पुणे : पंतप्रधान नरेंद्र मोदी यांच्या वाढदिवसानिमित्त कोथरुड भाजपच्या वतीने एसएनडीटी मेट्रो स्थानक परिसरात दिवे प्रज्वलित करून दिवाळीचा उत्साह साजरा करण्यात आला. हजारो दिव्यांनी संपूर्ण मेट्रो स्थानक परिसर उजळून निघाला होता. यावेळी “मोदीजी, आप देश का विकास करो, हम आपके साथ हैं!” अशा घोषणांनी परिसर दणाणून गेला.

या कार्यक्रमाला राज्याचे उच्च व तंत्र शिक्षणमंत्री आणि कोथरुडचे आमदार चंद्रकांत पाटील, माजी केंद्रीय मंत्री प्रकाश जावडेकर, भाजप पुणे शहर सरचिटणीस आणि सेवा पर्व संयोजक सुशील मेंगडे, भाजप दक्षिण मंडल अध्यक्ष गिरीश खत्री, उत्तर मंडल अध्यक्ष सचिन पाषाणकर यांच्यासह लोकप्रतिनिधी, भाजपचे पदाधिकारी आणि कार्यकर्ते मोठ्या संख्येने उपस्थित होते.

पंतप्रधान नरेंद्र मोदी यांच्या वाढदिवसानिमित्त भारतीय जनता पक्षाच्या वतीने देशभर ‘सेवा पर्व’ साजरे करण्यात येत आहे. या उपक्रमांतर्गत मोदी यांच्या नेतृत्वाखाली केंद्र सरकारने देशभरात उभारलेल्या विविध विकास प्रकल्पांच्या परिसरात कार्यकर्त्यांच्या वतीने विविध कार्यक्रमांचे आयोजन करण्यात येत आहे.

याच उपक्रमाचा एक भाग म्हणून भाजप कोथरुड मंडलाच्या वतीने एसएनडीटी मेट्रो स्थानक परिसरात हजारो दिवे प्रज्वलित करून आनंदोत्सव साजरा करण्यात आला. यावेळी मेट्रो स्थानकाचा संपूर्ण परिसर दीपप्रकाशाने उजळून निघाला.

यावेळी मंत्री चंद्रकांत पाटील म्हणाले, “पंतप्रधान नरेंद्र मोदी यांच्या नेतृत्वाखाली देश झपाट्याने प्रगती करत आहे. त्यांच्या नेतृत्वात अनेक महत्त्वाकांक्षी विकास प्रकल्पांना गती मिळाली असून, विविध प्रकल्पांचे भूमिपूजन आणि लोकार्पण त्यांच्या हस्ते झाले आहे. त्यांच्या गतिमान कार्यपद्धतीमुळे देशाच्या विकासाला नवी दिशा मिळाली आहे.”

पंतप्रधान नरेंद्र मोदी यांच्या वाढदिवसानिमित्त आयोजित या कार्यक्रमात भाजप पदाधिकारी आणि कार्यकर्त्यांमध्ये मोठा उत्साह पाहायला मिळाला. विशेष म्हणजे, मेट्रो प्रवासी देखील या आनंदोत्सवात मोठ्या उत्साहात सहभागी झाले होते.

संयुक्त भेलकेनगर मित्र मंडळाच्या देखाव्याचे उद्घाटन माजी नगरसेविका मोनिका मोहोळ यांच्या हस्ते करण्यात आले. यावेळी बांधकाम व्यावसायिक प्रवीण बढेकर, मंडळाचे उत्सवप्रमुख उमेश भेलके, अक्षदा भेलके, जेजुरी देवस्थान विश्वस्त पांडुरंग थोरवे, अध्यक्ष, धनेश हगवणे, संतोष भेलके, ऋषिकेश कुंबरे यांच्यासह मंडळाचे पदाधिकारी, कार्यकर्ते आणि गणेशभक्त मोठ्या संख्येने उपस्थित होते.

दरवर्षी पौराणिक विषयांवर प्रभावी देखावे सादर करण्यासाठी मंडळाची ओळख आहे. विशेषतः मागील वर्षी सादर करण्यात आलेल्या ‘शिव-पार्वती विवाह सोहळा’ या जिवंत देखाव्याला दहा दिवस विक्रमी प्रतिसाद मिळाला होता. या देखाव्यामुळे मोठ्या प्रमाणात गर्दी झाली होती. त्यामुळे यंदा संयुक्त भेलकेनगर मित्र मंडळ कोणता देखावा सादर करणार, याबाबत गणेशभक्तांमध्ये मोठी उत्सुकता निर्माण झाली होती.

अखेर देखाव्याचे उद्घाटन झाल्यानंतर या उत्सुकतेला पूर्णविराम मिळाला. ‘श्री खंडोबा महात्म्य’ या जिवंत देखाव्याच्या माध्यमातून भगवान खंडोबा यांच्या जीवनाशी संबंधित विविध प्रसंग प्रभावीपणे सादर करण्यात आले आहेत. घोड्यावर स्वार होऊन येणारे खंडोबा, तसेच खंडोबा, म्हाळसा आणि बाणू यांच्या जीवनावर प्रकाश टाकणारे प्रसंग देखाव्यात साकारण्यात आले आहेत.

देखाव्यादरम्यान होणारी भंडाऱ्याची उधळण, त्यासोबत नागरिकांमधून घुमणारा ‘यळकोट यळकोट जय मल्हार’ चा जयघोष आणि प्रत्यक्ष जिवंत प्रसंगांचे सादरीकरण यामुळे संपूर्ण परिसरात भक्तिमय वातावरण निर्माण होत आहे. प्रकाशयोजना, वेशभूषा, पात्रांचे सादरीकरण आणि प्रसंगांची मांडणी यामुळे देखावा अधिक उठावदार ठरत आहे.

उद्घाटनाच्या पहिल्याच दिवशी देखावा पाहण्यासाठी गणेशभक्तांनी गर्दी केली. त्यामुळे पुढील दिवसांत या देखाव्याला मोठी गर्दी होण्याची अपेक्षा व्यक्त केली जात आहे.

“मागील वर्षी ‘शिव-पार्वती विवाह सोहळ्या’ला गणेशभक्तांनी भरभरून प्रतिसाद दिला. यंदाही ‘श्री खंडोबा महात्म्य’च्या माध्यमातून भक्तांना धार्मिक आणि सांस्कृतिक अनुभव देण्याचा आमचा प्रयत्न आहे. पहिल्याच दिवशी मिळालेला प्रतिसाद उत्साह वाढवणारा असून, पुढील आठ दिवस बहुसंख्य पुणेकर हा देखावा पाहण्यासाठी येतील,” असा विश्वास मंडळाचे उत्सवप्रमुख उमेश भेलके यांनी व्यक्त केला आहे.

बावधन येथील सूर्यदत्ता कॉलेजसमोरील मैदानावर बावधनच्या माजी सरपंच पीयुषा किरण दगडे पाटील यांच्यासह विविध क्षेत्रांत उल्लेखनीय कार्य करणाऱ्या महिलांच्या मार्गदर्शनाखाली ‘सिद्धीचा गणपती’ची स्थापना करण्यात आली. यंदा या उपक्रमाचे पाचवे वर्ष असून, गेल्या चार वर्षांत महिलांसाठी विविध सामाजिक, सांस्कृतिक आणि प्रोत्साहनपर उपक्रम राबविल्यामुळे ‘सिद्धीचा गणपती’ने आपली वेगळी ओळख निर्माण केली आहे. सलग तीन वर्षे ‘सिद्धीच्या गणपती’ला ‘मोरया पुरस्कारात प्रथम क्रमांकाचा सन्मान मिळाला आहे.

यंदा गणरायाचे आगमनही तितकेच दिमाखदार झाले. ढोल-ताशांच्या गजरात पारंपरिक पद्धतीने मिरवणूक काढत गणरायाची प्राणप्रतिष्ठापना करण्यात आली. या मिरवणुकीत बावधन आणि परिसरातील महिलांनी मोठ्या संख्येने सहभाग घेतला. शिस्तबद्ध नियोजन आणि उत्साहपूर्ण सहभागातून महिलांनी आपल्या कार्यकौशल्याची चुणूक दाखवून दिली.

यंदाच्या गणेशोत्सवाचे आणखी एक प्रमुख आकर्षण म्हणजे तिरुपती बालाजी मंदिराची भव्य प्रतिकृती. गणेशोत्सवाच्या पहिल्याच दिवसापासून या देखाव्याबरोबरच गणरायाच्या दर्शनासाठी भाविकांची मोठी गर्दी होत आहे.

महिलांसाठी महिलांनी उभारलेला गणपती

‘सिद्धीचा गणपती’ हा केवळ गणेशोत्सवापुरता मर्यादित न राहता महिलांना एकत्र आणणारे व्यासपीठ म्हणूनही काम करत आहे. महिलांनी महिलांसाठी बसविलेला हा गणपती स्त्रीशक्तीचे प्रभावी रूप समाजासमोर मांडत आहे. उत्सवाच्या दहा दिवसांत विविध सांस्कृतिक कार्यक्रमांसह महिलांसाठी विविध स्पर्धांचेही आयोजन करण्यात आले आहे.

“उत्तम देखावा आणि अत्युत्तम कार्यक्रम यासोबतच महिलांनी एकमेकींची ओळख वाढवावी, एकमेकींना आधार द्यावा, उत्साह वाढवावा, त्यांच्या व्यवसायाला हातभार लागावा आणि नव्या पिढीसमोर एक चांगला आदर्श निर्माण व्हावा, हा ‘सिद्धीचा गणपती’ बसवण्यामागचा मुख्य हेतू आहे,” असे बावधनच्या माजी सरपंच पीयुषा किरण दगडे पाटील यांनी ‘सिंहासन न्यूज’शी बोलताना सांगितले.

महाराष्ट्रभर पोहोचली बावधनची ओळख

“गेल्या चार वर्षांपासून विविध क्षेत्रांतील महिला एकत्र येऊन बावधनमध्ये ‘सिद्धीचा गणपती’ बसवत आहेत. महिलांनी बसवलेला गणपती म्हणून ‘सिद्धीच्या गणपती’ची महाराष्ट्रभर ओळख निर्माण झाली असून, ही बावधनसाठी अभिमानाची बाब आहे. गणपतीच्या माध्यमातून महिला एकत्र येऊन चांगला उपक्रम राबवत असून, त्या समाजाला सकारात्मक संदेश देत आहेत. पारंपरिक गणेशोत्सवाची मूळ परंपरा नव्या पिढीपर्यंत पोहोचवण्याचे कामही त्या करत आहेत,” असे नगरसेवक किरण दगडे पाटील यांनी सांगितले.

महिलांचा सहभाग, सामाजिक बांधिलकी, पारंपरिक गणेशोत्सव आणि आकर्षक सांस्कृतिक उपक्रम यांचा सुरेख संगम साधणारा ‘सिद्धीचा गणपती’ यंदाही पुण्याच्या गणेशोत्सवाचे प्रमुख आकर्षण ठरत आहे.

‘आठवड्यातून एक दिवस कोरडा दिवस’ आणि डास प्रतिबंधाचा संदेश

डेंग्यू, चिकनगुनिया, मलेरिया, हिवताप आदी आजारांचा प्रसार मुख्यतः डासांच्या उत्पत्तीस्थळांमुळे होतो. त्यामुळे नागरिकांनी घराच्या परिसरात तसेच टेरेसवर जुने टायर, डबे, रिकामी भांडी किंवा पाणी साचू शकणाऱ्या वस्तू ठेवू नयेत, साठलेल्या पाण्याचा योग्य निचरा करावा आणि पाण्याची भांडी झाकून ठेवावीत, असे आवाहन विद्यार्थ्यांनी केले.

तसेच आवश्यकतेनुसार डास प्रतिबंधक मलम, डास पळविणारे साधन व मच्छरदाणीचा वापर करण्याचे आवाहन करण्यात आले. हौद, विहिरी, तळघरे, पाण्याचे साठे व कमळकुंड आदी ठिकाणी योग्य पद्धतीने गप्पी मासे संवर्धन करण्याबाबतही जनजागृती करण्यात आली.

पर्यावरणपूरक गणेशोत्सवाचा संदेश

गणेशोत्सवाच्या पार्श्वभूमीवर विद्यार्थ्यांनी नागरिकांना शाडूमातीच्या पर्यावरणपूरक गणेशमूर्तींचा वापर करण्याचे आणि प्लास्टर ऑफ पॅरिसच्या मूर्ती टाळण्याचे आवाहन केले.

गणेशमूर्तींचे विसर्जन नदी, नाला, विहीर किंवा ओढ्यामध्ये न करता पुणे महानगरपालिकेने उपलब्ध करून दिलेल्या अधिकृत विसर्जन हौद किंवा घाटाचा वापर करावा, तसेच इच्छुक नागरिकांनी मूर्ती विसर्जनाऐवजी त्या महानगरपालिकेकडे दान करण्याचा पर्याय स्वीकारावा, असा संदेश देण्यात आला.

यासोबतच निर्माल्य स्वतंत्रपणे संकलित करून त्याचे योग्य वर्गीकरण करावे आणि निर्माल्य नदी-नाले किंवा सार्वजनिक ठिकाणी टाकून जलप्रदूषण व अस्वच्छता निर्माण करू नये, असेही आवाहन करण्यात आले.

विद्यार्थ्यांच्या घोषणांनी परिसर दुमदुमला

‘डासांची उत्पत्ती रोखा, डेंग्यूला आळा घाला!’,
‘साचलेले पाणी हटवा, डेंग्यू-चिकनगुनिया टाळा!’,
‘शाडूमातीची मूर्ती वापरा, पर्यावरण वाचवा!’,
‘नदी-नाल्यात विसर्जन नको, पर्यावरणपूरक गणेशोत्सव हवा!’

अशा प्रभावी घोषणांद्वारे विद्यार्थ्यांनी नागरिकांचे लक्ष वेधून घेतले.

अधिकाऱ्यांच्या मार्गदर्शनाखाली आयोजन

ही जनजागृती मोहीम घनकचरा व्यवस्थापन उपायुक्त संतोष वारुळे, परिमंडळ कार्यालय क्रमांक २ चे उपायुक्त अविनाश सकपाळ आणि महापालिका सहाय्यक आयुक्त  सुहास जाधव यांच्या मार्गदर्शनाखाली, तसेच वरिष्ठ आरोग्य निरीक्षक राम सोनवणे यांच्या नेतृत्वाखाली आयोजित करण्यात आली.

यावेळी आरोग्य निरीक्षक किरण जाधव, करण कुंभार, राजेश आहेर, गणेश साठे, गणेश चोंधे, लक्ष्मीकांत कुलकर्णी, दत्तात्रय दळवी, उमेश शिंदे, प्रमोद चव्हाण, निसार शेख, मोकादम वैजीनाथ गायकवाड, आण्णा ढावरे, अशोक कांबळे, Cummins India चे संपत खैरे, सोमनाथ वाले, अनिल घोडेकर, जनवाणीचे समीर अजगेकर, नीता नाईक, जगन्नाथ ढगे, Rotary District 3131 चे रोटेरियन किरण इंगळे, जनसेवक बाळासाहेब दांडेकर तसेच कीटक प्रतिबंधक विभागाचे अमोल हवालदार यांच्यासह सरस्वती विद्यामंदिरचे कोल्हे सर, सरतापे सर, ढेपे सर आणि शिक्षकवर्ग उपस्थित होते.

‘निरोगी परिसर आणि स्वच्छ पर्यावरण हीच खरी गणेशभक्ती’

या उपक्रमातून आरोग्यदायी नागरिक, डासमुक्त परिसर, स्वच्छ शहर आणि पर्यावरणपूरक गणेशोत्सव यांचा संदेश देण्यात आला. नागरिकांनी प्रशासनाच्या आरोग्यविषयक सूचनांचे पालन करून डेंग्यू व इतर साथीच्या आजारांना प्रतिबंध करण्यासाठी सक्रिय सहभाग घ्यावा, तसेच गणेशोत्सव पर्यावरणपूरक पद्धतीने साजरा करून पुणे शहराच्या स्वच्छता व पर्यावरण संवर्धनात योगदान द्यावे, असे आवाहन करण्यात आले.

यंदा मुंबईतील चेंबूर येथील अमर ज्योत सेवा मंडळाच्या गोपीका पथकाने दहीहंडी फोडताच उपस्थित महिलांनी एकच जल्लोष केला. उत्साहाने भरलेले वातावरण आणि दहीहंडी फुटल्यानंतर झालेला जल्लोष यामुळे संपूर्ण परिसर स्त्रीशक्तीच्या उत्साहाने दुमदुमून गेला.

महिलांसाठी स्वतंत्र आणि सुरक्षित वातावरणात आयोजित केला जाणारा हा उत्सव दरवर्षी महिलांच्या आकर्षणाचा केंद्रबिंदू ठरत आहे. घर, नोकरी, व्यवसाय आणि कुटुंब अशा विविध जबाबदाऱ्या सांभाळणाऱ्या महिलांना उत्सवाचा मनमोकळेपणाने आनंद घेता यावा, यासाठी या दहीहंडीचे आयोजन केले जाते. त्यामुळे अनेक महिला दरवर्षी या उपक्रमाचे कौतुक करत ‘किशोरदादांमुळे आम्हाला सुरक्षित वातावरणात दहीहंडीचा आनंद घेता येतो,’ अशा भावना व्यक्त करतात.

किशोर शिंदे म्हणाले, “महिला आज केवळ घर सांभाळणाऱ्या गृहिणी राहिलेल्या नाहीत. नोकरी, व्यवसाय, शिक्षण, क्रीडा, प्रशासन अशा प्रत्येक क्षेत्रात त्यांनी आपल्या कर्तृत्वाचा ठसा उमटवला आहे. आजची स्त्री अबला नाही, तर आपल्या सामर्थ्याने जगाला दिशा देणारी शक्ती आहे.” “भारताला सक्षम आणि महासत्ता बनवायचे असेल तर महिलांना योग्य सन्मान, समान संधी आणि ताकद मिळणे आवश्यक आहे. त्यामुळे महिला सशक्तीकरण ही केवळ घोषणा न राहता ती प्रत्यक्ष कृतीत उतरवणे गरजेचे आहे,” असेही शिंदे यांनी सांगितले. दहीहंडी उत्सव म्हटले की पुरुषांची गोविंदा पथके आणि त्यांचा जल्लोष हेच चित्र आजवर पाहायला मिळत होते. हीच पारंपरिक चौकट मोडून महिलांनाही दहीहंडीचा उत्सव तितक्याच उत्साहाने आणि सुरक्षितपणे अनुभवता यावा, या उद्देशाने महाराष्ट्र नवनिर्माण सेना आणि ओम चॅरिटेबल ट्रस्टच्या माध्यमातून कोथरूडमध्ये महाराष्ट्रातील सर्वप्रथम महिला दहीहंडी महोत्सवाच्या आयोजनाला सुरुवात करण्यात आली.

या महोत्सवात मैदानावर केवळ महिलांनाच प्रवेश दिला जातो. महिलांच्या सुरक्षिततेसाठी विशेष सुरक्षा व्यवस्था केली जाते. त्यामुळे दरवर्षी सुमारे २५ हजार महिला या उत्सवात सहभागी होत आनंदोत्सव साजरा करतात, अशी माहिती किशोर शिंदे यांनी दिली.

या दहीहंडीचे संयोजन संजय काळे, गणेश शिंदे, श्रीकांत अमराळे, धनंजय बलकवडे आणि शशांक अमराळे, रवी वाल्हेकर, प्रतीक कंधारे, ओम शिंदे यांच्यासह असंख्य महाराष्ट्र सैनिकांनी केले. तसेच संगम तरुण मंडळ आणि सचिन फ्रेंड्स सर्कल-कुंदन ग्रुप यांच्या सहकाऱ्यांनी उत्सव यशस्वी करण्यासाठी विशेष परिश्रम घेतले.

पुणे : आर्थिक परिस्थिती प्रतिकूल असतानाही जिद्द आणि मेहनतीच्या जोरावर मोठे स्वप्न पाहणाऱ्या कोथरुडमधील एका तरुणीचे मॅकेनिकल इंजिनिअर होण्याचे स्वप्न अखेर साकार झाले आहे. सुतारदरा परिसरातील भेळ विक्रेते दत्तात्रय इंगवले यांच्या कन्या गायत्री एअर इंडियामध्ये मॅकेनिकल इंजिनिअर म्हणून नियुक्ती झाली असून, तिच्या शिक्षणाच्या वाटचालीत राज्याचे उच्च व तंत्रशिक्षण मंत्री चंद्रकांत पाटील यांच्या मदतीचा हात मोलाचा ठरला.

दत्तात्रय इंगवले हे भेळ विक्री करून आपल्या कुटुंबाचा उदरनिर्वाह करतात. अत्यंत बेताची आर्थिक परिस्थिती असतानाही त्यांच्या कन्येने मॅकेनिकल इंजिनिअर होण्याचे स्वप्न उराशी बाळगले. मात्र, आर्थिक अडचणींमुळे उच्च शिक्षण घेणे तिच्यासाठी आव्हानात्मक ठरत होते.

याच काळात राज्य सरकारच्या मुलींना उच्च शिक्षण मोफत या निर्णयामुळे तिच्या शिक्षणाचा मार्ग सुकर झाला. तसेच, चंद्रकांत पाटील यांच्या जनसंपर्क कार्यालयाच्या माध्यमातून मिळालेल्या मदतीमुळे तिला शिक्षण पूर्ण करण्यासाठी आवश्यक पाठबळ मिळाले. या संधीचा योग्य उपयोग करत तिने अभियांत्रिकीचे शिक्षण शिवणे येथील ‘विंग्स कॅालेज ॲाफ एव्हिएशन टेक्नॅालॅाजी’ ह्या महाविद्यालयातून पूर्ण केले आणि आता नागपूर मध्ये एअर इंडियामध्ये एअरक्राफ्ट मॅकेनिकल इंजिनिअर म्हणून आपल्या कारकिर्दीला सुरुवात केली आहे.

दरम्यान, एका कार्यक्रमाच्या निमित्ताने इंगवले कुटुंबीयांची चंद्रकांत पाटील यांच्याशी अनपेक्षित भेट झाली. यावेळी कन्येच्या यशाबद्दल तिच्या पालकांनी पाटील यांचे आभार मानत कृतज्ञता व्यक्त केली. आर्थिक परिस्थितीशी संघर्ष करणाऱ्या कुटुंबातील मुलीला शिक्षणाच्या माध्यमातून स्वावलंबी होण्याची संधी मिळाल्याने इंगवले कुटुंबीयांसाठी हा क्षण विशेष ठरला.

“आर्थिक परिस्थिती कितीही कठीण असली तरी योग्य वेळी मिळालेली मदत आणि शिक्षणाची संधी एखाद्याचे आयुष्य बदलू शकते,” याचे हे उदाहरण असल्याची भावना यानिमित्ताने कोथरुड मध्ये व्यक्त होत आहे.

पुणे : बावधन खुर्द येथील सर्व्हे क्रमांक ३६ व ३७/२ परिसरात एका बांधकाम व्यावसायिकाच्या फायद्यासाठी नाल्याच्या नैसर्गिक प्रवाहात अडथळा निर्माण करून त्यावरून रस्ता व ॲक्सेस उपलब्ध करून देण्यासाठी पुणे महानगरपालिकेच्या यंत्रणेने नियमांची पायमल्ली केल्याचा गंभीर आरोप सर्व्हे क्रमांक ३६ चे जागामालक अतुल बहिरट यांनी केला आहे. या प्रकरणी त्यांनी पत्रकार परिषद घेऊन महापालिका प्रशासन आणि संबंधित बांधकाम व्यावसायिकाच्या भूमिकेवर अनेक प्रश्न उपस्थित केले.

बहिरट यांच्या म्हणण्यानुसार, सर्व्हे क्रमांक ३६ मधून नैसर्गिक नाला वाहत असून त्यावरून महापालिकेचा डीपी रस्ता प्रस्तावित आहे. या रस्त्याचे काम गेल्या दोन वर्षांपासून रखडले आहे. रस्त्याच्या कामासाठी सर्व्हे क्रमांक ३६ च्या मालकांनी महापालिकेला सहकार्य केले असून बॉक्स कल्व्हर्टसाठी तब्बल २ कोटी ६५ लाख ३५ हजार २६७ रुपयांचे चलन महापालिकेच्या तिजोरीत भरले असल्याचा दावा त्यांनी केला. तसेच मे २०२५ पासून पथ, बांधकाम आणि मलनिःसारण विभागाकडे सातत्याने पाठपुरावा करूनही अपेक्षित प्रतिसाद मिळाला नसल्याचे त्यांनी सांगितले.

दरम्यान, सर्व्हे क्रमांक ३६ लगतच्या सर्व्हे क्रमांक ३७/२ब मध्ये ‘पूर्वांकरा डेव्हलपर्स’कडून ‘पूर्वा अस्पायर’ हा बांधकाम प्रकल्प उभारण्यात येत आहे. या प्रकल्पाला ॲक्सेस मिळावा यासाठी सर्व्हे क्रमांक ३६ मधील डीपी रस्त्याचा संदर्भ दाखविताना प्रत्यक्ष अस्तित्वात असलेल्या नाल्याची माहिती बांधकाम नकाशांमध्ये दाखविण्यात आली नसल्याचा आरोप बहिरट यांनी केला.

बावधन खुर्दच्या डीपी नकाशातील कथित ड्राफ्टिंग एररचा गैरफायदा घेत नाल्याचा प्रत्यक्ष प्रवाह नकाशात दाखविला गेला नाही. तसेच नाल्यामध्ये पाईप व राडारोडा टाकून त्याचा प्रवाह खंडित करून त्यावर रस्ता आणि कमान उभारण्यात आल्याचा आरोपही त्यांनी केला. या ठिकाणी महापालिकेच्या विविध अधिकाऱ्यांनी पाहणी करूनही संबंधित परवानग्यांमध्ये नाल्याचा उल्लेख करण्यात आला नसल्याचा दावा त्यांनी केला.

पर्यावरण नियंत्रण विभागाकडून एनओसी घेतानाही नाल्याचा प्रवाह नकाशामध्ये दाखविला गेला नसल्याने महापालिकेची तसेच संबंधित विभागाची दिशाभूल झाल्याचा आरोप बहिरट यांनी केला. नाल्याचा प्रवाह अडवल्यामुळे पावसाळ्यात सर्व्हे क्रमांक ३६ मध्ये पाणी साचून जागामालकांना आर्थिक नुकसान आणि मनस्ताप सहन करावा लागल्याचेही त्यांनी सांगितले.

महापालिकेकडे १ डिसेंबर २०२५ पासून अनेक तक्रारी करूनही कारवाई न झाल्याने सर्व्हे क्रमांक ३६ च्या मालकांनी महापालिकेच्या नालेसफाई कंत्राटदारामार्फत नाला प्रवाहित करून घेतल्याचे बहिरट यांनी सांगितले. यावेळी नाल्यातील पाईप व राडारोडा हटविण्यात आल्याने बांधकाम व्यावसायिकाच्या प्रतिनिधींकडून दबाव आणि धमक्या दिल्याचा आरोपही त्यांनी केला.

‘पीएमसीला खिशात घेऊन फिरतो’ अशी धमकी दिल्याचा आरोप

बांधकाम व्यावसायिकाच्या प्रतिनिधींनी, “हमलोग पीएमसी को जेब में लेके घुमते है, तुम्हारा भी काम रुकवायेंगे और नाले पर रस्ता भी बनवाके लेंगे,” अशी धमकी दिल्याचा गंभीर आरोप बहिरट यांनी केला. या आरोपांची स्वतंत्रपणे पडताळणी झालेली नाही.

महापालिकेच्या कारवाईवरही प्रश्नचिन्ह

२० ऑगस्ट रोजी दुपारी साडेचारच्या सुमारास महापालिकेच्या बांधकाम व अतिक्रमण विभागातील अधिकारी-कर्मचारी तसेच उपायुक्त सोमनाथ बनकर यांच्या उपस्थितीत मोठ्या पोलीस बंदोबस्तात कारवाई करण्यात आली. या कारवाईदरम्यान सर्व्हे क्रमांक ३६ मधील काही खासगी मालमत्तांचे नुकसान झाले आणि नाल्यावर पूल उभारून बांधकाम प्रकल्पाला रस्ता उपलब्ध करून देण्यात आल्याचा आरोप बहिरट यांनी केला.

“अतिक्रमण काढणे हे अतिक्रमण विभागाचे काम असताना खासगी विकसकाला ॲक्सेस मिळण्यासाठी नाल्यावर पूल उभारण्याची भूमिका महापालिकेने का घेतली?” असा सवाल त्यांनी उपस्थित केला.

‘गुन्हे दाखल करू’ अशी धमकी दिल्याचा आरोप

कारवाईदरम्यान संबंधित जागामालकांनी आपले म्हणणे ऐकून घेऊन लेखी हरकती मागवाव्यात आणि त्यानंतर निर्णय घ्यावा, अशी मागणी केली होती. मात्र, उपायुक्त सोमनाथ बनकर यांनी “सरकारी कामकाजात अडथळा करताय, तुमच्यावर गुन्हे दाखल करू” तसेच “तुम्हाला काय करायचे ते करा, मला काय करायचे ते मी करतो,” अशा शब्दांत धमकावल्याचा आरोप बहिरट यांनी केला.

याचवेळी सर्व्हे क्रमांक ३५/१ मधील जागेत डीपी रस्त्यावर पत्रे लावून रस्ता अडविण्यात आल्याची तक्रारही त्यांनी केली. त्या ठिकाणी मात्र संबंधित मालकाला नोटीस देऊन त्याचे म्हणणे मागविल्यानंतर कारवाई करण्याची भूमिका घेण्यात आली. त्यामुळे प्रशासनाच्या कारवाईत दुहेरी निकष वापरले जात असल्याचा आरोप बहिरट यांनी केला.

सहा प्रमुख प्रश्न उपस्थित

या संपूर्ण प्रकरणाची चौकशी करून संबंधितांवर कारवाई करण्याची मागणी करताना बहिरट यांनी महापालिका प्रशासनासमोर सहा प्रमुख प्रश्न उपस्थित केले आहेत. पूर्वांकरा डेव्हलपर्सने नाल्याची माहिती कथितरीत्या लपवून परवानग्या मिळविल्याबाबत संबंधित विकसकावर कारवाई का करू नये? महापालिकेची दिशाभूल करून मिळविलेल्या परवानग्या रद्द का करू नयेत? नाल्याचा प्रवाह अडवून पर्यावरणाचे नुकसान केल्याबद्दल कारवाई का करू नये? पर्यावरण नियंत्रण विभागाकडून मिळविलेली एनओसी रद्द करण्यासाठी संबंधित प्राधिकरणाला कळविण्यात का येऊ नये? तसेच नाल्याची प्रत्यक्ष स्थिती तपासल्याशिवाय परवानग्या देणाऱ्या महापालिका अधिकाऱ्यांची चौकशी का करू नये, असे प्रश्न त्यांनी उपस्थित केले आहेत.

तसेच सर्व्हे क्रमांक ३६ च्या मालकांनी डीपी रस्त्यासाठी सहकार्य करून मोठी रक्कम महापालिकेकडे जमा केली असतानाही त्यांच्यावर अन्याय झाल्याचा आरोप करत या संपूर्ण प्रकरणाची विभागीय चौकशी करण्याची मागणी त्यांनी केली.

या प्रकरणी न्यायालयीन तसेच शासनस्तरावर दाद मागणार असल्याचे अतुल बहिरट यांनी स्पष्ट केले असून, महापालिका आयुक्त, पालकमंत्री, नगरविकास मंत्री आणि मुख्यमंत्री यांनी या प्रकरणाची चौकशी करून दोषींवर कारवाई करावी, अशी मागणी त्यांनी केली आहे.     

दरम्यान, या प्रकरणी संबंधित बांधकाम व्यावसायिक तसेच महापालिका प्रशासनाची अधिकृत भूमिका समोर आलेली नाही.     

महाराष्ट्रात कुठेही गुन्हेगारी किंवा अनुचित घटना घडली की त्याची तुलना ‘मुळशी पॅटर्न’शी केली जाते. त्यामुळे मुळशी तालुक्याची आणि येथील कष्टकरी, गुणवंत व कर्तृत्ववान नागरिकांची चुकीची प्रतिमा निर्माण होत असल्याची भावना उपस्थितांनी व्यक्त केली. यापुढे मुळशीचे नाव चुकीच्या संदर्भात वापरले जाऊ नये, यासाठी बैठकीत जाहीर ठराव मंजूर करण्यात आला.

मुळशी हा केवळ एका चित्रपटाच्या नावापुरता किंवा एखाद्या नकारात्मक संदर्भापुरता मर्यादित नसून त्याला समृद्ध सामाजिक, सांस्कृतिक आणि ऐतिहासिक वारसा आहे. वारकरी संप्रदायाची परंपरा, शेतकरी, महाराष्ट्र केसरी पैलवान, राष्ट्रीय व आंतरराष्ट्रीय खेळाडू, प्रशासनातील अधिकारी, डॉक्टर, वकील, अभियंते आणि गुणवंत विद्यार्थी घडविणाऱ्या या तालुक्याला उद्योजक, व्यावसायिक आणि माजी सैनिकांचीही गौरवशाली परंपरा लाभली आहे.

सह्याद्रीच्या पर्वतरांगांनी, गडकिल्ल्यांनी आणि लाल मातीने नटलेल्या मुळशीला छत्रपती शिवाजी महाराजांच्या सरदार-सैनिकांचा ऐतिहासिक वारसा लाभला आहे. सेनापती बापट यांचा सत्याग्रह आणि मामासाहेब मोहोळ यांची कुस्तीची परंपराही मुळशीच्या इतिहासातील महत्त्वाचा ठेवा असल्याचे यावेळी नमूद करण्यात आले.

या लोकचळवळीला पुणे शहरातील विविध गणपती मंडळे, देवी मंडळे आणि सेवा सोसायट्यांनी लेखी पाठिंबा दर्शविला आहे. उपस्थित नागरिकांनीही जाहीर संमतीपत्र देत या उपक्रमाला समर्थन दिले.

बैठकीला मुळशीतील राजकीय, सामाजिक, कला, क्रीडा, शैक्षणिक, वारकरी, टाळकरी, उद्योजक तसेच तरुण पिढीतील नागरिक मोठ्या संख्येने उपस्थित होते. मुळशीची खरी ओळख आणि गौरवशाली परंपरा पुढील पिढीपर्यंत पोहोचवण्यासाठी तसेच तालुक्याची बदनामी रोखण्यासाठी सर्व मुळशीकरांनी पक्षभेद बाजूला ठेवून एकत्र येण्याची गरज यावेळी व्यक्त करण्यात आली.

“मुळशीकर म्हणून एकजुटीने पुढे या, मुळशीची बदनामी थांबवा आणि मुळशीची खरी ओळख महाराष्ट्रासमोर आणा,” असा निर्धार या बैठकीत व्यक्त करण्यात आला.

कोथरूड : महाराष्ट्राच्या विकासात महत्त्वपूर्ण योगदान देणारे उपमुख्यमंत्री तथा राष्ट्रवादी काँग्रेसचे वरिष्ठ नेते अजितदादा पवार यांच्या जयंतीनिमित्त राष्ट्रवादी काँग्रेस कोथरूड विधानसभा मतदारसंघाच्या वतीने भव्य रक्तदान शिबिराचे आयोजन करण्यात आले होते. या शिबिराला नागरिक, युवक आणि कार्यकर्त्यांचा उत्स्फूर्त प्रतिसाद लाभला. मोठ्या संख्येने रक्तदात्यांनी सहभाग नोंदवत सामाजिक बांधिलकीचे दर्शन घडवले.

या उपक्रमाचे आयोजन राष्ट्रवादी काँग्रेस कोथरूड विधानसभा मतदारसंघाचे अध्यक्ष तथा नगरसेवक हर्षवर्धन मानकर यांच्या मार्गदर्शनाखाली करण्यात आले होते. रक्तदानासाठी सकाळपासूनच नागरिकांची गर्दी होत असल्याचे चित्र पाहायला मिळाले. अनेक युवकांनी प्रथमच रक्तदान करत समाजसेवेच्या या उपक्रमात सहभागी होत इतरांनाही रक्तदानासाठी प्रेरित केले.

यावेळी बोलताना हर्षवर्धन मानकर म्हणाले, “रक्तदान हे केवळ दान नसून एखाद्याला नवजीवन देण्याचे पवित्र कार्य आहे. एका रक्तदात्यामुळे अनेकांचे प्राण वाचू शकतात. समाजाप्रती असलेल्या कर्तव्याच्या भावनेतून मोठ्या संख्येने रक्तदान करणाऱ्या सर्व रक्तदात्यांचे मनःपूर्वक आभार.” अजित दादांनी आपले आयुष्य समाजासाठी वाहिले होते. समाजाच्या प्रगतीसाठी राज्याच्या विकासासाठी ते शेवटच्या क्षणापर्यंत काम करत होते. आज त्यांची कमी सर्वांनाच जाणवत आहे. आज त्यांना श्रद्धांजली वाहताना त्यांचा कार्यपट डोळ्यासमोर उभा राहतो.

शिबिरात रक्तदान करणाऱ्या प्रत्येक रक्तदात्याचा प्रमाणपत्र देऊन सन्मान करण्यात आला. रक्तदात्यांचा सेवाभाव आणि सामाजिक जाणीव ही समाजासाठी प्रेरणादायी असल्याचेही मानकर यांनी यावेळी नमूद केले.

वाढत्या रक्ताच्या गरजेच्या पार्श्वभूमीवर अशा रक्तदान शिबिरांमुळे रक्तपेढ्यांना मोठी मदत होत असून गरजू रुग्णांना वेळेत रक्त उपलब्ध होण्यास हातभार लागणार आहे. अजित दादांच्या जयंती निमित्त आयोजित या रक्तदान शिबिराने सामाजिक उत्तरदायित्वाची भावना जपत कोथरूडमधील नागरिकांमध्ये सेवाभावाचा संदेश दिला गेला.