बाणेरमध्ये महापौर निधीतून उभे राहणार २१२ बेड्सचे कोविड हॉस्पिटल

पुणे : पुणे शहरामधील वाढती कोरोना संसर्गाची परिस्थिती हाताळण्यास महापालिका सक्षम असून पहिल्या कोरोना लाटेप्रमाणेच दुसऱ्या कोरोना लाटेवरदेखील नियंत्रण आणण्याच्या दृष्टीने महापालिका उपाय योजना करत आहे. त्याचाच भाग म्हणून पुणे महानगरपालिका बाणेर येथे आणखी एक कोविड हॉस्पिटल साकारत आहे, यासाठी महापौर निधी उपलब्ध करुन देण्यात आला आहे. अशी माहिती महापौर मुरलीधर मोहोळ यांनी दिली.Kovid Hospital with 212 beds will be set up in Baner from the mayor’s fund

महापौर मोहोळ यांनी बाणेर येथील सर्व्हे क्र. ३३ येथे पुणे महापालिकेच्या मान्य विकास आराखड्यात सी२-२  हे वाणिज्य वापराचे आणि पार्किंग हे आरक्षण असलेल्या महापालिकेच्या ताब्यात आलेल्या जागेत २१२ बेड्सचे कोविड रुग्णालय साकारत असून याचा आढावा आज पदाधिकारी, अधिकारी आणि नगरसेवकांसमवेत घेतला. या कोविड रुग्णालयात १५० ऑक्सिजन बेड्स आणि ६२ आयसीयू बेड्स असणार आहेत. कमीत कमी कालावधीत हे हॉस्पिटल सुरु केले जाणार आहे. या पाहणी वेळी आयुक्त विक्रम कुमार,सभागृहनेते गणेशजी बिडकर ,स्थानिक नगरसेवक अमोल बालवडकर, ज्योती कळमकर, बाबुराव चांदेरे ,प्रल्हाद सायकर, शहर अभियंता प्रशांत वाघमारे हेही यावेळी उपस्थित होते.

मोहोळ म्हणाले, दुसऱ्या लाटेच्या काळात स्वाभाविकपणे कोरोना रुग्णांची संख्या पहिल्यापेक्षा अधिक प्रमाणात वाढत आहे. त्यादृष्टीने व्यवस्था व व्यवस्थापन वाढवण्याची जबाबदारी महापालिका कार्यतत्परतेने पार पाडत आहे. पहिल्या लाटेचा सामना करण्यासाठी बाणेर भागात अद्ययावत कोविड रुग्णालय महापालिकेने सुरू केले होते. एक वर्ष अत्यंत चांगली सुविधा व उपचार या हॉस्पिटलच्या माध्यमातून कोरोना रुग्णांना देण्यात येत आहेत. महापालिकेचे हे एक मोठे यश असून समाधानाची बाब देखील आहे. त्याच धर्तीवर बाणेरमध्ये सर्व्हे क्र. ३३ येथे आता दुसरे कोविड हॉस्पिटल महापालिका उभारत आहे.

बाणेर येथील दुसरे कोविड हॉस्पिटल उभारण्यासाठी सर्वजण प्रयत्न करत असून लवकरच अद्ययावत २१२ बेडचे हॉस्पिटल बाणेर भागामध्ये उभारले जाणार जाईल. हॉस्पिटल उभारणीसाठी आवश्यक तो सर्व निधी महापालिकेने तरतूद केला असून महापौर निधीतून निधी देण्यात आला आहे.

बाणेरमध्ये साकारत असलेल्या दुसऱ्या कोविड रुग्णालयात १ हजार एलपीएम या क्षमतेचे चार ऑक्सिजन जनरेटिंग प्लान्ट उभारण्याचे नियोजन करण्यात येत आहे. शिवाय या ठिकाणी लिक्विड ऑक्सिजन टॅंकचीही उभारणी केली जात आहे, अशीही माहिती महापौर मोहोळ यांनी दिली. तसेच वातानुकूलित इमारतीसह सीसीटीव्हीदेखील यात समाविष्ट करण्यात येत आहेत.

#PuneFightsCorona