पुणे : लोकशाहीर अण्णाभाऊ साठे यांच्या जयंतीनिमित्त इक्वेरा फाउंडेशनच्या वतीने विमाननगर येथील आरोग्य कोठीला भेट देऊन सफाई कामगारांच्या समस्या प्रत्यक्ष जाणून घेण्यात आल्या. फाउंडेशनच्या संचालिका प्राची साळवे यांनी सफाई कामगारांशी संवाद साधत त्यांच्या अडचणी ऐकून घेतल्या आणि त्या प्रशासनापर्यंत पोहोचवण्याचे आश्वासन दिले.

यावेळी सफाई कामगारांनी सार्वजनिक सुट्ट्या या महापुरुषांच्या जयंती तसेच सण-उत्सवांच्या दिवशीही सुट्टी मिळत नसल्याची तक्रार केली. महाराष्ट्र दिन, स्वातंत्र्यदिन यांसारख्या राष्ट्रीय सणा सारख्या महत्त्वाच्या दिवशीही नियमितपणे काम करावे लागते, मात्र त्याबदल्यात अतिरिक्त मानधन किंवा इतर लाभ दिले जात नसल्याचे त्यांनी सांगितले. कंत्राटी कामगारांकडून कायमस्वरूपी कर्मचाऱ्यांच्या तुलनेत अधिक वेळ काम करून घेतले जात असल्याचा तसेच कामाच्या तासांमध्ये समानता नसल्याचाही आरोप करण्यात आला. काही कामगारांनी कामाच्या ठिकाणी अपमानास्पद वागणूक, अयोग्य संवाद पद्धती आणि मानसिक त्रास सहन करावा लागत असल्याचेही सांगितले.

यानंतर सुमित एंटरप्रायझेसचे समन्वयक संतोष बोडके यांच्याशी चर्चा करण्यात आली. संबंधित कामकाज कार्यादेशानुसार सुरू असून आवश्यक प्रशासकीय माहिती शासकीय कार्यालयात उपलब्ध असल्याचे त्यांनी स्पष्ट केले. तसेच स्वच्छता निरीक्षक सचिन लडकत यांच्याशी दूरध्वनीद्वारे संपर्क साधण्यात आला. केंद्रीय गृहमंत्री अमित शहा यांच्या दौऱ्यामुळे ते शासकीय कामात व्यस्त असल्याने सोमवारी सविस्तर बैठकीचे नियोजन करण्यात आले आहे.

दरम्यान प्राची साळवे, देव्यानी महानाग, सफाई कामगार शीतल पवार व इतर कामगारांनी निर्भय प्रतिष्ठानचे अध्यक्ष निखिल गायकवाड यांच्या सोबत पुढील कार्यवाहीबाबत चर्चा केली. नगर रोड क्षेत्रिय कार्यालयाचे सहाय्यक आयुक्त संजय पोळ यांचीही या संदर्भात भेट घेण्यात येणार आहे. तसेच या पुढील काळात महापालिका आयुक्तांकडे या संदर्भात कायमस्वरूपी उपाय योजना करण्याबाबत मागणी करण्यात येणार आहे.

सफाई कामगारांच्या तक्रारींची निष्पक्ष चौकशी, समान वागणूक, सुरक्षित कामाचे वातावरण, न्याय्य कामाचे तास आणि कायद्यानुसार सर्व सुविधा मिळाव्यात यासाठी संबंधित प्रशासनाकडे सातत्याने पाठपुरावा केला जाणार असल्याचे इक्वेरा फाउंडेशनने यावेळी स्पष्ट केले.

प्रकाश नाईक हे पाली भाषेचे अभ्यासक होते. माजी श्रामनेर असोसिएशनचे संस्थापक, येरवडा येथील डॉ. बाबासाहेब आंबेडकर हाऊसिंग सोसायटी ट्रस्टचे माजी संचालक, सिद्धार्थ मंडळाचे बौद्ध विधीकर्ते तसेच पुणे शहरातील बौद्ध धर्मीय व आंबेडकरी चळवळीतील विविध संस्था संघटना यांच्या सामाजिक धार्मिक उपक्रमांमध्ये त्यांचा सक्रिय सहभाग होता.

बौद्ध धम्मातील पाली भाषेच्या गाथा मराठीत अनुवादित करून अत्यंत सोप्या भाषेत सांगून बौद्ध धम्माचा प्रचार आणि प्रसार करण्याचे कार्य त्यांनी सातत्याने केले. खडकी येथील 512 आर्मी बेस वर्कशॉप येथून अधिकारी पदावरून ते निवृत्त झाले होते. बौद्ध धम्म तसेच आंबेडकरी साहित्यावर त्यांचा सखोल अभ्यास होता.

बौद्ध धम्माच्या अभ्यासासोबतच कलात्मक वाचन, लेखन, चित्रकला, गायन व काव्य निर्मिती यामध्ये देखील ते अग्रेसर होते. बौद्ध धम्माच्या प्रचार आणि प्रसाराचे काम त्यांनी अखेरपर्यंत केले. त्यांच्या पार्थिवावर येरवडा विद्युतदाहिनी येथे अंत्यसंस्कार करण्यात आले. यावेळी आंबेडकरी चळवळीतील विविध सामाजिक, राजकीय, धार्मिक क्षेत्रातील मान्यवर मोठ्या संख्येने उपस्थित होते. त्यांच्या निधनामुळे बौद्ध धम्मातील पाली भाषेच्या अभ्यासकांमधील एक तज्ञ मार्गदर्शक गमावला असल्याच्या भावना व्यक्त करण्यात येत आहेत.

पुणे : गुरुपौर्णिमेचे औचित्य साधून “जय गणेश व्यासपीठ, पुणे शहर” यांच्या वतीने सार्वजनिक गणेशोत्सव चळवळीत अनेक वर्षे निस्वार्थ सामाजिक कार्य करत युवा कार्यकर्त्यांना प्रेरणा, मार्गदर्शन आणि संस्कार देणाऱ्या गुरुजनांचा “सन्मान गणेशोत्सव गुरुजनांचा… वारसा कार्यकर्त्यांचा!” हा विशेष सन्मान सोहळा उत्साहपूर्ण वातावरणात संपन्न झाला.

कार्यक्रमाच्या प्रारंभी गुरुजनांचे पारंपरिक पाद्यपूजन करून कृतज्ञता व्यक्त करण्यात आली. त्यानंतर गुरुवर्य डॉ. संजय उपाध्ये (प्रसिद्ध लेखक, कवी व वक्ते) यांच्या हस्ते शाल, श्रीफळ, सन्मानचिन्ह आणि सन्मानपत्र प्रदान करून गुरुजनांचा यथोचित गौरव करण्यात आला.

या प्रसंगी सुनिलभाऊ रासणे, महेश सूर्यवंशी, ॲड. प्रतापदादा परदेशी, डॉ. मिलिंद भोई तसेच आनंद सराफ यांची प्रमुख उपस्थिती लाभली. यावेळी ज्येष्ठ शिल्पकार विवेकजी खटावकर, विश्वास भोर, शिरीष मोहिते, विनायक घाटे, पियुष शाह, सागर पवार, नितीन पंडीत, उदय जगताप आणि पराग ठाकूर या मान्यवर गुरुजनांचा सन्मान करण्यात आला.

गुरुवर्य डॉ. संजय उपाध्ये यांनी मनोगतात सांगितले की, “सामाजिक आचरणात सकारात्मक शुद्धीकरण घडवण्याची ताकद सार्वजनिक गणेशोत्सवात आहे.” अनुभवी गुरुजनांच्या मार्गदर्शनातून ही संस्कारमय परंपरा पुढील पिढीपर्यंत पोहोचत असून, अशा गुरुजनांच्या सन्मान सोहळ्यास उपस्थित राहणे हे भाग्याचे लक्षण असल्याची भावना त्यांनी व्यक्त केली.

या प्रेरणादायी सोहळ्याचे आयोजन श्री शनी मारुती बाल गणेश मंडळ, एरंडवणे, नवज्योत मित्र मंडळ, येरवडा, एकता मित्र मंडळ, अरण्येश्वर आणि श्री पोटसुळ्या मारुती मंडळ, गणेश पेठ यांनी संयुक्तपणे केले. सचिन पवार, अमित जाधव, सुधीर ढमाले व कुणाल पवार यांनी संपूर्ण नियोजन केले. कार्यक्रमास पुणे शहरातील विविध सार्वजनिक गणेशोत्सव मंडळांचे पदाधिकारी, कार्यकर्ते, गणेशभक्त आणि नागरिक मोठ्या संख्येने उपस्थित होते.

सार्वजनिक गणेशोत्सव चळवळ ही केवळ उत्सवापुरती मर्यादित नसून ती सामाजिक बांधिलकी, संस्कार आणि समाजप्रबोधनाची परंपरा आहे. या परंपरेचे जतन करणाऱ्या गुरुजनांचा गौरव करून “गुरुजनांचा सन्मान म्हणजे संस्कारांचा सन्मान” हा संदेश या सोहळ्यातून समाजापर्यंत पोहोचविण्यात आला.

कार्यक्रमाचे सूत्रसंचालन अमित जाधव यांनी केले. सुधीर ढमाले यांनी प्रास्ताविक केले, कुणाल पवार यांनी सन्मानपत्राचे वाचन केले, तर सचिन पवार यांनी आभार प्रदर्शन केले.

पुणे : शहराचे नवीन कारभारी खासदार तथा केंद्रीय मंत्री मुरलीधर मोहोळ हे वडगावशेरी मतदार संघात येणार होते. नुकत्याच जंतर-मंतर दिल्ली येथे झालेल्या आंदोलनातील विद्यार्थ्यांवर दाखल झालेले गुन्हे मागे घेण्यात यावेत या मागणीचे निवेदन वडगाव शेरी काँग्रेसच्या पदाधिकाऱ्यांच्या वतीने खासदार मोहोळ यांना देण्यात येणार होते. मात्र निवेदन देण्यापूर्वीच येरवडा पोलिसांनी काँग्रेस पदाधिकाऱ्यांना ताब्यात घेतले. सुरक्षेच्या कारणास्तव सकाळी 11 ते दुपारी तीन या वेळेत या कार्यकर्त्यांना पोलिसांनी ताब्यात ठेवलेले होते. देशात राज्यात आणि पुणे शहरात पूर्ण सत्तेत असलेल्या भाजप सरकारकडून अशा प्रकारे पोलीस यंत्रणेचा गैरवापर करून कार्यकर्त्यांना डांबून ठेवण्यात आलेल्या कृतीचा काँग्रेस पक्षाच्या वतीने निषेध करण्यात आला आहे.

नीट पेपर फुटी प्रकरणी संपूर्ण देशात भाजपा आणि मोदी सरकार यांच्या विरोधात सध्या मोठ्या प्रमाणावर विरोधाची लाट पसरलेली आहे. देशभर विद्यार्थी आणि नागरिक आंदोलन करून निषेध व्यक्त करत आहेत. दिल्ली येथील आंदोलनात सरकारच्या सूचनेवरून पोलिसांकडून विद्यार्थ्यांना अमानुष मारहाण करण्यात आली. अखेर शनिवारी केंद्रीय शिक्षण मंत्री धर्मेंद्र प्रधान यांचा राजीनामा घेण्यात आल्यावर देशभरात सुरू असलेली आंदोलने काही प्रमाणात थांबवण्यात आली आहेत. दरम्यान आज रविवारी (दि.26 जुलै) रोजी खासदार मुरलीधर मोहोळ यांच्यावतीने चंदननगर येथे ” खासदार जनसंपर्क अभियान” आयोजित करण्यात आलेले होते. यावेळी खासदार मोहोळ यांना निवेदन देऊन आंदोलन विद्यार्थ्यांवरील गुन्हे मागे घेण्याची मागणी लोकशाही मार्गाने स्थानिक काँग्रेस पदाधिकारी करणार होते. मात्र सुरक्षेचे कारण सांगत काँग्रेस पदाधिकाऱ्यांना थेट पोलिसांनी ताब्यात घेऊन नजर कैदेत ठेवले. आपल्या लोकशाही संविधानावर चालणाऱ्या देशातील नागरिक किंवा पक्ष संघटना यांना शांततेच्या मार्गाने निवेदन देऊन लोकप्रतिनिधी यांना भेटण्याची मुभा आहे. मात्र भाजप सरकार हुकूमशाही पद्धतीने सत्तेचा गैरवापर करून नागरिकांवर दबाव तंत्र वापरण्याचे काम सातत्याने करीत असल्याचा आरोप यावेळी काँग्रेस पदाधिकाऱ्यांनी केला. कार्यक्रम संपेपर्यंत काँग्रेस पदाधिकाऱ्यांना येरवडा पोलीस स्टेशन या ठिकाणी डांबून ठेवण्यात आलेले होते. यावेळी नगरसेवक विशाल मलके, माजी नगरसेवक राजेंद्र शिरसाठ, येरवडा ब्लॉक अध्यक्ष रमेश सकट, वडगाव शेरी ब्लॉक अध्यक्ष राजू ठोंबरे, काँग्रेसचे युवा नेते सागर खांदवे, डॉ. पवन सोनवणे, अनुसूचित विभागाचे प्रदेश उपाध्यक्ष प्रियंकाताई रणपिसे, वडगाव शेरी युवक अध्यक्ष प्रसाद वाघमारे, सोशल मीडिया समन्वयक अमित कांबळे, प्रशांत केदारी, विजय साबळे, डॉ.रमाकांत साठे,जॉन्सन हिरे, गणेश कांबळे,अक्षय राजगुरू, शानू चलवादी, रुनेश कांबळे, ताराताई शर्मा यांच्यासह पदाधिकारी व कार्यकर्ते उपस्थित होते.

कोणताही अनुचित प्रकार घडू नये यासाठी सहाय्यक पोलीस आयुक्त सुनील दोरगे, वरिष्ठ पोलीस निरीक्षक उमेश गीते यांच्या मार्गदर्शनाखाली काँग्रेस पदाधिकाऱ्यांना ताब्यात ठेवण्यात आलेले होते. देशात राज्यात आणि पुणे शहरात पूर्ण सत्तेत असलेल्या भाजप सरकारकडून अशा प्रकारे पोलीस यंत्रणेचा गैरवापर करून कार्यकर्त्यांना डांबून ठेवण्यात आलेल्या कृतीचा काँग्रेस पक्षाच्या वतीने निषेध करण्यात आला आहे.

पुणे : प्रशासकीय जबाबदाऱ्यांच्या धावपळीतून क्षणभर वेळ काढून जेव्हा एखादा वरिष्ठ अधिकारी विद्यार्थ्यांच्या सहवासात रमतो, त्यांच्या डोळ्यांतील स्वप्नांना जवळून पाहतो आणि त्यांच्या भवितव्याची काळजी आपल्या शब्दांतून व्यक्त करतो, तेव्हा तो क्षण केवळ औपचारिक भेटीचा राहत नाही, तर संवेदनशील प्रशासनाचा प्रेरणादायी संदेश ठरतो. अशीच एक हृदयस्पर्शी भेट आज राज्याच्या सामाजिक न्याय विभागाचे प्रधान सचिव डॉ. हर्षदीप कांबळे यांनी येरवडा येथील बार्टीच्या परिसरातील सफाई कामगारांच्या मुला-मुलींच्या शाळा व वस्तीगृहाला दिली व तेथील मुलांशी आत्मिक संवाद साधला.

समाजकल्याण विभागाच्या अधिकाऱ्यांची बैठक डॉ. बाबासाहेब आंबेडकर संशोधन व प्रशिक्षण संस्था बार्टीच्या येरवडा कॅम्प परिसरात आयोजित करण्यात आली होती. ही बैठक संपल्यानंतर डॉ. कांबळे यांनी आवर्जून विद्यार्थ्यांची भेट घेतली. शाळेतील वर्गात प्रवेश करताच त्यांनी डिजिटल शिक्षण पद्धतीची सविस्तर माहिती जाणून घेतली. वर्गात बसून शिक्षक व मुख्याध्यापकांशी संवाद साधत शिक्षणाच्या गुणवत्तेचा आढावा घेतला.

यानंतर त्यांनी जवळच असलेल्या वस्तीगृहात जाऊन विद्यार्थ्यांशी मनमोकळ्या गप्पा मारल्या. त्यांच्या जेवणाची व्यवस्था, अभ्यासाची दिनचर्या, गाव, कुटुंब आणि भविष्यातील स्वप्ने याविषयी त्यांनी आस्थेने विचारपूस केली. इयत्ता पहिलीतील विद्यार्थ्यांकडून इंग्रजी वर्णमाला म्हणवून घेत त्यांच्या आत्मविश्वासाचे मनापासून कौतुक केले. चिमुकल्यांच्या निरागस हसण्यात आणि उत्स्फूर्त संवादात डॉ. कांबळे इतके रमले की, काही काळासाठी प्रशासकीय पदाची औपचारिकता बाजूला पडून ते विद्यार्थ्यांचे प्रेमळ मार्गदर्शक बनले.

विद्यार्थ्यांशी साधलेल्या या आत्मीय संवादातून त्यांचे स्वतःचे विद्यार्थी जीवनही त्यांच्या स्मरणात दाटून आले. विद्यार्थ्यांमधील जिज्ञासा, शिस्त, आत्मविश्वास आणि प्रगती पाहून त्यांनी समाधान व्यक्त केले. “ही शाळा केवळ शिक्षण देणारी संस्था न राहता राज्यासाठी प्रेरणादायी ‘मॉडेल शाळा’ म्हणून विकसित व्हावी,” असा संकल्प त्यांनी यावेळी व्यक्त केला.

या प्रसंगी समाजकल्याण आयुक्त दीपा मुधोळ-मुंढे, उपायुक्त प्रशांत चव्हाण, बार्टीच्या निबंधक डॉ. सुचित्रा शिंदे, विभाग प्रमुख शुभांगी पाटील, विभाग प्रमुख डॉ. बबन जोगदंड मुख्याध्यापक जयश्री चंडके तसेच समाजकल्याण विभागाचे अन्य वरिष्ठ अधिकारी उपस्थित होते.

४३ किलो वजनी गटातील डेडलिफ्ट प्रकारात स्वरांजलीने उत्कृष्ट कामगिरी करत द्वितीय क्रमांकाचे रौप्यपदक पटकावले. स्वरांजली ही सध्या येरवडा येथील डॉन बॉस्को हायस्कूल मध्ये सातव्या इयत्तेमध्ये शिकते. प्रशिक्षक सचिन थोरात यांचे तिला मार्गदर्शन लाभले. नागपूरचाळ येरवडा येथील स्वरांजली गमरे हिच्या या उल्लेखनीय यशाबद्दल तिचे सर्व स्तरांतून अभिनंदन होत आहे. तिच्या क्रीडा क्षेत्रातील भावी वाटचालीस मान्यवरांनी शुभेच्छा दिल्या आहेत.

पुणे : जागतिक अंमली पदार्थ विरोधी सप्ताहानिमित्त जनजागृती मोहिमेअंतर्गत महाविद्यालयीन विद्यार्थ्यांशी संवाद कार्यक्रम येरवडा पोलीस स्टेशन येथे आयोजित करण्यात आला होता. पोलीस उपआयुक्त रजनीकांत चिलूमुला यांच्या संकल्पनेतून परिमंडळाच्या विभागातील सर्व पोलीस ठाण्यांमध्ये व्यसनविरोधी विचारांवर विविध उपक्रमांच्या माध्यमातून जनजागृती व प्रबोधन सुरू करण्यात आलेले आहे.

या कार्यक्रमात गेनबा सोपानराव मोझे उच्च माध्यमिक प्रशालेच्या इयत्ता बारावीतील 120 विद्यार्थी व 10 शिक्षक सहभागी झाले होते. विद्यार्थ्यांना अंमली पदार्थांचे दुष्परिणाम, व्यसनमुक्त जीवनाचे महत्त्व, कायदेशीर बाबी आणि प्रतिबंधात्मक उपाययोजनांविषयी मार्गदर्शन करण्यात आले. कार्यक्रमात मुक्तांगण व्यसनमुक्ती केंद्राचे समुपदेशक शुभम मर्चंडे, वरिष्ठ पोलीस निरीक्षक अंजुम बागवान, पोलीस निरीक्षक (गुन्हे) नीलकंठ जगताप, मोझे महाविद्यालयाचे उपप्राचार्य सतीश सूर्यवंशी, निर्भय विद्यार्थी अभियानाचे संस्थापक निखिल गायकवाड व पौर्णिमा गादिया यांनी विद्यार्थ्यांशी संवाद साधून मार्गदर्शन केले.

सहाय्यक पोलीस आयुक्त, येरवडा विभाग सुनील जैतापुरकर यांनी विद्यार्थ्यांचे समुपदेशन करून व्यसनमुक्त समाज घडविण्याचे आवाहन केले. कार्यक्रम उत्साहपूर्ण वातावरणात झाला. पोलीस निरीक्षक केशव दिंडे यांनी आभार मानले.

या मुलींच्या वसतिगृहात किमान ८५ विद्यार्थिनींची सोय होणार आहे. प्रवेश मिळालेल्या विद्यार्थिनींना शासनामार्फत निवास, भोजन, स्टेशनरी साहित्य, आंथरुन – पांघरून व दरमहा खर्चासाठी प्रत्येकी १५०० रूपये प्रमाणे निर्वाह भत्ता व स्वच्छता प्रसाधनासाठी प्रत्येकी १५० रुपये देण्यात येतात. वसतिगृहात स्वतंत्र संगणक कक्ष (कॉम्प्युटर लॅब Computer Lab), अद्यावत ग्रंथालय (Library) यांची सुविधा आहे.
सन २०२६-२७ या वर्षात सामाजिक न्याय विभागामार्फत वसतिगृह प्रवेशासाठी सर्व अभ्यासक्रमाचे
ऑनलाइन प्रवेश प्रक्रिया सुरू झालेली आहे. तरी त्यानुसार विद्याथ्यांनी ऑनलाइन फॉम Website – https://hmasnew.mahait.org वर अर्ज करण्यात यावे. अधिक माहितीसाठी क्रांतीज्योती सावित्रीबाई फुले मुलींचे शासकिय वसतिगृह, येरवडा, पुणे येथील गृहपाल श्रीमती एस. एन. शेलार यांच्याकडे कार्यालयीन वेळेत संपर्क साधावा. या वसतिगृह योजनेचा जास्तीत जास्त विद्यार्थिनींनी लाभ घ्यावा, असे आवाहन महाराष्ट्र शासनाकडून करण्यात येत आहे.

येरवड्यातील प्रभाग क्रमांक दोन येथील अग्रसेन हायस्कूल ते कॉमरझोन रस्त्यावर मोठ्या व्यासाच्या पावसाळी वाहिन्या बसवण्याचे काम संथ गतीने सुरू असून कामाच्या ठिकाणी सुरक्षेच्या कोणते उपाय योजना न केल्यामुळे गंभीर अपघाताचा धोका निर्माण झालेला आहे. याप्रकरणी तक्रार दिल्यानंतर तात्काळ कामाला सुरुवात करण्यात येईल असे मलनिस्सारण विभागाच्या अधिकाऱ्यांनी सांगितले.

येथील अग्रसेन हायस्कूल ते कॉमरझोन रस्त्यावर दरवर्षी पावसात मोठ्या प्रमाणावर पाणी साचल्यामुळे अनेकदा लहान मोठे अपघात वाहतूक कोंडी यामुळे नागरिकांचे हाल होत असतात. यावर्षी पावसाळ्यापूर्वी या महत्त्वपूर्ण कामासाठी महापालिका प्रशासनाला मुहूर्त सापडला. मागील महिन्यात NDMA अंतर्गत मोठ्या व्यासाच्या पावसाळी वाहिन्या बसविण्यासाठी कामाला सुरुवात करण्यात आली. त्याकरिता रस्त्याच्या कडेने मोठ्या प्रमाणावर खोदाई करण्यात आली असून त्यामध्ये पाणी व गाळ साचलेला आहे. कॉमरझोन कडे वळताना हा मोठा खड्डा असून त्यामध्ये अनेक केबलच्या वाहिन्या अस्ताव्यस्त पडलेले आहेत. खोदाई केलेला राडाराडा देखील रस्त्याच्या जवळपास अर्ध्यापेक्षा जास्त भागापर्यंत पसरलेला आहे.

या परिसरात दोन मोठ्या शाळा असून कॉमरझोन आयटी पार्क मुळे मोठ्या प्रमाणावर वाहनांची वर्दळ असते. एकंदरीत या सर्व परिस्थितीत या ठिकाणी मोठा गंभीर स्वरूपाचा अपघात होण्याची शक्यता नाकारता येत नाही. सदरचे काम पंधरा दिवसांपासून बंदच असल्याचे लक्षात आले. अधिकाऱ्यांकडे चौकशी केली असता तातडीने काम सुरू करण्याच्या सूचना देण्यात आल्याचे सांगण्यात आले. मात्र एकाच वेळी ड्रेनेज विभागाचे काम सुरू असताना त्यामध्ये वेगवेगळ्या प्रकारच्या केबल वाहिन्या देखील टाकण्यात येत असल्याचे लक्षात येते. कदाचित एका कामासाठी परवानगी घेऊन इतर विभागाची खाजगी ठेकेदारांची कामे अधिकाऱ्यांना हाताशी पकडून कदाचित सुरू असावीत अशी देखील शंका निर्माण होत आहे.

एकंदरीतच पावसाळी वाहिन्यांच्या महत्त्वाच्या कामांमध्ये अशाप्रकारे ठेकेदाराकडून कामाला होणारा विलंब, अधिकाऱ्यांचे दुर्लक्ष यामुळे या ठिकाणी महापालिका प्रशासनाकडून सर्वकाही अलबेल असल्याचे लक्षात येते. सदर ठिकाणी तातडीने कामाला सुरुवात करून सुरक्षेच्या सर्व उपाययोजनांसह काम लवकरात लवकर वेळेत पूर्ण करावे. तसेच कामासाठी विलंब करणारे ठेकेदार व दुर्लक्ष करणारे संबंधित विभागाचे अधिकारी यांच्यावर देखील कारवाईची मागणी राष्ट्रवादी काँग्रेस पक्षाच्या सामाजिक न्याय विभागाचे कार्याध्यक्ष निखिल गायकवाड यांनी महापालिका प्रशासनाकडे केली आहे.

येरवडा – नकळतपणे झालेल्या चुकामध्ये सुधारणा करून आयुष्यामध्ये यशस्वी व्यक्ती म्हणून ओळख निर्माण करण्यासाठी प्रयत्न करा. वाईट संगत, व्यसन आणि गुन्हेगारी वर मात करून स्वतःची समाजातील रियल हिरो अशी आदर्श प्रतिमा तयार करा, असे मत परिमंडळ 4 चे पोलीस उपायुक्त चुलूमुला रजनीकांत यांनी व्यक्त केले.

निर्भय विद्यार्थी अभियान यांच्या वतीने परिमंडळ 4 विभागातील विधी संघर्षग्रस्त बालक आणि पालक यांच्यासाठी येरवडा पोलीस स्टेशन येथे आयोजित जनजागृती संवाद कार्यशाळेत मार्गदर्शन करताना ते बोलत होते. यावेळी मुक्तांगण व्यसनमुक्ती केंद्राच्या संचालिका डॉ. मुक्ता पुणतांबेकर, परिवर्तन संस्थेच्या रेश्मा कचरे, पोलीस निरीक्षक मंगेश हांडे, निर्भय विद्यार्थी अभियानचे संस्थापक सदस्य दिलीप कुऱ्हाडे, निखिल गायकवाड, विवेक देव, पौर्णिमा गादिया, सीवायडीए संस्थेचे समुपदेशक कौस्तुभ उपस्थित होते.

वाढत्या व्यसनाधीनतेमुळे वाढती गुन्हेगारी व त्यामध्ये विधी संघर्षग्रस्त बालकांचा सहभाग या गंभीर समस्या संदर्भात पोलीस उपायुक्त चुलू्मुला रजनीकांत यांनी विशेष उपक्रम सुरू केला आहे. विधी संघर्षग्रस्त बालकांशी थेट संवाद साधून त्यांच्या नेमक्या अडचणी, त्यांच्या आवडी छंद, कौशल्य विकास, रोजगार निर्मिती तसेच त्यांना गुन्हेगारी व व्यसनांपासून परावृत्त करून कायमस्वरूपी पुनर्वसन असा नियोजनबद्ध कार्यक्रम तयार करण्यात आलेला आहे. या उपक्रमाची सुरुवात या कार्यशाळेच्या निमित्ताने करण्यात आली. यावेळी उपस्थित बालकांकडून प्रत्यक्ष संवाद साधून चर्चा व समुपदेशन करण्यात आले. त्यांच्याकडून मिळालेल्या माहितीनुसार आगामी काळात त्यांच्यासाठी सर्वसमावेशक कार्यक्रम राबविण्यात येणार आहे. या महत्वपूर्ण उपक्रमासाठी मुक्तांगण व्यसनमुक्ती केंद्र व सी वाय डी ए या संस्थांनी पुढाकार घेतलेला आहे. डॉ. मुक्ता पुणतांबेकर यांनी विधी संघर्ष ग्रस्त बालकांसाठी मोफत समुपदेशन व उपचार करणार असल्याचे सांगितले. सी वाय डी ए संस्थेच्या वतीने बालकांसाठी कौशल्य विकास व रोजगार निर्मितीसाठी सहकार्य करण्यात येणार आहे. उपस्थित मान्यवरांनी देखील यावेळी मार्गदर्शन केले. कार्यशाळेला उपस्थित विधी संघर्ष ग्रस्त बालकाच्या आईकडून निर्भय विद्यार्थी अभियानाच्या वतीने पुणे पोलिसांकडून राबविण्यात येणाऱ्या या चांगल्या उपक्रमाबद्दल आभार व्यक्त करण्यात आले. आमच्या मुलांना चांगले सांगणारे कोणी नाही. आम्ही कष्ट करणारे लोक आहोत. आपल्यासारख्या शिकलेल्या चांगल्या संस्काराच्या लोकांकडून आमच्या मुलांना सुधारण्याची संधी दिली जात आहे याबद्दल त्यांनी जाहीर आभार व्यक्त केले. कार्यक्रमाचे सूत्रसंचालन विजय शिवले यांनी केले आभार विवेक देव यांनी मानले.