पुणे – भामा आसखेड प्रकल्पातून शुद्ध पाणीपुरवठा होईपर्यंत यावर अवलंबून असणाऱ्या भागात दिवसभर पाणीपुरवठा करण्याचे नियोजन करू नये, अशा सूचना महापालिका आयुक्त नवल किशोर राम यांनी दिल्या आहेत. शहराच्या पूर्व भागातील दूषित पाणीपुरवठ्याच्या गंभीर समस्ये संदर्भात महापालिका आयुक्तांनी भामा आसखेड प्रकल्प जलशुद्धीकरण केंद्राला स्थानिक लोकप्रतिनिधींसह नुकतीच भेट दिली.

यावेळी नगरसेविका अश्विनी भंडारे, संगीता दांगट, नंदिनी धेंडे, शीतल सावंत, नगरसेवक अनिल टिंगरे, रवी उर्फ हर्षल टिंगरे, सुहास टिंगरे, अनिल सातव, रामदास दाभाडे यांच्या सह माजी उपमहापौर डॉ. सिद्धार्थ धेंडे, माजी नगरसेवक राहुल भंडारे महापालिकेच्या पाणीपुरवठा विभागाचे अधिकारी व कर्मचारी उपस्थित होते.
पुणे शहराच्या उत्तर पूर्व भागातील गढूळ आणि पिवळसर तसेच अपुऱ्या कमी दाबाने होणाऱ्या पाणीपुरवठ्या संदर्भात स्थानिक लोकप्रतिनिधी तसेच नागरिकांनी महापालिका आयुक्तांची भेट घेतली. जलशुद्धीकरण प्रकल्पामध्ये पाणी कशाप्रकारे शुद्ध केले जाते याचा प्रत्यक्ष आढावा त्यांनी यावेळी घेतला. तज्ञांच्या मदतीने गढूळ पिवळसर पाण्याच्या तक्रारीचे पुढील दोन दिवसात निराकरण करण्याचे आदेश महापालिका आयुक्तांनी यावेळी दिले. तज्ञांच्या पाहणीनंतर व त्यांच्या निष्कर्षानंतर यावर उपाययोजना होईल असे त्यांनी यावेळी स्पष्ट करण्यात आलं. भामा आसखेड प्रकल्पाच्या वारंवार खंडित होणाऱ्या विद्युत पुरवठ्याच्या अनुषंगाने MSEDCL विभागाचे अधीक्षक अभियंता यांच्या समवेत बैठक आयोजित करण्याबाबत देखील महापालिका आयुक्त यांनी आदेश दिले आहेत.

पुणे महापालिकेत पाण्याचे राजकारण
एकंदरीतच या गंभीर समस्येला महिना उलटला तरी महापालिका प्रशासनाला यावर उपाययोजना करता आली नाही. प्रभाग दोनच्या राष्ट्रवादी काँग्रेस पक्षाच्या नगरसेवकांनी महापालिका आयुक्त कार्यालयावर आंदोलन करून उपाययोजना करण्याची मागणी केली. तर सत्ताधारी भाजपच्या लोकप्रतिनिधींनी महापालिका प्रशासनाच्या चुकांची पाठराखण करत सोयीच्या भूमिका घेत उपाययोजना कराव्यात, अशी मागणी केली. वडगाव शेरी विधानसभा मतदारसंघाचे राष्ट्रवादी शरद पवार गटाचे आमदार बापू पठारे यांनी देखील दोन वेळा भामा आसखेड प्रकल्पाला भेट दिली. एकंदरीतच पाण्याच्या या गंभीर समस्येबाबत सत्ताधारी भाजप व सत्तेत असूनही प्रशासनावर पकड नसणाऱ्या राष्ट्रवादी काँग्रेस पक्षाचा दुटप्पीपणा या निमित्ताने पुन्हा एकदा जनतेसमोर आला आहे. सत्तेत असणारा भाजप पिण्याच्या पाण्याची समस्या सोडवण्यात ठरत असून महापौरांनी आदेश देऊन देखील प्रशासनाने त्याकडे दुर्लक्ष केल्याचे लक्षात येते. तर भाजपसोबत राज्यात सत्तेत असणाऱ्या राष्ट्रवादी काँग्रेस पक्षाला महापालिकेत प्रशासनावर स्वतःची पकड निर्माण करता न आल्यामुळे आता पक्षावर आंदोलनाची वेळ आली आहे. त्यामुळे एकंदरीतच भाजप आणि राष्ट्रवादी यामधील धूसफूस या निमित्ताने पुन्हा एकदा पुणेकरांना दिसून येत आहे.

बापू पठारेंना स्पष्ट भूमिकाच घेता येईना

विद्यमान आमदार बापू पठारे यांच्या घरात मुलगा आणि सून हे भाजपचे नगरसेवक असल्यामुळे मतदारसंघात काम करताना त्यांनाही स्पष्ट भूमिका घेता येत नसल्याचे दिसून येत आहे. पिण्याच्या पाण्याची ही गंभीर समस्या महापालिका आयुक्त तरी किती गांभीर्याने सोडवतात हे पाहणे आता गरजेचे आहे.

पुणे – समाजातील गुन्हेगारी तसेच उपद्रवी घटकांना रोखण्यासाठी पोलिसांसोबत नागरिकांनी देखील पुढाकार घ्यावा असे आवाहन परिमंडळ 4 चे पोलीस उपायुक्त चुलूमुला रजनीकांत यांनी केले. यासाठी आपल्याला घरापासून सुरुवात करावी लागेल. आपल्या मुलांसोबतच इतरांना देखील कायद्याचे पालन करण्यासाठीची जबाबदारी पालकांनी घेतली पाहिजे. कायद्याचे उल्लंघन करणाऱ्यांवर या पुढील काळात कठोर कारवाई करणार असल्याचे पोलीस उपायुक्त रजनीकांत यांनी यावेळी स्पष्ट केले.

फुलेनगर ज्येष्ठ नागरिक संघ येथे विश्रांतवाडी पोलीस स्टेशन आयोजित “सलोखा बैठक” कार्यक्रमात पोलीस उपायुक्त रजनीकांत यांनी नागरिकांशी संवाद साधला. या कार्यक्रमाला सहाय्यक पोलीस आयुक्त सुनील जैतापूरकर, वरिष्ठ पोलीस निरीक्षक मंगेश हांडे, नगरसेविका शितलताई सावंत, फुलेनगर सोसायटीचे अध्यक्ष उमेश माने, हनुमान मित्र मंडळाचे सुरेश नायर, ज्येष्ठ नागरिक संघाचे अध्यक्ष मजहर खान, घरोंदा सोसायटीचे अशोक काळे, सामाजिक कार्यकर्त्या शिवानी माने, यशवंत सांगळे,शांतता कमिटीचे सदस्य निखिल गायकवाड यांच्यासह फुलेनगर परिसरातील नागरिक, महिला व युवक मोठ्या संख्येने उपस्थित होते.

यावेळी नागरिकांनी प्रामुख्याने फुलेनगर परिसरातील बाहेरच्या तरुणांकडून होणाऱ्या त्रासाबद्दल तक्रार केली. मोठ्या आवाजात स्पीकर वाजवणे, बुलेट गाड्यांचे आवाज करणे, रात्री उशिरापर्यंत वाढदिवस साजरे करणे, गोंधळ घालून शिवीगाळ करणे अशा अनेक स्थानिक समस्या यावेळी नागरिकांनी सांगितल्या. परिसरातील शाळेच्या आवारातील बंद जिम, बुद्ध विहार, सर्वे ऑफ इंडिया गेट, म्हाडा कॉम्प्लेक्स, गार्डन चा परिसर, हनुमान मंदिर, रमाबाई वसाहत या भागात प्रामुख्याने टोळकी उभी राहून रात्री उशिरापर्यंत गोंधळ करत असतात. या सर्व ठिकाणी आगामी काळात मोठ्या प्रमाणावर कायदेशीर कारवाई करण्यात येणार असल्याचे पोलीस उपायुक्त रजनीकांत यांनी स्पष्ट केले.

रात्री उशिरापर्यंत सुरू राहणाऱ्या पानटपऱ्या हॉटेल यावर देखील कारवाई करण्यात येणार आहे. फुलेनगर व परिसरातील सीसीटीव्ही यंत्रणा सुसज्य करण्यात यावी तसेच नागरिकांनी तातडीचे वेळी तात्काळ पोलीस नियंत्रण कक्ष संपर्क क्रमांक (112) ची मदत घ्यावी. या सर्व परिसरातील पोलीस गस्त वाढवण्यात येणार असून महत्त्वाची बाब म्हणजे आपल्या घरातील मुले वेळेवर घरात येतील याची दक्षता घ्यावी. रात्री अकरानंतर रस्त्यावर अनावश्यक थांबणाऱ्या व्यक्तींवर कारवाई करण्यात येणार असल्याचे त्यांनी स्पष्ट केले. नगरसेविका शितलताई सावंत यांनी नागरिकांच्या सुरक्षेबाबत आवश्यक ती प्रशासनाकडील जबाबदारी पार पाडण्यात येईल असे सांगितले. ज्येष्ठ नागरिक महिलावर्ग यांना होणाऱ्या गंभीर त्रासापासून पोलिसांनी कायमस्वरूपी उपाययोजना करावी अशी विनंती यावेळी त्यांनी केली. सहाय्यक पोलीस आयुक्त सुनील जैतापूरकर यांनी देखील यावेळी मार्गदर्शन केले. नागरिकांनी कोणत्याही अडचणीच्या काळात तात्काळ पोलिसांना संपर्क करावा, असे आवाहन केले. प्रास्ताविक पोलीस निरीक्षक मंगेश हांडे यांनी केले, सूत्रसंचालन निखिल गायकवाड यांनी तर आभार पोलिस अंमलदार गणेश पारडे यांनी मानले.