पुणे : दि पूना प्रेस ओनर्स असोसिएशन लिमिटेड, पुणे यांच्या १०७ व्या वर्धापन दिनाचा सोहळा नुकताच टिळक रोड, स्वारगेट येथील डॉ. नीतू मांडके सभागृहात उत्साहात पार पडला. या कार्यक्रमाला मुद्रण व्यवसायातील सभासदांसह त्यांच्या कुटुंबीयांची मोठ्या संख्येने उपस्थिती होती.

सोहळ्याचे प्रमुख पाहुणे म्हणून प्रसिद्ध बिझनेस कोच चकोर गांधी उपस्थित होते. त्यांनी मुद्रण व्यवसायातील बदलती आव्हाने, संघटनशक्ती, व्यवसायवृद्धी आणि आधुनिक काळातील यशस्वी वाटचालीसाठी आवश्यक बाबींवर मार्गदर्शन केले. त्यांच्या प्रेरणादायी विचारांना उपस्थितांनी उत्स्फूर्त प्रतिसाद दिला.

यावेळी मुद्रण कला जीवनगौरव पुरस्कार दीपक ढोले-पाटील यांना प्रदान करण्यात आला. तसेच ज्येष्ठ सभासद रमेश कुंदुर, भाऊसाहेब सहस्त्रबुद्धे आणि मुकुंद कडूसकर यांचा अमृतमहोत्सवानिमित्त विशेष सत्कार करण्यात आला.

कार्यक्रमात दहावी, बारावी, डिप्लोमा आणि पदवी परीक्षांमध्ये उल्लेखनीय यश संपादन केलेल्या गुणवंत विद्यार्थ्यांचा गौरव करण्यात आला. कोथरूड येथील वर्धमान प्रेसचे संचालक प्रीतम पोपटलाल मेहता यांचे चिरंजीव हर्ष प्रीतम मेहता यांच्यासह अन्य विद्यार्थ्यांचा विशेष गौरव करण्यात आला.

सोहळ्यानिमित्त आयोजित करण्यात आलेल्या “सुरमई शाम” या मनोरंजनपर गीतांच्या कार्यक्रमाने उपस्थितांची मने जिंकली. त्यानंतर स्नेहभोजनाने कार्यक्रमाची सांगता झाली.

कार्यक्रमाच्या यशस्वी आयोजनासाठी अध्यक्ष राहुल मारुलकर, उपाध्यक्ष किशोर गोरे, चिटणीस गिरीश राव तसेच दि पूना प्रेस ओनर्स असोसिएशन लिमिटेडच्या सर्व कार्यकारी संचालक मंडळाने विशेष परिश्रम घेतले.

पुणे : रहस्यकथा बुद्धीरंजनाकडे नेते आणि चांगला विनोद ताण हलका करतो. समाजात जेव्हा द्वेष, त्वेष, संभ्रम, गोंधळाची अवस्था असते. उत्तम आदर्श नसतात. तेव्हा ताणविरहित करणारा उत्तम विनोद आणि बुद्धीरंजन करणाऱ्या रहस्यकथा यांची आवश्यकता असते. लेखक मुकुंद टाकसाळे आणि सौरभ वागळे यांनी आपल्या लेखनातून ही आवश्यकता पूर्ण करावी, असे प्रतिपादन ज्येष्ठ साहित्यिक भारत सासणे यांनी रविवारी येथे केले.

महाराष्ट्र साहित्य परिषदेतर्फे उत्कृष्ट विनोदी लेखनासाठीचा पी. जी. वुडहाऊस विशेष साहित्य पुरस्कार प्रसिद्ध लेखक मुकुंद टाकसाळे यांना तर उत्कृष्ट रहस्यकथालेखनासाठीचा अगाथा ख्रिस्टी पुरस्कार सौरभ वागळे यांना सासणे यांच्या हस्ते प्रदान करण्यात आला. यावेळी ते बोलत होते. वुडहाऊस पुरस्कार रा. द. पुसाळकर तर अगाथा ख्रिस्टी पुरस्कार इंदुमती पुसाळकर यांच्या स्मृत्यर्थ पुरस्कृत करण्यात आले आहेत. देणगीदार आणि ज्येष्ठ लेखिका भारती पांडे यांची प्रमुख उपस्थिती होती. मसापचे कार्यवाह सुनील महाजन अध्यक्षपदी होते. कार्यवाह सुनेत्रा मंकणी, अंजली कुलकर्णी हेही उपस्थित होते. सन्मानपत्र, आठ हजार रुपये असे पुरस्काराचे स्वरूप होते. साहित्य परिषदेच्या माधवराव पटवर्धन सभागृहात कार्यक्रमाचे आयोजन करण्यात आले होते.

सासणे यांनी मराठीतील रहस्यकथालेखनाची परंपरा तसेच विनोदी लेखन करणाऱ्या पूर्वसुरींचा आदरपूर्वक उल्लेख करत, विनोदी लेखनाची परंपरा क्षीण झाल्याचा उल्लेख केला. निर्विष विनोद समाजातील ताण कमी करतो. स्वातंत्र्यपूर्व काळात रहस्यकथा शिष्टसंमत मानल्या जात नसत. समाजाला उसंत नसताना बुद्धीरंजन वा मनोरंजन नको वाटते. सध्या विरोधाभासांत विभागलेला समाज दुःखी आहे. तो हसणे विसरला आहे. त्यामुळे टाकसाळे यांनी पुन्हा उत्तम विनोदी कादंबरीलेखन करावे आणि हसण्याचे पुनरुज्जीवन करावे. तुलनेने मराठीत रहस्यकथालेखन चांगले होत आहे. सौरभ यांच्या अल्फा या रहस्यकथानायकाच्या मालिका याव्यात, त्याचे अनुवाद व्हावेत, असेही ते म्हणाले.

मनोगत मांडताना सौरभ वागळे म्हणाले, वडिलांनी रहस्य आणि विज्ञानकथांचा संग्रह केला, म्हणून मला त्या साहित्यप्रकाराची गोडी व छंद लागला. त्यातूनच पुढे माझे लेखन होत गेले. अनिकेत लक्ष्मण फाळके उर्फ अल्फाची ९ पुस्तके सध्या आहेत. वाचकांचा उत्तम प्रतिसाद असल्याने पुढील भागही येत राहतील. माझ्या बाबतीत वाचकांचा सकारात्मक प्रतिसाद हीच प्रेरणा आणि प्रोत्साहन देणारी आहे. माझ्या लेखनाचा अगाथा ख्रिस्टी यांच्या नावाचा पुरस्कार मिळणे, हा मोठा गौरव आहे.

मुकुंद टाकसाळे यांनी वुडहाऊस यांच्या नावाचा पुरस्कार भारत सासणे यांच्यासारख्या ज्येष्ठ साहित्यिकाच्या हस्ते मिळणे, हा मोठा सन्मान असल्याची भावना व्यक्त केली. वुडहाऊसशी माझे जुने नाते आहे. वुडहाऊस वाचण्याचा सल्ला पुलंनी दिला होता. वुडहाऊसचे प्रवाही लेखन मला आवडते, असे ते म्हणाले. मृणालिनी चितळे यांनी सूत्रसंचालन केले. अंजली कुलकर्णी यांनी आभार मानले.

या आदेशानुसार दि. १५ जून २०२६ रोजी रात्री १२ वाजल्यापासून ते दि. २४ जून २०२६ रोजी रात्री १२ वाजेपर्यंत पुणे शहरातून इतर शहरांकडे जाणाऱ्या जड-अवजड वाहनांना शहरात प्रवेश करता येणार नाही. संबंधित वाहनांसाठी सोलापूर, मुंबई, अहिल्यानगर, सासवड, चाकण, शिक्रापूर, तळेगाव, जेजुरी, सुपे आदी मार्गांद्वारे पर्यायी मार्ग निश्चित करण्यात आले आहेत.

शहरात माल उतरविणे अथवा माल भरून इतरत्र जाणे आवश्यक असलेल्या तसेच अत्यावश्यक सेवा पुरविणाऱ्या वाहनांनी वाहतूक शाखा, पुणे शहर यांची ७२ तास अगोदर परवानगी घेऊन रात्री ११ ते सकाळी ६ वाजेदरम्यान निर्धारित पर्यायी मार्गांचा वापर करावा, असे निर्देश देण्यात आले आहेत.

दरम्यान, पेट्रोल, डिझेल, दूध, शेतीमाल आदी अत्यावश्यक सेवा पुरविणाऱ्या वाहनांना या बंदी आदेशातून वगळण्यात आले आहे. नागरिकांनी व वाहनचालकांनी पर्यायी मार्गांचा वापर करून वाहतूक व्यवस्थेस सहकार्य करावे, असे आवाहन जिल्हादंडाधिकारी जितेंद्र डूडी यांनी केले आहे.

पुणे : राज्यातील स्थानिक स्वराज्य संस्था विधान परिषद निवडणुकीची रणधुमाळी सुरू झाली असून पुण्यातील जागेकडे संपूर्ण राज्याचे लक्ष लागले आहे. महायुतीमधील मित्रपक्ष असलेल्या भाजप आणि राष्ट्रवादी काँग्रेस या दोन्ही पक्षांनी पुण्याच्या जागेवर जोरदार दावा ठोकल्याने उमेदवारीबाबतची उत्सुकता शिगेला पोहोचली आहे. त्यामुळे ही जागा नेमकी कोणाच्या वाट्याला जाणार आणि उमेदवारीची माळ कोणाच्या गळ्यात पडणार याबाबत राजकीय वर्तुळात जोरदार चर्चा रंगू लागली आहे. पुण्याची जागा कोणाला सुटणार यावर आगदी उमेदवारी अर्ज दाखल करण्याच्या शेवटच्या दिवसापर्यंत म्हणजे १ जून २०२६ पर्यंत वाटाघाटी सुरू राहणार असल्याचे चित्र सध्या दिसत आहे.

पुणे जिल्ह्यातील स्थानिक स्वराज्य संस्थांमध्ये भाजप आणि राष्ट्रवादी काँग्रेस या दोन्ही पक्षांचे मजबूत संख्याबळ असल्याने दोन्ही पक्षांकडून या जागेवर हक्क सांगितला जात आहे. गेल्या काही वर्षांत पुणे जिल्ह्यात भाजपने महापालिका, जिल्हा परिषद, पंचायत समित्या तसेच नगरपालिकांमध्ये आपला प्रभाव वाढवला आहे. दुसरीकडे राष्ट्रवादी काँग्रेसनेही ग्रामीण भागात आपली पकड कायम ठेवत संघटनात्मक ताकद वाढवली आहे. त्यामुळे दोन्ही पक्ष ही जागा प्रतिष्ठेची मानत आहेत.

भाजपकडून संघटनात्मक काम करणाऱ्या आणि स्थानिक स्वराज्य संस्थांमध्ये प्रभाव असलेल्या काही नावांची चर्चा सुरू आहे.   दुसरीकडे राष्ट्रवादी काँग्रेसकडूनही पुण्यातील ग्रामीण आणि शहरी भागातील समन्वय साधू शकणाऱ्या नेत्याच्या नावावर विचार सुरू असल्याची माहिती सूत्रांकडून मिळत आहे.

महायुतीमध्ये जागावाटपाचा अंतिम निर्णय वरिष्ठ पातळीवर होणार असला तरी पुण्याची जागा सोडण्यास दोन्ही पक्ष फारसे तयार नसल्याचे चित्र आहे. दिवंगत उपमुख्यमंत्री अजित पवार हयात असते तर भाजपने या जागेसाठी एवढा जोर लावला नसता पण दादा नसल्याने त्याचा फायदा उठवण्याचा प्रयत्न भाजप करत असल्याची चर्चा सध्या सुरू आहे.

दरम्यान, विधान परिषद निवडणुकीच्या पार्श्वभूमीवर पुण्यातील राजकीय वातावरण तापू लागले असून संभाव्य उमेदवारांच्या भेटीगाठी, बैठका आणि मोर्चेबांधणीला वेग आला आहे. त्यामुळे पुण्याची जागा अखेर भाजपला मिळणार की राष्ट्रवादी काँग्रेसला, याकडे आता सर्वांचे लक्ष लागले आहे. दोन्ही पक्षातील शहरातील पदाधिकाऱ्यांनी पक्षाच्या वरिष्ठ नेत्यांकडे आपली बाजू वरचढ कशी हे सांगत जागा आपल्याच पक्षाला मिळावी यासाठी आग्रही भूमिका घेतली आहे.

काही दिवसांपूर्वी आमदार हेमंत रासने, सुनील कांबळे, राहुल कुल, शंकर जगताप, भीमराव तापकीर, माजी आमदार संजय जगताप, बाळा भेगडे, पुणे महानगरपालिकेचे सभागृह नेते गणेश बिडकर, जिल्हाध्यक्ष प्रदीप कंद यांनी मुख्यमंत्री देवेंद्र फडणवीस यांची भेट घेत जागा भाजपलाच सुटली पाहिजे व पक्षाने पुण्याचा जागेवरचा आग्रह सोडू नये अशी भूमिका मांडली आहे.

तर दुसरीकडे राष्ट्रवादी काँग्रेसचे मंत्री दत्तात्रय भरणे, सुनील टिंगरे, निलेश निकम,माजी उपमहापौर दीपक मानकर, विलास लांडे, सुरेश घुले, योगेश बहल या पुणे शहर व जिल्ह्यातील नेत्यांनीही पुण्याच्या जागेवर राष्ट्रवादी काँग्रेसचाच हक्क असल्याचे सांगत या जागेवर दावा सांगितला आहे. तर पक्षाच्या नेत्या आणि उपमुख्यमंत्री सुनेत्रा पवार यांच्याकडेही आपली भूमिका मांडली आहे.

भाजपचे महापालिकेतील सभागृहनेते गणेश बिडकर यांनी आमचे ३३३ मतदार असल्याचे सांगत या जागेवर ठाम दावा सांगितला आहे. तर त्याला प्रत्युत्तर देत सुनील टिंगरे, निलेश निकम यांनी आमचे ३४४ मतदार सदस्य असल्याचा दावा करत पुण्याच्या जागेवर राष्टवादीचाच स्वाभाविक हक्क आल्याचे सांगितले होते. त्यामुळे शहर पातळीवरील नेत्यांमध्ये जागेवर वाद सुरू असून ही जागा कोणाला सुटणार आणि मुख्यमंत्री देवेंद्र फडणवीस आणि उपमुख्यमंत्री सुनेत्रा पवार हा तिढा कसा सोडवणार हे पाहावे लागणार आहे. आगदी उमेदवारी अर्ज भरण्याच्या शेवटच्या दिवसापर्यंत हा वाद सुरू राहणार असल्याचे दिसत आहे.

या काळात खालील कृत्य करण्यास मनाई करण्यात आलेली आहे भाले, तलवारी, दंडकाठ्या, बंदुका अशी कोणतीही वस्तू बरोबर ठेवता येणार नाही,  दगड, शस्त्रे, अस्त्रे, फेकायची हत्यारे  जमा करणे किंवा तयार करणे यावर बंदी तसेच कोणत्याही व्यक्तीचे फोटो,प्रतिकात्मक प्रेत, नेत्यांचे चित्र दहन करणे, आक्षेपार्ह घोषणा देणे, सार्वजनिक टीका करणे, सार्वजनिक सुरक्षेला धोका पोहोचेल अशी भाषणे, वस्तू प्रसारित करणे, याला बंदी घालण्यात आलेले आहे .

नागरिकांनी या आदेशाचे काटेकोरपणे पालन करण्याचे आवाहन पुणे पोलिसांकडून करण्यात आले आहे. या आदेशाचे उल्लंघन करणाऱ्यांवर कायदेशीर कारवाई करण्यात येईल असे स्पष्ट सांगण्यात आले आहे.

सत्कार समारंभात भावना व्यक्त करताना सुवर्णा पवार म्हणाल्या, “सर्व अधिकारी, मोकादम आणि सहकारी सेवक यांच्या पाठिंब्यामुळेच मी रात्रपाळीच्या शाळेत प्रवेश घेऊन दहावीची परीक्षा उत्तीर्ण होऊ शकले. या यशाचे सर्व श्रेय माझ्या सहकाऱ्यांना आणि मार्गदर्शन करणाऱ्या अधिकाऱ्यांना जाते.”

सुवर्णा पवार यांचे बालपण अत्यंत हालाखीच्या परिस्थितीत गेले. त्यांचे माहेरचे नाव सुवर्णा लक्ष्मण अवघडे असून, मोलमजुरी करणारे आई-वडील विमल आणि लक्ष्मण अवघडे यांच्या पोटी त्यांचा जन्म झाला. माहेरी नववीपर्यंत शिक्षण घेतल्यानंतर त्यांचा विवाह मजूर कामगार सोमनाथ पवार यांच्याशी झाला. आर्थिक परिस्थिती अत्यंत बिकट असल्याने त्यांना शिक्षण अर्धवट सोडावे लागले. लग्नानंतरही परिस्थितीत फारसा बदल झाला नाही. पतीचे १३ वर्षांपूर्वी अकाली निधन झाल्यानंतर संसाराची सर्व जबाबदारी त्यांच्या खांद्यावर आली. मुलीचे संगोपन आणि उदरनिर्वाहासाठी त्यांनी कचरा वेचणे, धुणीभांडी करणे, बांधकामावर मजुरी करणे, डोक्यावर वाळू-विटा वाहून नेणे अशी अनेक कष्टाची कामे केली.

त्यानंतर पुणे महानगरपालिकेच्या घोले रोड क्षेत्रीय कार्यालयात सार्वजनिक स्वच्छता विभागात कंत्राटी महिला सफाई कामगार म्हणून त्या काम करू लागल्या. कामगार युनियनच्या माध्यमातून त्यांचा “आता थांबायचं नाय” या चित्रपटाशी परिचय झाला आणि त्यातूनच शिक्षण पूर्ण करण्याची प्रेरणा मिळाली. “मला शिकून वेगळं काहीतरी करायचं आहे. माझ्या मुलीला चांगलं शिक्षण द्यायचं आहे. तसेच इतर कामगारांनीही शिक्षण घ्यावं,” अशा भावना त्यांनी यावेळी व्यक्त केल्या

यावेळी बोलताना नगरसेवक किरण दगडे पाटील यांनी स्पष्ट शब्दांत सांगितले की, “माझा भाजी विक्रेत्यांना कधीच विरोध नव्हता आणि नसेलही. मात्र या खाद्यपदार्थ विक्री करणाऱ्या भ्रष्ट टेम्पो रॅकेटला आता बिलकुल सहन केले जाणार नाही.” पालिकेची कारवाईची माहिती मिळताच काही व्हॉट्सअॅप ग्रुपवर “आज कारवाई होणार, सावध राहा” असे संदेश पाठवले जातात. हे मेसेज पाठवणारे कोण आहेत ? पालिका अधिकारी यात सहभागी असल्याशिवाय असे मेसेज पुढे जाऊ शकत नाही. त्यामुळे कुंपणच शेत खात असल्याचे चित्र आहे.

लहान हातगाड्या व गरीब भाजी विक्रेत्यांवर कारवाई होत असताना मोठ्या टेम्पोंना संरक्षण मिळत असल्याचा संताप स्थानिक नागरिकांनी व्यक्त केला. स्थानिकांच्या म्हणण्यानुसार, रात्री उशिरापर्यंत हे टेम्पो सुरू राहत असून त्यामुळे परिसरात गर्दी वाढते, दारू पिणाऱ्यांचे टोळके जमा होतात आणि त्यामुळे गुन्हेगारीचा धोका वाढत आहे. याबाबत अनेकदा तक्रारी व निवेदने देऊनही प्रशासनाने ठोस कारवाई केली नसल्याचा आरोप केला जात आहे.

दरम्यान, नगरसेवक किरण दगडे पाटील यांनी प्रशासनाला इशारा देत अनधिकृत टेम्पो तात्काळ हटवून संबंधित भ्रष्ट अधिकाऱ्यांवर कठोर कारवाई करावी, माझी आजची कारवाई ही केवळ सुरुवात असून प्रशासनाने दुर्लक्ष केल्यास पुढील पाऊल अधिक आक्रमक व मोठ्या स्वरूपाचे असेल, असा इशाराही त्यांनी दिला.

पुणे : पुणे महानगरपालिकेच्या सन २०२६–२७ च्या अंदाजपत्रकावर झालेल्या चर्चेदरम्यान नगरसेवक हर्षवर्धन मानकर यांनी शहराच्या विकासाशी निगडित विविध महत्त्वाच्या मुद्द्यांवर ठाम आणि मुद्देसूद भूमिका मांडली.

यावेळी बोलताना हर्षवर्धन मानकर यांनी शिवसृष्टी प्रकल्पाचा मुद्दा विशेषत्वाने उपस्थित केला. ते म्हणाले, “माझे वडील, माजी उपमहापौर दीपक मानकर यांनी कोथरूडमधील कचरा डेपोच्या जागेवर शिवसृष्टी उभारण्याची संकल्पना मांडली होती. पुणे महानगरपालिकेत यावर ठराव करण्यात आला असून तेव्हापासून दरवर्षी अंदाजपत्रकात निधीची तरतूद केली जाते.
मुख्यमंत्री देवेंद्र फडणवीस यांनी बी.डी.पी. झोनमध्ये शिवसृष्टी उभारण्याचे आश्वासन दिले होते; मात्र शासन स्तरावर अद्याप कोणतीही ठोस कार्यवाही झालेली नाही. पुणे शहरात मोठे प्रकल्प राबवले जात असताना शिवसृष्टी प्रकल्पासाठीही आग्रही भूमिका घेऊन तातडीने कार्यवाही करण्यात यावी.”आहे ते म्हणाले.

पुणे शहराच्या वाढत्या गरजांचा विचार करता नियोजन वास्तववादी आणि परिणामकारक असणे आवश्यक असल्याचे त्यांनी नमूद केले. अंदाजपत्रकातील सकारात्मक बाबींचे स्वागत करतानाच अंमलबजावणीबाबत स्पष्टता आणि जबाबदारीची मागणी त्यांनी केली. पायाभूत सुविधांबाबत बोलताना शहरातील वाहतूक कोंडी, अपूर्ण रस्ते आणि खड्ड्यांच्या समस्यांवरही त्यांनी प्रशासनाचे लक्ष वेधले. पाणीपुरवठा विषयावर समान पाणीपुरवठा योजनेची प्रभावी अंमलबजावणी, पाणी गळती रोखणे आणि टंचाईग्रस्त भागांना प्राधान्य देणे आवश्यक असल्याचे मानकर यांनी सांगितले.

पुढे बोलताना त्यांनी घनकचरा व्यवस्थापनाबाबत बायोगॅस आणि झिरो स्लजसारख्या योजनांचे स्वागत करतानाच प्रत्यक्षात मनुष्यबळाच्या कमतरतेमुळे समस्या गंभीर असल्याचे त्यांनी निदर्शनास आणले आणि तातडीने उपाययोजना करण्याची मागणी केली.आरोग्य क्षेत्रात मल्टीस्पेशालिटी रुग्णालयांच्या घोषणांचे स्वागत करताना त्यांनी मनपाच्या अनेक रुग्णालयांमध्ये केवळ ओपीडीपुरत्याच सेवा उपलब्ध असल्याची बाब मांडली आणि सर्व सुविधा कार्यान्वित करण्याची मागणी केली. त्यांच्या प्रभागातील दवाखान्यातही विविध सुविधा उपलब्ध करून देण्याची अपेक्षा त्यांनी व्यक्त केली.

महिला सक्षमीकरणासाठी जाहीर केलेल्या योजनांचे स्वागत करताना जुन्या सार्वजनिक स्वच्छतागृहांची दुरवस्था दूर करण्यावरही त्यांनी भर दिला. शिक्षण क्षेत्रातील उपक्रमांचेही त्यांनी कौतुक केले. पर्यावरणाच्या दृष्टीने १० लाख झाडे लावण्याच्या संकल्पाचे स्वागत करत त्यांनी ती झाडे जगविण्यावर भर देण्याची गरज व्यक्त केली. तसेच आदरणीय अजितदादा पवार यांचे नाव शहरी गरीब योजनेला दिले त्याबद्दल दादांचा कार्यकर्ता म्हणून आभार व्यक्त केले.

बी.डी.पी. झोनमधील जागांचा वापर करून सीएसआरच्या माध्यमातून वृक्षारोपण केल्यास अनधिकृत बांधकामांवरही आळा बसेल, असे त्यांनी सुचवले. आर्थिक बाबींवर बोलताना मोठ्या थकबाकीदारांवर कारवाई होत नसल्याचा मुद्दा उपस्थित करत, सामान्य नागरिकांप्रमाणेच मोठ्या व्यावसायिकांवरही कठोर कारवाई करून थकबाकी वसूल करावी, अशी मागणी त्यांनी केली. चर्चेच्या शेवटी त्यांनी स्पष्ट केले की, “अंदाजपत्रक कागदावर आकर्षक असले तरी त्याची खरी कसोटी अंमलबजावणीत आहे. पुणेकरांना केवळ आश्वासने नकोत, तर प्रत्यक्ष परिणाम हवेत.” प्रत्येक प्रकल्पासाठी स्पष्ट वेळापत्रक, जबाबदारी आणि पारदर्शकता आवश्यक असल्याचे त्यांनी अधोरेखित केले. पुणे शहराचा विकास सर्वसमावेशक आणि सर्व घटकांपर्यंत पोहोचणारा असावा, हीच अपेक्षा मानकर यांनी व्यक्त केली.

सत्कारमूर्ती म्हणून प्रा.शीतल मोरे आणि  शुभदा गोडबोले यांचा गौरव करण्यात आला. त्यांच्या कार्याचा आढावा घेणाऱ्या मानपत्राचे वाचन प्रज्ञा वझे आणि  स्मिता कुलकर्णी यांनी केले.

कार्यक्रमात सीए सर्वेश मेहंदळे यांनी “स्त्रीचे मनोबल आणि सकारात्मकता” या विषयावर मार्गदर्शन केले. तसेच नितिन शेलार यांनी मुलींसाठी स्वसंरक्षणाचे महत्त्व अधोरेखित करत स्वसंरक्षणाच्या तंत्रांचे प्रात्यक्षिक सादर केले. या प्रात्यक्षिकाला उपस्थित विद्यार्थिनी व महिलांचा उत्स्फूर्त प्रतिसाद मिळाला.

या वेळी रोटरी क्लब ऑफ पुणे संस्कृतीचे प्रेसिडेंट रो. मोहन टिलू, सेक्रेटरी रो. स्मिता कुलकर्णी, डिस्ट्रिक्ट डायरेक्टर रो. संतोष परदेशी.
तसेच इतर सभासद उपस्थित होते. एस.एन.डी.टी. कॉलेज ऑफ होम सायन्सच्या वतीने प्राचार्य गणेश चव्हाण, प्रा. अनुजा किणीकर व इतर प्राध्यापक आणि कर्मचारी उपस्थित होते. मानसी फाऊंडेशनच्या वतीने संस्थेच्या अध्यक्ष सौ. मानसी ठाकूर उपस्थित होत्या.

कार्यक्रमाचे सूत्रसंचालन अनुजा भिसे यांनी केले. या कार्यक्रमाच्या माध्यमातून महिलांचे मनोबल वाढवणे, आत्मविश्वास निर्माण करणे आणि स्वसंरक्षणाचे महत्त्व समाजापर्यंत पोहोचवण्याचा संदेश देण्यात आला.

खाजगी चारचाकी वाहनांसाठी पसंतीचे नोंदणी क्रमांक राखून ठेवण्यासाठी इच्छुकांनी दिनांक १३ मार्च २०२६ रोजी सकाळी १०:३० ते दुपारी २:३० या वेळेत विहित नमुन्यात अर्ज, डीडी, पत्त्याचा पुरावा, ओळखपत्र व पॅनकार्डच्या साक्षांकित प्रतींसह आरटीओ कार्यालयात सादर करावेत. एकाच क्रमांकासाठी एकापेक्षा जास्त अर्ज आल्यास लिलाव प्रक्रिया राबविण्यात येणार असून १६ मार्च २०२६ रोजी दुपारी ४:०० वाजता लिलाव आयोजित करण्यात येईल.

दुचाकी वाहनांसाठी आकर्षक क्रमांकाकरिता अर्ज १६ मार्च २०२६ रोजी स्वीकारले जाणार असून त्याचा लिलाव १७ मार्च २०२६ रोजी दुपारी ४:०० वाजता सहकार सभागृहात करण्यात येणार आहे.

लिलावासाठी सादर करण्यात येणारा डीडी “R.T.O., Pune” या नावे नॅशनलाइज्ड किंवा शेड्युल्ड बँकेचा असावा व दोन महिन्यांपेक्षा जुना नसावा. अर्जासोबत पॅनकार्डची साक्षांकित प्रत जोडणे बंधनकारक आहे. एकाच क्रमांकासाठी एकच सीलबंद डीडी स्वीकारला जाईल.

महाराष्ट्र मोटार वाहन नियम १९८१ च्या नियम ५४अ नुसार पसंतीचा नोंदणी क्रमांक १८० दिवसांपर्यंत वैध राहील. लिलावानंतर उर्वरित क्रमांकांसाठी प्रक्रिया https://fancy.parivahan.gov.in⁠ या संकेतस्थळावर ऑनलाईन उपलब्ध करून देण्यात येणार असून इच्छुकांनी आधार संलग्नित मोबाईल क्रमांकाद्वारे नोंदणी करून पसंती क्रमांक आरक्षित करता येणार आहे.

पुणे आरटीओ कार्यक्षेत्रातील पत्ता असलेल्या वाहनधारकांचेच अर्ज स्वीकारले जाणार असल्याची माहिती प्रादेशिक परिवहन कार्यालय, पुणे यांनी दिली आहे.