निसर्ग कवी ना. धो. महानोर यांच्या गीतांनी व कवितांनी रम्य ठरली कर्वेनगरवासीयांची दिवाळी पहाट!
कर्वेनगर : निसर्ग कवी ना. धो. महानोर यांची मनाला भावून जाणारी, आपलीशी वाटणारी मराठी गीते, पहाटेच्या सुमारास कानावर पडली आणि कर्वेनगरवासीयांची दिवाळी पहाट आज रम्य झाली. निमित्त होते ओंकार चॅरिटेबल ट्रस्ट, राष्ट्रवादी काँग्रेस कोथरूड विधानसभा मतदारसंघाचे अध्यक्ष स्वप्नील दुधाने यांच्या वतीने आयोजित करण्यात आलेल्या घन ओथंबून येती.. या दिवाळी पहाट कार्यक्रमाचे.
दीपावली म्हणजे आपणा साऱ्यांसाठी उत्साह आणि आनंद द्विगुणित करणारा सण! याच दीपावलीच्या औचित्याने स्वप्नील दुधाने यांच्या वतीने दरवर्षी मोठ्या उत्साहात दिवाळी पहाट कार्यक्रमाचे आयोजन करण्यात येत असते.
या वर्षी भारतरत्न डॉ. ए. पी. जे. अब्दुल कलाम ई-लर्निंग स्कूल या ठिकाणी निसर्गकवी स्व. ना. धो. महानोर यांना आदरांजली देण्यासाठी त्यांच्या सुश्राव्य गीतांचा कार्यक्रम आयोजित करण्यात आला होता. यावेळी गायक आणि वादक यांनी आपल्या कलेचा आविष्कार करत उपस्थित रसिक श्रोत्यांची मने जिंकली.
यावेळी आपल्या कोथरूड परिसरातील रहिवासी असणारे रोहन कडू ज्यांना बार्सिलोना, स्पेन या ठिकाणी ‘आयर्न मॅन’ स्पर्धेत सर्वोच्च कामगिरीचे दर्शन घडवत ‘आयर्न मॅन’ किताब पटकावला आहे, तसेच जिनिअस चाईल्ड विथ एक्सस्पेशनल ग्रास्पिंग एबॅलिटीज आणि रायझिंग स्टार ऑफ द इयर २०२३ या पुरस्कारांनी सन्मानित करण्यात आलेल्या अवघ्या दोन वर्षीय वृत्तिका बासुतकर हिचे नाव कलाम वर्ल्ड रेकॉर्डमध्ये समाविष्ट करण्यात आले आहे. आपल्या देशाचे आणि पर्यायाने पुण्यनगरीचे नाव जगाच्या नकाशावर कोरणाऱ्या या दोघांचा या प्रसंगी सन्मान करण्यात आला. माजी नगरसेविका लक्ष्मी दुधाने व स्वप्नील दुधाने यांच्या हस्ते हे सन्मान करण्यात आले.
हा सन्मान सोहळा आणि सुमधुर गीतांमुळे रसिक श्रोत्यांना कलाकारांनी जागीच खिळवून ठेवले. स्व. महानोर आणि त्यांच्या साहित्यावर निर्व्याज प्रेम करणाऱ्या अनेक रसिकांनी यावेळी उपस्थित राहत कार्यक्रमाचा आस्वाद घेतला. सादर झालेल्या गीतांनी व कवितांनी उपस्थितांची मने प्रसन्न केली.
