पुणे : एकल महिलांना नियमित मार्गदर्शन  देण्यात यावे. त्यांच्या बाबत सुरु असलेल्या अमानवी प्रथा मंगळसूत्र काढणे , टिकली न लावणे यासारख्या  प्रथा बंद झाल्या पाहिजेत. एकल महिलांना विकासात समान संधीसाठी सर्वांनी दृष्टिकोन सुधारावा, असे आवाहन पुण्याच्या महापौर मंजुषा नागपुरे यांनी यावेळी बोलताना केले.

पुणे महानगरपालिका समाज विकास विभाग कोथरूड बावधन क्षेत्रीय कार्यालय अंतर्गत दत्त मंदिर, शास्त्रीनगर, कोथरूड येथे   एकल महिला सन्मान दिनानिमित्त आयोजित कार्यक्रमात त्या बोलत होत्या.

महिला बाल कल्याण समिती अध्यक्षा अल्पना वरपे यांनी ‘एकल महिलांना समाजामध्ये मानाचे स्थान दिले गेले पाहिजे, तसेच मुख्य प्रवाहात अन्यासाठी आपण सगळ्यांनीच प्रयत्नशील राहिले पाहिजे’ या विषयी मार्गदर्शन केले.

एकता ग्राम विकास संस्थेचे नंदकिशोर लोंढे यांनी राज्य स्तरावर काम सुरु असलेल्या एकल महिला विकास समिती विषयी महिलांना माहिती दिली. यावेळी बोलताना समाज विकास विभागाच्या उपायुक्त आशा राऊत यांनी एकल महिलांच्या विकासासाठी महापालिका कायम दक्ष राहणार असल्याचे सांगितले तसेच महिला सन्मान कार्यक्रम संपूर्ण पुणे शहरात 15 क्षेत्रीय कार्यालयांमध्ये घेण्यात आल्याचे माहिती दिली.

यावेळी प्रभाग समिती अध्यक्षा वासंती जाधव, नगरसेविका रूपाली पवार मुख्य समाज विकास अधिकारी रामदास चव्हाण तसेच समुपदेशिका, अनुराधा जगताप सर्व समूह संघटिका मनिषा वाघ, शीतल ठोसर, स्वाती ढगे, विजया हिंगणे समाजसेवक  निजाम शेख, सेवा केंद्र मुख्य समन्वयक विजय पाटोळे, संगीता निकम तसेच कोथरूड भागातील सर्व महिला व एकल महिला साधारण 350 महिला सदर कार्यक्रमासाठी उपस्थित होत्या.

यावेळी भाग्यश्री साळुंखे, ॲड.प्रीती परांजपे यांनी एकल महिलांची सामाजिक स्थिती व कायदे व हक्क या विषयावर महिलांसाठी मार्गदर्शन केले.

यावेळी महिलांना शासन योजना, आयुष्मान भारत योजना, आभा कार्ड लाइट हाऊस व योजक संस्था मार्फत विविध कोर्स, विषयक माहिती देण्यात आली. तसेच उपस्थित एकल महिलांचा सत्कार करून रामदास चव्हाण यांनी आभार मानले व सूत्रसंचालन अनुराधा जगताप यांनी केले.

पुणे : एखादी चांगली कल्पना, त्यासाठी घेतलेले परिश्रम आणि विद्यार्थ्यांच्या कलागुणांवर ठेवलेला विश्वास यांचे सुंदर फळ कसे मिळते, याचे जिवंत उदाहरण म्हणजे पुणे महानगरपालिकेची संत तुकाराम महाराज संगीत कला प्रबोधिनी होय. सन २०१३ मध्ये तत्कालीन शिक्षण मंडळ अध्यक्ष बाबा धुमाळ यांनी संगीत आणि कलेची आवड असलेल्या विद्यार्थ्यांसाठी एका छोट्या रोपट्याप्रमाणे या संगीत विद्यालयाची मुहूर्तमेढ रोवली होती. आज त्या रोपट्याचा वटवृक्ष झाला असून, त्याची साक्ष यंदाच्या शंभर टक्के निकालाने पुन्हा एकदा दिली आहे.

अखिल भारतीय गांधर्व महाविद्यालय, मुंबई यांच्या वतीने घेण्यात आलेल्या शास्त्रीय संगीत गायन, हार्मोनियम आणि तबला वादनाच्या प्रारंभिक व प्रवेशिका प्रथम परीक्षांमध्ये प्रभात रस्त्यावरील संत तुकाराम महाराज संगीत कला प्रबोधिनीच्या विद्यार्थ्यांनी दैदिप्यमान यश संपादन केले आहे. शैक्षणिक वर्ष २०२५-२६ मध्ये परीक्षेला बसलेल्या १९० विद्यार्थ्यांपैकी प्रत्येक विद्यार्थी उत्तीर्ण झाला. यामध्ये ५४ विद्यार्थ्यांनी विशेष योग्यता, तर १०० विद्यार्थ्यांनी प्रथम श्रेणी मिळवत आपली गुणवत्ता सिद्ध केली. तसेच १८ विद्यार्थ्यांनी द्वितीय श्रेणीत यश मिळवले.

हा निकाल केवळ आकड्यांचा नाही, तर विद्यार्थ्यांच्या अथक सरावाचा, शिक्षकांच्या समर्पणाचा आणि पालकांच्या विश्वासाचा प्रवास आहे. रियाजाच्या प्रत्येक सुरातून, तबल्याच्या प्रत्येक ठेक्यातून आणि हार्मोनियमच्या प्रत्येक स्वरातून घडलेले हे यश अनेकांच्या डोळ्यांत आनंदाश्रू आणणारे ठरले आहे.

विद्यार्थ्यांच्या या यशामागे उपायुक्त शिक्षण वसुंधरा बारवे, प्रशासकीय अधिकारी सुनंदा वाखारे, क्रीडा विभाग प्रमुख माणिक देवकर, सहाय्यक शिक्षण प्रमुख (क्रीडा) विनायक तुम्मा, क्रीडा अधिकारी रुबीना शेख, पर्यवेक्षिका मीना जाधव, मुख्याध्यापक मंगेश राजहंस यांचे मार्गदर्शन लाभले. तसेच संगीत शिक्षिका दीपाली कोल्हटकर, अर्चना इरपतगिरे आणि उमेश जाधव यांनी विद्यार्थ्यांमध्ये संगीताची गोडी निर्माण करत त्यांना यशाच्या शिखरावर पोहोचवण्यासाठी मोलाचे योगदान दिले.

निकालानंतर भावना व्यक्त करताना माजी शिक्षण मंडळ अध्यक्ष बाबा धुमाळ म्हणाले, “शिक्षण मंडळाचा अध्यक्ष असताना संगीत आणि कलेची आवड असलेल्या मुलांसाठी ही संगीत प्रबोधिनी सुरू करण्याचे स्वप्न पाहिले होते. आज त्या स्वप्नाला यशाचे सुंदर पंख फुटलेले पाहताना मन भरून येते. या विद्यार्थ्यांचे यश पाहून खऱ्या अर्थाने समाधान मिळते. त्यांनी मिळवलेले यश हे त्यांच्या मेहनतीचे आणि शिक्षकांच्या समर्पणाचे फळ आहे. भविष्यातही ही मुले संगीत क्षेत्रात मोठी भरारी घेतील, असा विश्वास वाटतो.”

संत तुकाराम महाराज संगीत कला प्रबोधिनीचा हा निकाल केवळ शैक्षणिक यश नाही, तर संगीत संस्कारांची जपणूक, कलेबद्दलची निष्ठा आणि एका दूरदृष्टीच्या संकल्पनेचे यशस्वी वास्तवात झालेले रूपांतर आहे. आज या यशामुळे अनेक विद्यार्थ्यांच्या चेहऱ्यावर आनंद फुलला असून, बाबा धुमाळ यांनी लावलेल्या त्या छोट्याशा रोपट्याने खऱ्या अर्थाने एका समृद्ध वटवृक्षाचे रूप धारण केले आहे.

पुणे : कोथरूड परिसरातील वाढती वाहतूक कोंडी आणि आगामी मेट्रो तसेच उड्डाणपूल प्रकल्पांचा विचार करता शांतीबन चौक गणेश मंदिर ते डावी भुसारी कॉलनीमार्गे हायवे सर्व्हिस रोडपर्यंतचा रस्ता ३६ मीटर रुंद करण्यात यावा, अशी मागणी नगरसेविका तथा महिला व बाल कल्याण समितीच्या अध्यक्षा अल्पना वरपे यांनी पुणे महापालिका आयुक्त नवल किशोर राम यांच्याकडे केली आहे.

अलीकडेच शांतीबन चौक ते डावी भुसारी कॉलनी (हायवे सर्व्हिस रोडपर्यंत) जाणारा डीपी रस्ता वाहतुकीसाठी खुला करण्यात आला आहे. मात्र हा रस्ता सुरू झाल्यापासून स्थानिक नागरिक आणि वाहनचालकांना दररोज मोठ्या वाहतूक कोंडीचा सामना करावा लागत आहे. सध्या या रस्त्याची रुंदी केवळ १५ मीटर असून परिसरातील वाढती लोकसंख्या, नव्या गृहनिर्माण प्रकल्पांची वाढ आणि वाहनांची वाढती संख्या लक्षात घेता ही रुंदी अपुरी ठरत आहे.

सदर डीपी रस्त्यालगत असलेल्या काही गृहनिर्माण सोसायट्यांच्या पुनर्विकासाचे नियोजन आगामी काळात होणार आहे. त्यामुळे पुनर्विकास प्रक्रियेदरम्यान रस्ता रुंदीकरणाचा प्रश्न प्रभावीपणे सोडविण्याची संधी उपलब्ध होणार असल्याचे अल्पना वरपे यांनी आयुक्तांच्या निदर्शनास आणून दिले. पुनर्विकास प्रकल्पांना परवानगी देताना रस्ता ३६ मीटर रुंद करण्याचे नियोजन प्रशासनाकडून करता येऊ शकते. त्यामुळे भविष्यातील वाहतूक गरजा लक्षात घेऊन पुनर्विकास आणि रस्ता रुंदीकरण यांचे समन्वित नियोजन करण्याची आवश्यकता असल्याचेही त्यांनी पत्रात नमूद केले आहे.

यासंदर्भात त्यांनी प्रशासनाचे लक्ष आगामी काळातील महत्त्वाच्या विकासकामांकडे वेधले आहे. पौड रस्त्यावर वनाज ते चांदणी चौक या दरम्यान मेट्रो प्रकल्पाचे काम तसेच उड्डाणपूल उभारणीची कामे लवकरच सुरू होणार आहेत. या कामांदरम्यान मुख्य रस्त्यावरील वाहतूक मोठ्या प्रमाणावर पर्यायी मार्गांकडे वळवली जाण्याची शक्यता आहे. अशा परिस्थितीत सद्यस्थितीतील शांतीबन चौक,  एकलव्य पासून पुढे हायवे सर्व्हिस रस्त्यापर्यंत असणारा १५ मीटर रुंदीचा रस्ता वाहतुकीचा वाढीव ताण सहन करू शकणार नाही, अशी चिंता त्यांनी व्यक्त केली आहे.

सध्या रस्ता सुरू झाल्यानंतरच अनेक ठिकाणी वाहतूक कोंडीची समस्या निर्माण होत असून नागरिकांना प्रवासासाठी अधिक वेळ खर्च करावा लागत आहे. भविष्यात मेट्रो आणि उड्डाणपूलाच्या कामामुळे या समस्येची तीव्रता आणखी वाढण्याची शक्यता आहे. त्यामुळे दीर्घकालीन वाहतूक नियोजनाच्या दृष्टीने या रस्त्याचे रुंदीकरण करणे आवश्यक असल्याचे वरपे यांनी म्हटले आहे.

यासाठी शांतीबन चौक गणेश मंदिर ते डावी भुसारी कॉलनी येथील हायवे सर्व्हिस रोडपर्यंतचा संपूर्ण डीपी रस्ता ३६ मीटर रुंद करण्याचा प्रस्ताव तातडीने मंजूर करून आवश्यक प्रशासकीय प्रक्रिया सुरू करावी, अशी मागणी अल्पना वरपे यांनी आयुक्तांकडे केली आहे.

परिसरातील नागरिकांच्या दैनंदिन प्रवासातील अडचणी दूर करण्यासाठी तसेच भविष्यातील वाहतुकीच्या गरजा लक्षात घेऊन प्रशासनाने या विषयाकडे गांभीर्याने पाहून सकारात्मक निर्णय घ्यावा, अशी अपेक्षा स्थानिक नागरिकांकडून व्यक्त केली जात आहे.

येरवड्यातील प्रभाग क्रमांक दोन येथील अग्रसेन हायस्कूल ते कॉमरझोन रस्त्यावर मोठ्या व्यासाच्या पावसाळी वाहिन्या बसवण्याचे काम संथ गतीने सुरू असून कामाच्या ठिकाणी सुरक्षेच्या कोणते उपाय योजना न केल्यामुळे गंभीर अपघाताचा धोका निर्माण झालेला आहे. याप्रकरणी तक्रार दिल्यानंतर तात्काळ कामाला सुरुवात करण्यात येईल असे मलनिस्सारण विभागाच्या अधिकाऱ्यांनी सांगितले.

येथील अग्रसेन हायस्कूल ते कॉमरझोन रस्त्यावर दरवर्षी पावसात मोठ्या प्रमाणावर पाणी साचल्यामुळे अनेकदा लहान मोठे अपघात वाहतूक कोंडी यामुळे नागरिकांचे हाल होत असतात. यावर्षी पावसाळ्यापूर्वी या महत्त्वपूर्ण कामासाठी महापालिका प्रशासनाला मुहूर्त सापडला. मागील महिन्यात NDMA अंतर्गत मोठ्या व्यासाच्या पावसाळी वाहिन्या बसविण्यासाठी कामाला सुरुवात करण्यात आली. त्याकरिता रस्त्याच्या कडेने मोठ्या प्रमाणावर खोदाई करण्यात आली असून त्यामध्ये पाणी व गाळ साचलेला आहे. कॉमरझोन कडे वळताना हा मोठा खड्डा असून त्यामध्ये अनेक केबलच्या वाहिन्या अस्ताव्यस्त पडलेले आहेत. खोदाई केलेला राडाराडा देखील रस्त्याच्या जवळपास अर्ध्यापेक्षा जास्त भागापर्यंत पसरलेला आहे.

या परिसरात दोन मोठ्या शाळा असून कॉमरझोन आयटी पार्क मुळे मोठ्या प्रमाणावर वाहनांची वर्दळ असते. एकंदरीत या सर्व परिस्थितीत या ठिकाणी मोठा गंभीर स्वरूपाचा अपघात होण्याची शक्यता नाकारता येत नाही. सदरचे काम पंधरा दिवसांपासून बंदच असल्याचे लक्षात आले. अधिकाऱ्यांकडे चौकशी केली असता तातडीने काम सुरू करण्याच्या सूचना देण्यात आल्याचे सांगण्यात आले. मात्र एकाच वेळी ड्रेनेज विभागाचे काम सुरू असताना त्यामध्ये वेगवेगळ्या प्रकारच्या केबल वाहिन्या देखील टाकण्यात येत असल्याचे लक्षात येते. कदाचित एका कामासाठी परवानगी घेऊन इतर विभागाची खाजगी ठेकेदारांची कामे अधिकाऱ्यांना हाताशी पकडून कदाचित सुरू असावीत अशी देखील शंका निर्माण होत आहे.

एकंदरीतच पावसाळी वाहिन्यांच्या महत्त्वाच्या कामांमध्ये अशाप्रकारे ठेकेदाराकडून कामाला होणारा विलंब, अधिकाऱ्यांचे दुर्लक्ष यामुळे या ठिकाणी महापालिका प्रशासनाकडून सर्वकाही अलबेल असल्याचे लक्षात येते. सदर ठिकाणी तातडीने कामाला सुरुवात करून सुरक्षेच्या सर्व उपाययोजनांसह काम लवकरात लवकर वेळेत पूर्ण करावे. तसेच कामासाठी विलंब करणारे ठेकेदार व दुर्लक्ष करणारे संबंधित विभागाचे अधिकारी यांच्यावर देखील कारवाईची मागणी राष्ट्रवादी काँग्रेस पक्षाच्या सामाजिक न्याय विभागाचे कार्याध्यक्ष निखिल गायकवाड यांनी महापालिका प्रशासनाकडे केली आहे.

पुणे – भामा आसखेड प्रकल्पातून शुद्ध पाणीपुरवठा होईपर्यंत यावर अवलंबून असणाऱ्या भागात दिवसभर पाणीपुरवठा करण्याचे नियोजन करू नये, अशा सूचना महापालिका आयुक्त नवल किशोर राम यांनी दिल्या आहेत. शहराच्या पूर्व भागातील दूषित पाणीपुरवठ्याच्या गंभीर समस्ये संदर्भात महापालिका आयुक्तांनी भामा आसखेड प्रकल्प जलशुद्धीकरण केंद्राला स्थानिक लोकप्रतिनिधींसह नुकतीच भेट दिली.

यावेळी नगरसेविका अश्विनी भंडारे, संगीता दांगट, नंदिनी धेंडे, शीतल सावंत, नगरसेवक अनिल टिंगरे, रवी उर्फ हर्षल टिंगरे, सुहास टिंगरे, अनिल सातव, रामदास दाभाडे यांच्या सह माजी उपमहापौर डॉ. सिद्धार्थ धेंडे, माजी नगरसेवक राहुल भंडारे महापालिकेच्या पाणीपुरवठा विभागाचे अधिकारी व कर्मचारी उपस्थित होते.
पुणे शहराच्या उत्तर पूर्व भागातील गढूळ आणि पिवळसर तसेच अपुऱ्या कमी दाबाने होणाऱ्या पाणीपुरवठ्या संदर्भात स्थानिक लोकप्रतिनिधी तसेच नागरिकांनी महापालिका आयुक्तांची भेट घेतली. जलशुद्धीकरण प्रकल्पामध्ये पाणी कशाप्रकारे शुद्ध केले जाते याचा प्रत्यक्ष आढावा त्यांनी यावेळी घेतला. तज्ञांच्या मदतीने गढूळ पिवळसर पाण्याच्या तक्रारीचे पुढील दोन दिवसात निराकरण करण्याचे आदेश महापालिका आयुक्तांनी यावेळी दिले. तज्ञांच्या पाहणीनंतर व त्यांच्या निष्कर्षानंतर यावर उपाययोजना होईल असे त्यांनी यावेळी स्पष्ट करण्यात आलं. भामा आसखेड प्रकल्पाच्या वारंवार खंडित होणाऱ्या विद्युत पुरवठ्याच्या अनुषंगाने MSEDCL विभागाचे अधीक्षक अभियंता यांच्या समवेत बैठक आयोजित करण्याबाबत देखील महापालिका आयुक्त यांनी आदेश दिले आहेत.

पुणे महापालिकेत पाण्याचे राजकारण
एकंदरीतच या गंभीर समस्येला महिना उलटला तरी महापालिका प्रशासनाला यावर उपाययोजना करता आली नाही. प्रभाग दोनच्या राष्ट्रवादी काँग्रेस पक्षाच्या नगरसेवकांनी महापालिका आयुक्त कार्यालयावर आंदोलन करून उपाययोजना करण्याची मागणी केली. तर सत्ताधारी भाजपच्या लोकप्रतिनिधींनी महापालिका प्रशासनाच्या चुकांची पाठराखण करत सोयीच्या भूमिका घेत उपाययोजना कराव्यात, अशी मागणी केली. वडगाव शेरी विधानसभा मतदारसंघाचे राष्ट्रवादी शरद पवार गटाचे आमदार बापू पठारे यांनी देखील दोन वेळा भामा आसखेड प्रकल्पाला भेट दिली. एकंदरीतच पाण्याच्या या गंभीर समस्येबाबत सत्ताधारी भाजप व सत्तेत असूनही प्रशासनावर पकड नसणाऱ्या राष्ट्रवादी काँग्रेस पक्षाचा दुटप्पीपणा या निमित्ताने पुन्हा एकदा जनतेसमोर आला आहे. सत्तेत असणारा भाजप पिण्याच्या पाण्याची समस्या सोडवण्यात ठरत असून महापौरांनी आदेश देऊन देखील प्रशासनाने त्याकडे दुर्लक्ष केल्याचे लक्षात येते. तर भाजपसोबत राज्यात सत्तेत असणाऱ्या राष्ट्रवादी काँग्रेस पक्षाला महापालिकेत प्रशासनावर स्वतःची पकड निर्माण करता न आल्यामुळे आता पक्षावर आंदोलनाची वेळ आली आहे. त्यामुळे एकंदरीतच भाजप आणि राष्ट्रवादी यामधील धूसफूस या निमित्ताने पुन्हा एकदा पुणेकरांना दिसून येत आहे.

बापू पठारेंना स्पष्ट भूमिकाच घेता येईना

विद्यमान आमदार बापू पठारे यांच्या घरात मुलगा आणि सून हे भाजपचे नगरसेवक असल्यामुळे मतदारसंघात काम करताना त्यांनाही स्पष्ट भूमिका घेता येत नसल्याचे दिसून येत आहे. पिण्याच्या पाण्याची ही गंभीर समस्या महापालिका आयुक्त तरी किती गांभीर्याने सोडवतात हे पाहणे आता गरजेचे आहे.

भालेकर उद्यानाच्या सीमाभिंतीलगत असलेल्या पदपथावर नियमितपणे कचरा टाकला जात असल्याने त्या ठिकाणी अक्षरशः कचरा डेपो तयार झाला होता. पदपथावर कचऱ्याचे ढीग साचल्याने दुर्गंधी, अस्वच्छता आणि घुशींचा वाढता प्रादुर्भाव यामुळे परिसरातील नागरिकांचे आरोग्य धोक्यात आले होते. सकाळी आणि सायंकाळी फिरण्यासाठी येणाऱ्या ज्येष्ठ नागरिक, महिला आणि लहान मुलांना या परिस्थितीचा मोठा त्रास सहन करावा लागत होता.

स्थानिक नागरिकांच्या मते, काही दिवसांपूर्वी स्वच्छ संस्थेकडून याच ठिकाणी फिडर पॉईंट उभारण्यात आल्याने कचऱ्याचे प्रमाण आणखी वाढले. कचऱ्यामुळे घुशींची संख्या वाढून त्यांनी उद्यानाच्या सीमाभिंतीखाली बिळे केल्याने भिंतीची मजबुतीही धोक्यात आली होती. त्यामुळे भविष्यात अपघात होण्याची शक्यता व्यक्त केली जात होती. काही दिवसांपूर्वी याबाबत लक्ष्मी नारायण सोसायटीच्या वतीने तसेच प्रतीक नलावडे यांच्याकडूनही क्षेत्रीय कार्यालयात तक्रारही देण्यात आली होती.

विशेष म्हणजे पदपथावर मोठ्या प्रमाणात कचरा साचल्यामुळे पादचाऱ्यांना पदपथाऐवजी रस्त्यावरून चालावे लागत होते. त्यामुळे वाहतुकीच्या दृष्टीनेही धोका निर्माण झाला होता.

या पार्श्वभूमीवर सिंहासन News ने या प्रश्नावर सविस्तर व्हिडिओ वृत्त प्रसारित करून प्रशासनाचे लक्ष वेधले. वृत्त प्रसारित होताच नगरसेविका तेजश्री महेश पवळे यांनी तत्काळ घटनास्थळी भेट दिली. त्यांनी महापालिकेच्या आरोग्य विभागातील अधिकाऱ्यांना जागेवर बोलावून घेत कचऱ्याच्या समस्येबाबत तीव्र नाराजी व्यक्त केली. नागरिकांच्या आरोग्याशी संबंधित प्रश्नांकडे दुर्लक्ष का करण्यात आले, असा जाबही त्यांनी अधिकाऱ्यांना विचारला.

केवळ सूचना देऊन न थांबता पवळे यांनी स्वतः घटनास्थळी उपस्थित राहून महापालिकेच्या कर्मचाऱ्यांकडून संपूर्ण पदपथाची साफसफाई करून घेतली. काही तासांतच कचऱ्याचे ढीग हटवण्यात आले आणि पदपथ नागरिकांसाठी मोकळा करण्यात आला. स्वच्छ झालेला परिसर पाहून स्थानिक नागरिकांनी समाधान व्यक्त केले असून नगरसेविका तेजश्री पवळे यांच्या तत्परतेचे कौतुक केले जात आहे.

तेजश्री पवळे म्हणाल्या की, “नागरिकांच्या आरोग्याशी आणि सुरक्षेशी संबंधित कोणत्याही प्रश्नाबाबत हलगर्जीपणा सहन केला जाणार नाही. भालेकर उद्यान परिसरातील हा प्रश्न कायमस्वरूपी मार्गी लागावा यासाठी योग्य नियोजन केले जाईल. पदपथावर पुन्हा कचरा साचणार नाही यासाठी आरोग्य विभाग आणि संबंधित यंत्रणांना आवश्यक सूचना देण्यात आल्या आहेत.”

डहाणूकर कॉलनी व कोथरूड गावठाण आरोग्य कोठीच्या वतीने गेली वीस वर्षे सातत्याने जागतिक तंबाखू निषेध जनजागृती मोहीम राबविली जात असून, यंदाही हा उपक्रम उत्साहात पार पडला. वरिष्ठ आरोग्य निरीक्षक राम सोनवणे यांच्या नेतृत्वाखाली ही मोहीम राबविण्यात आली.

या मोहिमेद्वारे तंबाखू सेवनामुळे होणारे शारीरिक, मानसिक व आर्थिक दुष्परिणाम तसेच विविध गंभीर आजारांविषयी नागरिकांमध्ये जागरूकता निर्माण करण्यात आली. जागतिक आरोग्य संघटनेच्या आकडेवारीनुसार तंबाखू सेवनामुळे दरवर्षी जगभरात लाखो लोकांचा अकाली मृत्यू होतो. तंबाखूमधील निकोटीनमुळे कर्करोग, फुफ्फुसांचे विकार, घशाचे आजार, तोंडाचा कर्करोग, हृदयविकार तसेच श्वसनसंस्थेशी संबंधित गंभीर आजार होऊ शकतात, याबाबत नागरिकांना माहिती देण्यात आली.
भारतामध्ये दरवर्षी सुमारे दहा लाख लोकांचा मृत्यू तंबाखूजन्य पदार्थांच्या सेवनामुळे होत असल्याचे सांगत, विशेषतः तरुणांनी विडी, सिगारेट, गुटखा व इतर तंबाखूजन्य पदार्थांपासून दूर राहावे, असे आवाहन करण्यात आले. व्यसनाधीनतेमुळे शारीरिक व मानसिक आरोग्याबरोबरच शैक्षणिक, आर्थिक नुकसान होऊन गुन्हेगारी प्रवृत्तीलाही खतपाणी मिळते, याकडेही लक्ष वेधण्यात आले.

ही जनजागृती मोहीम डहाणूकर कॉलनी, गोपीनाथ नगर, कोथरूड गावठाण, गाढवे कॉलनी, शास्त्री नगर, मुठेश्वर कॉलनी, नवभूमी चौक, विवेकानंद कॉलनी, आझाद वाडी, गुजरात कॉलनी, मयूर कॉलनी, हनुमान नगर, केळेवाडी, किष्किंधा नगर, भीमनगर, परमहंस नगर, श्रावणधारा वसाहत आणि भुसारी कॉलनी या परिसरांमध्ये राबविण्यात आली. मोहीमेदरम्यान “पान, तंबाखू, गुटखा खाऊन आपले आरोग्य धोक्यात आणू नका”, “सार्वजनिक ठिकाणी थुंकून घाण करू नका”, “विडी-सिगारेट ओढू नका, कर्करोगाला आमंत्रण देऊ नका” तसेच “तंबाखूजन्य पदार्थांचे सेवन टाळा, निरोगी जीवन जगा” अशा घोषणांद्वारे नागरिकांमध्ये जनजागृती करण्यात आली.

पुणे महापालिकेच्या घनकचरा व्यवस्थापन विभागाचे उपायुक्त संतोष वारुळे, परिमंडळ कार्यालय क्रमांक ४ चे उपायुक्त अविनाश सकपाळ आणि महापालिका सहाय्यक आयुक्त सुहास जाधव यांच्या मार्गदर्शनाखाली वरिष्ठ आरोग्य निरीक्षक राम सोनवणे यांच्या नेतृत्वात आरोग्य निरीक्षक करण कुंभार, लक्ष्मीकांत कुलकर्णी, दत्तात्रय दळवी, किरण जाधव, गणेश साठे, जया सांगडे, प्रमोद चव्हाण, निसार शेख, गणेश चोंधे, सचिन सावंत, राजेश आहेर,मोकादम वैजीनाथ गायकवाड, आण्णा ढावरे, अशोक कांबळे, सचिन लोंढे, अक्षय अवघडे, दिनेश नागटिळक, आकाश देवकुळे, ओंकार सोनकांबळे, राहुल चव्हाण, मधुकर वाघमारे यांच्यासह आरोग्य विभागाच्या कर्मचाऱ्यांनी मोहिमेच्या यशस्वी आयोजनासाठी विशेष परिश्रम घेतले.

पुणे : कोथरूड परिसरातील डीपी रोडवरील एकलव्य कॉलेजजवळ सुरू असलेल्या एका बांधकाम प्रकल्पाला पुणे महापालिकेच्या बांधकाम विभागाने काम तात्काळ थांबवण्याची नोटीस बजावली आहे. संबंधित जागेच्या मोजणीचा नकाशा भूमी अभिलेख विभागाकडून रद्द करण्यात आल्याने ही कारवाई करण्यात आली आहे.

पुणे महापालिकेच्या बांधकाम विकास झोन क्रमांक ३ अंतर्गत उपअभियंता आणि कनिष्ठ अभियंता यांनी यशोदा डेव्हलपर्सचे भागीदार अनिकेत रामदास ढोरे तसेच परवानाधारक वास्तुविशारद साची अरोरा यांना नोटीस पाठवून बांधकामाचे सर्व काम तात्काळ थांबवण्याचे आदेश दिले आहेत.

कोथरूड (नवीन हद्द) येथील सर्व्हे क्रमांक ७९/४/५अ/१ या मिळकतीवर नव्या बांधकामासाठी सीसी/२६३६/२४ या परवानगीनुसार दिनांक ६ डिसेंबर २०२४ रोजी बांधकाम नकाशे मंजूर करण्यात आले होते. त्यानुसार यशोदा डेव्हलपर्सकडून निवासी प्रकल्प विकसित करण्यात येत आहे. मात्र, संबंधित जागेच्या मोजणीवर आक्षेप घेत भूमी अभिलेख विभागाकडे अपील दाखल करण्यात आले होते.

सदर मिळकतीवर उप अधिक्षक, भूमि अभिलेख, हवेली यांचे कार्यालयाकडून  दि.०५/०२/२०२४ रोजी देण्यात आलेल्या मोजणी नकाशावर प्रभाकर मुसळे, जिल्हा अधिक्षक, भूमि अभिलेख, पुणे यांचे पिठासनासमोर पंढरीनाथ महिपती बांदल विरूध्द उप अधिक्षक, भूमि अभिलेख, हवेली, सिताराम महिपती बांदल व इतर ३ यांचे अपिल अर्जानुसार दि.०५/०२/२०२४ अन्वये केलेली मोजणीचा नकाशा रद्द करण्यात येत असलेबाबत आदेश काढण्यात आलेले आहेत.

या आदेशाच्या पार्श्वभूमीवर पुणे महापालिकेने संबंधित बांधकाम प्रकल्पाचे काम तात्काळ थांबवण्याचे निर्देश दिले आहेत. तसेच नोटीस मिळाल्यानंतरही बांधकाम सुरू ठेवल्यास संबंधितांवर कायदेशीर कारवाई करण्यात येईल, असा स्पष्ट इशाराही देण्यात आला आहे.

दरम्यान, मोजणीचा नकाशा रद्द झाल्यानंतरही संबंधित विकासकाकडून बांधकाम सुरू ठेवण्याचा प्रयत्न होत आहे. तसेच सदर जागेच्या मोजणीबाबतचा वाद न्यायप्रविष्ट असल्याची आणि प्रकरणात गंभीर कायदेशीर अडचणी असल्याची माहिती ग्राहकांपासून लपवून फ्लॅट बुकिंग करण्यात आल्याचा आरोप करत माजी नगरसेवक किरण दगडे पाटील यांनी कोथरूड पोलीस ठाण्याचे वरिष्ठ पोलीस निरीक्षक यांच्याकडे लेखी निवेदन देऊन संबंधित विकासकाविरोधात फौजदारी गुन्हा दाखल करण्याची मागणी केली आहे.

न्यायालयीन वाद आणि मोजणी संदर्भातील अडचणींची कल्पना असतानाही सर्वसामान्य नागरिकांकडून मोठ्या प्रमाणावर पैसे स्वीकारून फ्लॅट बुकिंग करण्यात आले. त्यामुळे नागरिकांची दिशाभूल झाली असून त्यांच्या आयुष्यभराच्या बचतीची फसवणूक झाल्याचा आरोप करण्यात आला आहे. नागरिकांना वस्तुस्थितीपासून अंधारात ठेवून गुंतवणूक करण्यास प्रवृत्त करणे हे गंभीर आर्थिक फसवणूक, विश्वासघात आणि कपटपूर्ण व्यवहाराच्या स्वरूपाचे असल्याने संबंधित विकासकावर तात्काळ गुन्हा दाखल करून चौकशी करण्यात यावी, अशी मागणी किरण दगडे पाटील यांच्याकडून पोलिसांकडे करण्यात आली आहे.

या संदर्भात बांधकाम विभागाच्या अधिकाऱ्यांशी संपर्क साधला असता त्यांनी संबंधित बांधकाम व्यावसायिकांना स्टॉप वर्क ची ऑर्डर देण्यात आली असून त्यानुसार पुढील कारवाई करण्यात येईल असे त्यांच्याकडून सांगण्यात आले.

सत्कार समारंभात भावना व्यक्त करताना सुवर्णा पवार म्हणाल्या, “सर्व अधिकारी, मोकादम आणि सहकारी सेवक यांच्या पाठिंब्यामुळेच मी रात्रपाळीच्या शाळेत प्रवेश घेऊन दहावीची परीक्षा उत्तीर्ण होऊ शकले. या यशाचे सर्व श्रेय माझ्या सहकाऱ्यांना आणि मार्गदर्शन करणाऱ्या अधिकाऱ्यांना जाते.”

सुवर्णा पवार यांचे बालपण अत्यंत हालाखीच्या परिस्थितीत गेले. त्यांचे माहेरचे नाव सुवर्णा लक्ष्मण अवघडे असून, मोलमजुरी करणारे आई-वडील विमल आणि लक्ष्मण अवघडे यांच्या पोटी त्यांचा जन्म झाला. माहेरी नववीपर्यंत शिक्षण घेतल्यानंतर त्यांचा विवाह मजूर कामगार सोमनाथ पवार यांच्याशी झाला. आर्थिक परिस्थिती अत्यंत बिकट असल्याने त्यांना शिक्षण अर्धवट सोडावे लागले. लग्नानंतरही परिस्थितीत फारसा बदल झाला नाही. पतीचे १३ वर्षांपूर्वी अकाली निधन झाल्यानंतर संसाराची सर्व जबाबदारी त्यांच्या खांद्यावर आली. मुलीचे संगोपन आणि उदरनिर्वाहासाठी त्यांनी कचरा वेचणे, धुणीभांडी करणे, बांधकामावर मजुरी करणे, डोक्यावर वाळू-विटा वाहून नेणे अशी अनेक कष्टाची कामे केली.

त्यानंतर पुणे महानगरपालिकेच्या घोले रोड क्षेत्रीय कार्यालयात सार्वजनिक स्वच्छता विभागात कंत्राटी महिला सफाई कामगार म्हणून त्या काम करू लागल्या. कामगार युनियनच्या माध्यमातून त्यांचा “आता थांबायचं नाय” या चित्रपटाशी परिचय झाला आणि त्यातूनच शिक्षण पूर्ण करण्याची प्रेरणा मिळाली. “मला शिकून वेगळं काहीतरी करायचं आहे. माझ्या मुलीला चांगलं शिक्षण द्यायचं आहे. तसेच इतर कामगारांनीही शिक्षण घ्यावं,” अशा भावना त्यांनी यावेळी व्यक्त केल्या

कोथरूड : “स्वच्छ भारत अभियान, स्वच्छ सर्वेक्षण मिशन – २०२६, स्वच्छता पूर्व पुरस्कार” अन्वये प्रभाग क्रमांक १०, शास्त्री नगर परिसरात “स्वच्छता पंधरवडा दिन” हा कार्यक्रम आयोजित करण्यात आला होता.

स्वच्छता पंधरवडा दिन जनजागृती मोहिम हा उपक्रम घनकचरा व्यवस्थापन उपायुक्त संतोष वारुळे, परिमंडळ कार्यालय क्रं. २ चे उपायुक्त अविनाश सकपाळ यांच्या मार्गदर्शना खाली आयोजित करण्यात आला. स्वच्छता पंधरवडा दिनानिमित्त राबवण्यात येणाऱ्या स्वच्छतेच्या उपक्रमात प्रत्यक्ष स्थानिक नागरिकांचा सहभाग वाढवा, परिसरातील सार्वजनिक रस्त्यावर पडणारा कचरा कायम स्वरूपी बंद व्हावा, परिसर स्वच्छ व सुंदर ठेवण्यासाठी प्रत्येक गल्लीमध्ये वास्तव्य करणाऱ्या नागरिकांच्या स्वच्छतेच्या अडचणी समजून घेऊन त्यांचा वर्गीकृत केलेला कचरा जमा कसा करता येईल याविषयी नियोजन करण्याच्या सुचना महापालिका सहाय्यक आयुक्त सुहास जाधव, वरिष्ठ आरोग्य निरिक्षक गणेश खिरिड, राम सोनवणे यांनी दिल्या.

सदर कार्यक्रम आरोग्य निरिक्षक लक्ष्मीकांत कुलकर्णी, दत्तात्रय दळवी, उमेश शिंदे मोकादम वैजीनाथ गायकवाड, अशोक कांबळे, साईनाथ तेलंगी, सचिन लोंढे, रोहित जाधव, गणेश चव्हाण ईत्यादीनी कचरा पडणाऱ्या ठिकाणी सडा व रांगोळी काढून परिसर स्वच्छ कसा करता येईल याविषयी सुक्ष्म नियोजन करण्यासाठी  निर्धार केला.   
        

महानगरपालिकेच्या शास्त्रीनगर  परिसरातील पी. एम. सी. कॉलनी, साईनाथ वसाहत, मुठेश्वर कॉलनी, श्रीकृष्ण कॉलनी, गाढवे कॉलनी, पोष्टमन कॉलनी इत्यादी परिसरातील विविध पक्षाचे लोकप्रतिनिधी, नगरसेविका रूपाली  पवार, स्थानिक गणेश मंडळे तसेच विविध संस्थाचे सामाजिक कार्यकर्ते  कैलास मोहोळ, नागेश गायकवाड, सचिन डाकले, बाळू शेडगे, ओंकार ठाकूर जेष्ठ नागरिक राम कोकरे  व इतर नागरिक, सफाई सेवक, स्वच्छ सहकारी संस्थेचे मुख्य समन्वयक शिवाजी सकट कोठी समन्वयक अक्षय रूपटके, मंदा रणसिंग, काजल नाईकनवरे, वैशाली घरटे, धनश्री क्षिरसागर, तेजल सावर शिवाय इतर कचरा वेचक स्वच्छता जनजागृती प्रचार फेरी मध्ये सहभागी झाले.
          

सदर जनजागृती स्वच्छता प्रचार फेरीत सार्वजनिक ठिकाणी मिश्रीत कचरा टाकू नका, आपला परिसर स्वच्छ ठेवा, कागदी व कापडी पिशव्यांचा वापर करा, पाणि जपून वापरा, गोवा, गुटखा व तंबाखू खाऊन थुंकू नका, सार्वजनिक व आपला परिसर स्वच्छ ठेवण्यास स्वच्छता कर्मचाऱ्यांना साथ करा असे आवाहन करण्यात आले.