राज ठाकरेंनी शरद पवारांकडून काहीतरी शिकायला हवं : बृजभूषण सिंह
मुंबई : “आजही शरद पवार आम्हाला भेटले, तर मी त्यांच्याशी नजर चुकवणार नाही. मी त्यांना नमस्कार करेन. ते माझ्यासाठी एक चांगले नेते आहेत. त्यांच्याकडून राज ठाकरेंनी काहीतरी शिकायला हवं”, असा खोचक सल्ला बृजभूषण सिंह यांनी राज ठाकरेंना दिला आहे. मनसेकडून बृजभूषण सिंह यांच्यासोबत शरद पवार आणि सुप्रिया सुळे यांचे फोटो शेअर केल्यानंतर बृजभूषण सिंह यांनी त्यावर खुलासा केला आहे. त्यासंदर्भात त्यांनी माध्यमांशी बोलताना आपली भूमिका स्पष्ट केली आहे.
आत्तापर्यंत जाहीर पत्रकार परिषदेमधून राज ठाकरेंना विरोध करणं ही माझी वैयक्तिक भूमिका असल्याचं ठामपणे म्हणणारे बृजभूषण सिंह यांनी आता आपण पक्षाचं काम करत असल्याची भूमिका मांडली आहे. उत्तर प्रदेशच्या गोरखपूरमध्ये माध्यमांशी बोलताना त्यांनी हे सांगितलं आहे. पक्षाच्या सांगण्यावरून राज ठाकरेंना विरोध करत आहात का? असा प्रश्न माध्यमांनी विचारला असता “मी पक्षाचं काम करत आहे”, असं बृजभूषण सिंह म्हणाले आहेत.
बृजभूषण सिंह म्हणाले, शरद पवार देशाच्या मोठ्या नेत्यांपैकी एक आहेत. महाराष्ट्र कुस्ती संघासाठी त्यांनी मोठं काम केलं आहे. आम्ही कुस्तीसाठी जे काम केलं, त्यासंदर्भात ते माझं कौतुक करत होते. तीन दिवसांपर्यंत त्यांच्या कार्यकर्त्यांनी ज्या माळा शरद पवारांसाठी येत होत्या, त्या मला घातल्या याचा मला गर्व आहे. माझे संबंध आहेत त्यांच्याशी.”
