पुण्यात हार्डवेअर दुकानाला आग, चौघांचा होरपळून मृत्यू
पुणे : पिंपरी चिंचवडमधील चिखली पूर्णानगर भागात हार्डवेअरच्या दुकानाला लागलेल्या भीषण आगीत एकाच कुटुंबातील चार जणांचा होरपळून मृत्यू झाला आहे. चिमणाराम चौधरी, ज्ञानुदेवी चौधरी, सचिन चौधरी (वय 10),भावेश चौधरी (वय 15) यांचा ह्या आगीत होरपळून मृत्यू झाला आहे.
पहाटेच्या सुमारास चिखलीमधील सचिन हार्डवेअरला ही आग लागली होती, याच हार्डवेअर दुकानामध्ये चौधरी कुटुंब हे वास्तव्यास होते. ही आग इतकी भीषण होती की ह्या आगीत एकाच कुटुंबातील 4 जणांचा होरपळून मृत्यू झाला. शॉटसर्किट मुळे ही आग लागली असल्याचा अग्निशमन दलाचा प्राथमिक अंदाज व्यक्त करण्यात आला आहे. पिंपरी चिंचवड अग्निशमन दलाने ही आग नियंत्रणात आणली असून कुलिंगचे काम सुरू आहे. घटनास्थळी अग्निशमन दल पोलीस तसेच वरिष्ठ प्रशासकीय अधिकारी दाखल झाले असून पुढील कार्यवाही व मदत कार्य सुरू आहे.