पुण्याचे माजी खासदार सुरेश कलमाडी यांचे निधन
पुणे : पुण्याचे माजी खासदार सुरेश कलमाडी यांचे आज पहाटे साडेतीन वाजता निधन झाले. वयाच्या 82 व्या वर्षी त्यांनी अखेरचा श्वास घेतला.गेल्या अनेक दिवसांपासून त्यांची प्रकृती बिघडली होती. सुरेश कलमाडी एक भारतीय राजकारणी आणि ज्येष्ठ क्रीडा प्रशासक होते.ते भारतीय राष्ट्रीय काँग्रेसचे माजी सदस्य होते . कलमाडी मे २०१४ पर्यंत पुण्यातून खासदार होते.
मंगळवारी पहाटे साडे तीन वाजता त्यांचे निधन झाले आहे. दुपारी दोन वाजेपर्यंत त्यांच्या राहत्या घरी कलमाडी हाऊस कर्वे रस्ता येथे त्यांचे पार्थिव अंत्य दर्शनासाठी ठेवण्यात येणार आहे. तर तीन वाजता वैकुंठ स्मशानभूमीत शासकीय इतमामात अंत्यसंस्कार करण्यात येणार आहेत.
भारतीय हवाई दलात ‘पायलट’ म्हणून आपल्या कारकिर्दीची सुरुवात करणाऱ्या कलमाडींनी पुढे राजकारणात मोठे स्थान मिळवले. पुण्याचे खासदार, केंद्रीय मंत्री आणि भारतीय ऑलिम्पिक असोसिएशनचे (IOA) अध्यक्ष म्हणून त्यांनी अनेक वर्षे काम पाहिले. ‘पुणे फेस्टिव्हल’ आणि ‘पुणे आंतरराष्ट्रीय मॅरेथॉन’च्या माध्यमातून त्यांनी पुण्याला जागतिक नकाशावर आणले.
पुणे शहराच्या विकासासाठी, विशेषतः विमानतळ विकास, मेट्रो प्रकल्प आणि इतर पायाभूत सुविधांच्या कामांमध्ये त्यांचा मोठा हात होता. त्यांच्या याच राजकीय वर्चस्व, प्रशासकीय पकड आणि विकासकामांच्या जबाबदारीमुळे त्यांना पुण्याचे ‘कारभारी’ म्हणून ओळखले जाऊ लागले, जणू ते शहराचे व्यवस्थापकच आहेत. क्रीडा प्रशासन: राष्ट्रकुल क्रीडा स्पर्धांच्या आयोजनात त्यांची भूमिका आणि त्यानंतरचे वाद यामुळेही ते चर्चेत होते, पण पुण्याच्या संदर्भात त्यांची “सबसे बडा खिलाडी सुरेश भाई कलमाडी” ही उपाधी स्थानिक राजकारणातून आली होती.
1996 ते 2011 पर्यंत त्यांनी भारतीय ऑलिंपिक संघ (IOA) चे अध्यक्ष पद सांभाळले. या भूमिकेतून त्यांनी भारतात अनेक आंतरराष्ट्रीय क्रीडा कार्यक्रमांचे आयोजन आणि नियोजन केले. 2010 मध्ये दिल्ली येथे राष्ट्रकुल क्रीडा स्पर्धा (CWG) आयोजक समितीचे अध्यक्ष म्हणून कलमाडी होते. या स्पर्धेच्या खर्च आणि कंत्राटांमध्ये अधिक खर्च, अनुचित व्यवहार आणि भ्रष्टाचाराचे आरोप करण्यात आले. 25 एप्रिल 2011 रोजी सीबीआयने कलमाडी यांना भ्रष्टाचार आणि साजिश (IPC 120B, 420) अंतर्गत अटक केली. मनी लाँडरिंगशी संबंधित आरोपांवरून ईडीने स्वतंत्र तपास सुरू केला. या तपासातही पुरावे पुरेसे नसल्यामुळे 2025 मध्ये ईडीने क्लोजर रिपोर्ट दाखल केला आणि न्यायालयाने तो स्वीकारला.
कलमाडी यांचे राजकीय अस्तित्व या प्रकरणानंतर काही काळासाठी कमी झाले, पण 2025 मधील क्लोजर निकालामुळे पुन्हा एकदा त्यांची प्रतिमा चांगली होऊ लागली. काही महिन्यांपूर्वी त्यांनी पुणे महापालिकेत दिलेली भेट ही चर्चेचा विषय ठरली होती.
