महाराष्ट्र

मुख्यमंत्री उद्धव ठाकरेंनाही कोरोनाची लागण

मुंबई : महाराष्ट्राचे मुख्यमंत्री उद्धव ठाकरेंना करोनाची लागण झाली आहे. काँग्रेसचे प्रदेशाध्यक्ष नाना पटोले यांनी मुंबईत प्रसारमाध्यमांशी बोलताना माहिती दिली आहे. मंत्रिमंडळाची बैठक होणार असून या बैठकीला उद्धव ठाकरे व्हिडिओ कॉन्फरन्सिंगच्या माध्यमातून उपस्थित राहतील असं नाना पटोले यांनी यावेळी सांगितलं. मुख्यमंत्री कार्यालयाकडून मात्र अद्याप याबाबत अधिकृत माहिती देण्यात आलेली नाही.

राज्यपाल भगतसिंग कोश्यारी यांनाही करोनाची लागण झाली आहे. शिवसेना नेते एकनाथ शिंदे यांनी बंड पुकारल्याच्या पार्श्वभूमीवर मुंबईत काँग्रेस आमदारांची बैठक पार पडली. यानंतर काँग्रेस नेते कमलनाथ आणि नाना पटोले यांनी प्रसारमाध्यमांशी संवाद साधला. आमचा एकही आमदार फुटला नसल्याचं यावेळी कमलनाथ यांनी सांगितलं. तसंच उद्धव ठाकरे कोविड पॉझिटिव्ह असून फोनवरुन त्यांच्याशी चर्चा झाल्याची माहिती दिली.

“उद्धव ठाकरेंना करोनाची लागण झाली असून माझी त्यांच्याशी फोनवरुन चर्चा झाली. काँग्रेस महाविकास आघाडी सरकारच्या पाठीशी राहील असं आश्वासन दिलं आहे. भाजपने झारखंड, अरुणाचल प्रदेश, मध्य प्रदेशात ज्या प्रकारे पैसा आणि पदाचं राजकारण केलं तसंच राजकारण सुरु आहे. हा आपल्या संविधानाशी खेळ आहे. उद्धव ठाकरेंच्या नेतृत्वात शिवसेनेत एकता कायम राहील याचा आम्हाला विश्वास आहे,” असं कमलनाथ यांनी सांगितलं.

पुढे बोलताना त्यांनी सांगितलं की, “मी आता शरद पवारांसोबतच्या बैठकीसाठी जात आहे. उद्धव ठाकरेंसोबतही बैठक होती, पण त्यांना करोना झाला आहे. त्यामुळे ही बैठक होणार नाही”. मंत्रिमंडळ सर्वांच्या हिताचा निर्णय घेईल असा विश्वास यावेळी त्यांनी व्यक्त केला.

“मंत्रिमंडळ बैठकीत सरकार बरखास्तीबाबत कोणतीही चर्चा होणार नाही. महाविकास आघाडीचं सरकार पूर्ण ताकदीने चालेल. त्यादृष्टीने भूमिका घेतली जाईल,” असं नाना पटोले म्हणाले आहेत.

Related Articles

Leave a Reply

Back to top button
error: सर्व हक्क सुरक्षित असून कॉपी करू नये