परिसराच्या वैचारिक समृद्धीसाठी ग्रंथालये आवश्यक : डॉ संगीता बर्वे

वारजे साहित्य कट्ट्यावर डॉ. रामचंद्र देखणे ग्रंथालयाचे उद्घाटन

पुणे : आपण भौतिक सुखाच्या मागे धावत चाललोय. आपल्याकडे रस्तोरस्ती भरपूर खाऊगल्ल्या होतायत पण ग्रंथालय होत नाहीत. पण वारजे परिसरात ग्रंथालयाची निर्मिती होत असेल तर ती आनंदाची गोष्ट असून यामुळे परिसराचा वैचारिक विकास साधण्यास मदत मिळणार आहे. असा विचार सर्व लोकप्रतिनिधींनी करणं गरजेचं असल्याचं मत साहित्यिक डॉ. संगीता बर्वे यांनी व्यक्त केलं.

माजी विरोधी पक्षनेत्या दिपाली धुमाळ यांच्या प्रयत्नांतून पुणे महानगरपालिका मराठी भाषा संवर्धन समिती आणि वारजे साहित्यिक कट्टाच्या वतीने सुरू करण्यात आलेल्या साहित्यिक स्व.डॉ.रामचंद्र देखणे ग्रंथालयाचे उद्घाटन   प्रसिद्ध बालसाहित्यिका डॉ. संगीता बर्वे यांच्या हस्ते करण्यात आले. यावेळी ज्येष्ठ साहित्यिका माधवी वैद्य, दिपाली धुमाळ, माजी नगरसेवक व शिक्षण मंडळाचे माजी अध्यक्ष बाबा धुमाळ, मलिक्कर्जून नवांदे, भावार्थ देखणे, पूजा देखणे, पद्मश्री देखणे, धर्मराज महाराज हांडे, गणेश भगत, ज्योत्स्ना चांदगुडे, वी. दा. पिंगळे उपस्थित होते. यावेळी बर्वे यांचा साहित्य अकादमी पुरस्कार मिळाल्याबद्दल साहित्य कट्टा वारजेच्या वतीने विशेष सन्मान करण्यात आला.

बर्वे म्हणाल्या जागोजागी ग्रंथालये झाली तर  वैचारिक दृष्ट्या परिपक्व महाराष्ट्र तयार होईल. ज्यांनी लोककलेच्या मध्यमातून समाजाला घडवण्याचं काम केलं त्या डॉ. रामचंद्र देखणे यांच्या नावाने हे ग्रंथालय सुरू होत आहे. देखणे सरांची आणि माझी पहिली भेट सांगलीतील एका कार्यक्रमात झाली. त्यांनी सादर केलेली लोककला पाहून मी भारावून गेले होते.

रोजच्या दिनक्रमातून बाजूला जाऊन ज्यावेळी वारकऱ्यांची वैद्यकीय सेवा करण्यासाठी वारीत सहभागी झाले होते. त्यावेळी पुन्हा सरांची भेट झाली. एका गावात झाडाच्या पारावर ते लोककलेच्या माध्यमातून प्रबोधन करत होते. या वारीतला अनुभव फार वेगळा होता. वारीत सुचलेल्या ओळी मी सरांना दाखवल्या त्यावेळी त्यांनी ही कविता नसून अभंग आहे असे कैतुक केले. 

देखणे सर आपल्यातून लवकर निघून जाणे ही समाजाची फार मोठी हाणी आहे. तहान भूक हरवून सरांसारखी लोक समाजासाठी काम करत असतात. अशा लोकांची काळजी समाजाने घेणं गरजेचं आहे. 

या उद्घाटन सोहळ्यानंतर शब्दब्रम्ह या चार दिवसीय  व्याख्यानमालेचा प्रारंभ करण्यात आला. पहिल्या दिवशी महाराष्ट्राची लोककला या विषयावर डॉ. भावार्थ रामचंद्र देखणे यांचे व्याख्यान झाले. प्रास्तविक बाबा धुमाळ यांनी केले तर कार्यक्रमाचे सूत्रसंचालन डी.के. जोशी यांनी केले.