राष्ट्रवादीच्या शहराध्यक्षांवर गुन्हा दाखल करावा : मुरलीधर मोहोळ

पुणे : राष्ट्रवादी काँग्रेस पक्षाच्या पुणे शहर कार्यालयाच्या उद्घाटन कार्यक्रमास मोठ्या प्रमाणावर गर्दी झाल्याने कोरोना काळात अशी गर्दी करणे निषेधार्ह आहे असे म्हणत महापौर मुरलीधर मोहोळ यांनी राष्ट्रवादीचे शहराध्यक्ष प्रशांत जगताप यांच्यावर टीका केली आहे. यावर पोलिसांनी बघ्याची भूमिका न घेता तातडीने सामान्य नागरिकांप्रमाणेच राष्ट्रवादीच्या शहराध्यक्षांवर गुन्हा दाखल करावा अशी मागणी ही मोहोळ यांनी केली आहे. A case should be filed against the NCP city president : Muralidhar Mohol

मोहोळ यांनी म्हंटले आहे की, पुणे शहराने कोरोनाच्या दोन्ही लाटांचा सामना किती हिमतीने आणि कसा केला आहे, याचे थोडेही भान राष्ट्रवादीने ठेवले नाही, हे निषेधार्ह आहे. संकटकाळात योद्धयांप्रमाणे लढणाऱ्या प्रत्येकाचा हा अपमान असून पुणेकर नागरिक या चमकोगिरीला कधीही माफ करणार नाहीत. यावर पोलिसांनी बघ्याची भूमिका न घेता तातडीने सामान्य नागरिकांप्रमाणेच राष्ट्रवादीच्या शहाराध्यक्षांवर गुन्हा दाखल करावा.

भाजपकडून उपस्थित करण्यात आलेले प्रश्न १)चमकोगिरीत माहीर असणाऱ्या राष्ट्रवादीच्या शहराध्यक्षांना पुणेकरांना संकटात घालण्याचा
अधिकार दिला कोणी? २) गृहखाते स्वत:कडे असणारी राष्ट्रवादी स्वत:च्या कार्यकर्त्यांवर सामन्यांप्रमाणे गुन्हे दाखल करणार का? ३) राष्ट्रवादीचे शहराध्यक्ष पुणेकरांची माफी कधी मागणार ? ४) चमकोगिरीसाठी गर्दी करणे म्हणजे कोरोना योद्धयांचा अपमान नाही का? ५)कोरोनाचे नियम धाब्यावर बसवणाऱ्या राष्ट्रवादीला पुणेकरांनी का माफ करावं?