कुख्यात कल्याणी देशपांडेसह सहकाऱ्याला ७ वर्षांची सक्तमजुरी
पुणे : वेश्या व्यवसायाच्या माध्यमातून आपले आर्थिक बस्तान बसवणाऱ्या व संघटितपणे गुन्हेगारी करणाऱ्या कुख्यात कल्याणी देशपांडेसह दोघांना विशेष न्यायालयाने ७ वर्ष सक्तमजूरी आणि १० लाखाचा दंड ठोठावला आहे. विशेष न्यायाधीश एस. आर. नावंदर यांनी हा निकाल दिला.
जयश्री उर्फ कल्याणी उमेश देशपांडे आणि रवी उर्फ प्रदीप रामहरी गवळी अशी शिक्षा झालेल्या आरोपींची नावे आहेत. त्यांना अनैतिक व्यापार प्रतिबंधक कायद्याच्या (पिटा) तीन, चार आणि पाच कलमांन्वये आणि महाराष्ट्र संघटित गुन्हेगारी नियंत्रण कायद्याच्या (मकोका) कलम ३ (१) (२) व कलम ३ (४) नुसार न्यायालयाने दोषी ठरवले. आरोपींनी सर्व शिक्षा एकत्रित भोगायच्या असून, दंडाची रक्कम न भरल्यास अतिरिक्त एक वर्षाचा साधा कारावास भोगावा लागेल, असेही न्यायालयाने निकालपत्रात नमूद केले आहे.
कोथरूड भागातील एका सोसायटीत हाय प्रोफाईल वेश्या व्यवसाय चालवल्यामुळे कल्याणी देशपांडे आणि तिचा साथीदार प्रदीप गवळी यांना २०१६ मध्ये अटक करण्यात आली होती. पोलिसांनी बनावट ग्राहक पाठवून या वेश्या व्यवसायाचा पर्दाफाश केला होता. कल्याणी देशपांडे हिच्यावर विविध पोलीस ठाण्यात पंधरा गुन्हे दाखल असल्याने तिच्यावर ‘मकोका’ कायद्यानुसार कारवाई करण्यात आली. तत्कालीन वरिष्ठ पोलीस निरीक्षक नितीन भोसले-पाटील आणि पोलीस निरीक्षक राधिका फडके यांनी या गुन्ह्याचा तपास करून आरोपींविरोधात न्यायालयात आरोपपत्र दाखल केले होते.
या खटल्यात विशेष सरकारी वकील विजय फरगडे यांनी काम पाहिले. त्यांनी सरकार पक्षातर्फे चौदा साक्षीदार तपासले. त्यामध्ये पंचांसह पीडित तरुणींची साक्ष महत्त्वाची ठरली. आरोपींनी वेश्या व्यवसायाच्या माध्यमातून संघटित गुन्हेगारी करत आर्थिक लाभ कमवला आहे. हा गुन्हा गंभीर स्वरूपाचा असून, आरोपींना जास्तीत जास्त कठोर शिक्षा देण्याची मागणी विशेष सरकारी वकील विजय फरगडे यांनी केली. सरकार व बचाव पक्षाचा युक्तिवाद ऐकल्यावर न्यायालयाने आरोपींना शिक्षा सुनावली. ‘पिटा’ कायद्यासह ‘मकोका’ कायद्याचे उल्लंघन केल्याप्रकरणी झालेली ही पहिलीच शिक्षा आहे, अशी माहिती फरगडे यांनी दिली.
