वारजेत एमएनजीएल विरोधात नागरिकांमध्ये संताप ; नागरीकांना तातडीने कनेक्शन द्या : दिपाली धुमाळ
वारजे : वारजे हायवे परिसरात असणाऱ्या सोसायट्यांमधील नागरिकांकडून एमएनजीएल बाबत अनेक तक्रारी केल्या जात आहेत. पैसे भरून काही नागरिकांना एमएनजीएलचे गॅस कनेक्शन मिळालेले नाही. काही ठिकाणी तीन चार वर्षापासून लाईन टाकून ठेवण्यात आलेल्या आहेत मात्र कनेक्शन दिले गेलेली नाहीत त्यामुळे एमएनजीएल प्रशासनाच्या बाबत नागरिकांच्या मनात संताप आहे. एमएनजीएलने याकडे लक्ष देऊन नागरिकांना गॅस कनेक्शन देण्यासाठी योग्य ती प्रक्रिया तातडीने राबवावी अशी मागणी विरोधी पक्षनेत्या दिपाली धुमाळ यांनी केली आहे.
आज एमएनजीएल चे स्थानिक अधिकारी ओंकार वाघमारे व इतर अधिकाऱ्यांची दिपाली धुमाळ यांच्या कार्यालयात बैठक झाली. यावेळी माजी नगरसेवक बाबा धुमाळ सोसायट्यांमधील नागरिक उपस्थित होते. यावेळी वाघमारे यांनी कामातील अडचणी सांगितल्या व सप्टेंबर, ऑक्टोंबर काम पूर्ण केले जाईल असे सांगितले.
धुमाळ यांनी सांगितले की, वारजे हायवे परिसरातील अनेक सोसायट्यांमधील नागरिक एमएनजीएलची गॅस लाईन येऊनही गॅस कनेक्शनच्या प्रतीक्षेत आहेत. काहींना कनेक्शन मिळाले आहे तर काहींना मिळाले नाही. ५ ते ६ हजार रुपये भरूनही काही नागरिकांना कनेक्शन मिळालेले नाही. या परिसरात असणारे एमएनजीएलचे अभियंते, ठेकेदार, अधिकारी वारंवार बदलले जात असल्याने कामात दिरंगाई होत आहे. तीन चार वर्षापूर्वी टाकलेल्या लाईन सापडत नसल्याचा प्रकार घडत आहेत. एकूणच एमएनजीएलच्या या सावळ्या गोंधळामुळे नागरिकांना मनस्ताप सहन करावा लागत आहे.
एमएनजीएल ने तातडीने नागरिकांच्या समस्येचे निराकरण करून त्यांना गॅस कनेक्शन द्यावीत, महापालिकेकडून काही सहकार्य लागणार असेल तर त्याबाबत पालिका अधिकाऱ्यांशी चर्चा करण्यात येईल पण एमएनजीएल आता गॅस कनेक्शन देऊन नागरिकांना होणार त्रास थांबवावा अशी मागणी धुमाळ यांनी केली आहे.
