहन केले होते, श्री गणेश चरणी कोणत्याही प्रकारचा प्रसाद, हार, नारळ, पेढे अर्पण न करता वही, पेन, दप्तर, शालेय साहित्य अर्पण करावे. या आवाहनाला उत्स्फूर्त प्रतिसाद नागरिकांकडून मिळाला होता.

मंडळाने केलेल्या आवाहनानंतर भरपूर प्रमाणात वह्या, पुस्तके, दप्तर, कपडे जमा झाले. ते सर्व साहित्य मुळशी तालुक्यातील दुर्गम भाग भोईनी, मुगाव ,गडले ह्या भागात वाटप करण्यात आले. यावेळी मुलांना पहिली ते चौथी मुलांसाठी चित्रकला वही, इंग्रजी अंक,अक्षर सरावासाठी पुस्तके, दप्तर, पेन, पेन्सिल, कपडे, रंग पेटी इत्यादी साहित्य वाटप करण्यात आले.

यावेळी मोरया मित्र मंडळ संस्थापक केदार वसंत मारणे म्हणाले, विद्यार्थ्यांनी मोबाईलचा वापर टाळला पाहिजे व वाचनावर भर दिला पाहिजे.  विद्यार्थ्यांनी जिज्ञासा, धैर्य, एकाग्रता, ठेवल्यास त्यांना निश्चित यश संपादन करता येते.  विविध प्रकारच्या परिक्षेत यश संपादन करायचे असेल तर आत्मविश्वास, जिद्द आणि कठोर मेहनत करणे आवश्यक आहे. 

यावेळी खारवडे श्री म्हसोबा देवस्थान ट्रस्टचे विश्वस्त संभाजी गावडे म्हणाले  मोरया मित्र मंडळाचे  कार्य कौतुकास्पद आहे. मंडळ कोणताही डिजे न लावता धांगडधिंगा न करता छत्रपती शिवाजी महाराज यांच्या विचारांवर काम करते. मंडळाचे सर्वच कार्यक्रम  महाराष्ट्र राज्यात पोहचले आहे.

यावेळी इतिहास संशोधन मंडळ अजीवन सदस्य मंगेश नवघणे, खारवडे म्हसोबा देवस्थान ट्रस्ट विश्वस्त संभाजी गावडे, समीर राऊत , भोईणी ग्रां.प विद्यमान सरपंच अलका संतोष झोरे, माजी सरपंच सुनील झोरे,  माजी ग्रामपंचायत सदस्य लक्ष्मण झोरे,  विद्यमान उपसरपंच विशाल झोर, मुगाव/कोळोशी/गडले ग्रुप ग्रां.प विद्यमान उपसरपंच मुगाव मारुती कोकरे, तंटामुक्ती अध्यक्ष पोपटराव पासलकर, संतोष झोरे, शिक्षक सागर शिंदे उपस्थित होते.