पहिलीच्या अभ्यासक्रमात होणार हा मोठा बदल
मुंबई : यंदाच्या शैक्षणिक वर्षापासून मुलांना रोजच्या वापरातील इंग्रजी शब्दांची ओळख करुन देण्यासाठी द्विभाषिक पाठ्यपुस्तकं तयार असतील, अशी माहिती वर्षा गायकवाड यांनी दिली आहे. प्रत्येक मुलाला त्याच्या मातृभाषेत चांगलं कळतं. पण त्याचसोबत त्या शब्दाला इंग्रजी शब्द काय आहे हे माहिती असावं म्हणून आम्ही हे करत आहोत, असं त्यांनी स्पष्ट केले. मराठी माध्यमांमध्ये विद्यार्थ्यांना पहिलीपासून इंग्रजीची ओळख करुन दिली जाईल असं त्यांनी सांगितलं आहे. विधानसभेत बोलताना त्यांनी यासंबंधी माहिती दिली आहे.
“अनेक आमदारांनी सीबीएसईचा अभ्यासक्रम असा आहे सांगितलं. मी एक गोष्ट नम्रपणे सांगू इच्छिते की, आपलं एक बोर्ड असून त्याचंही अस्तित्व आहे. त्याचा अभ्यासक्रम कसा चांगला करता येईल यासाठी आम्ही प्रयत्न करत आहोत. पहिलीचा अभ्यासक्रम बदल आहोत आणि आदर्श शाळा आहेत तिथे दुसरीचा अभ्यासक्रम बदलत आहोत,” असं वर्षा गायकवाड यांनी सांगितलं. पुस्तकांचं ओझं होणार नाही याचं आपण तंतोतंत पालन करत आहोत. त्यामुळे आपण सध्या राज्यात पहिलीसाठी एकत्रित आणि द्विभाषिक पाठ्यपुस्तकं आणत आहोत, असं त्यांनी सांगितले.
