शेरखान पठाण असे कैद्यांच्या मारहाणीत जखमी झालेल्या तुरुंग अधिकाऱ्याचे नाव आहे. याप्रकरणी विकी बाळासाहेब कांबळे, प्रकाश विठ्ठल रेणुसे आणि इतर दहा कैद्यांच्या विरोधात येरवडा पोलीस ठाण्यात गुन्हा दाखल करण्याचे काम सुरू आहे. कारागृह प्रशासनाने दिलेल्या माहितीनुसार,” काही महिन्यांपूर्वी तुरुंग अधिकारी शेरखान पठाण यांची येरवडा कारागृहात बदली झाली आहे. सर्कल १ मध्ये पठाण नियुक्तीला आहेत. गुरुवारी सकाळी नेहमीप्रमाणे कारागृहातील सर्कल १ मध्ये कर्तव्य बजावत असताना न्यायाधीन कैदी कांबळे आणि रेणुसे यांच्याशी काही कारणावरून वादावादी झाली.

त्याचा राग आल्याने कांबळे आणि रेणुसे यांनी तुरुंग अधिकारी पठाण यांच्याशी हुज्जत घालून धक्काबुक्की सुरू केली. त्यामुळे पठाण यांनीही दोघा कैद्यांना मारहाण करू लागल्यावर त्यांचे दहा साथीदार पुढे सरसावत पठाण यांना लाथा बुक्क्यांनी बेदम मारहाण सुरू केली. यावेळी एकाने शेजारील कार्यालयात जाऊन लाकडाची खुर्ची उचलून आणून पठाण यांच्या डोक्यात मारण्याचा प्रयत्न केला. पण सर्कल मधील काही कैद्यांनी खुर्ची मारणाऱ्या कैद्याला वेळीच रोखल्याने मोठी दुर्घटना टळली.

कैद्यांच्या अमानुष मारहाणीत अधिकाऱ्याच्या डोळ्याला इजा झाली असून डावा हाताचा मनगट फ्रॅक्चर झाले आहे. तुरुंग अधिकाऱ्याला कैद्यांनी मारहाण केल्याने कारागृहात मोठी खळबळ माजली आहे. प्रशासनाने तात्काळ मोठा फौजफाटा तैनात केला असून मारहाण करणाऱ्या कैद्यांना वेगवेगळ्या सर्कलमध्ये बराकीत बंद केले आहे. येरवडा पोलीस कारागृहात जाऊन मारहाणीची सविस्तर माहिती घेत आहेत.