कोथरूडमधून चंद्रकांत पाटील एक लाखाहून अधिक मताधिक्याने विजयी; भाजप कार्यकर्त्यांचा मोठा जल्लोष

पुणे : महाराष्ट्राचे उच्च व तंत्रशिक्षण मंत्री चंद्रकांत पाटील यांनी कोथरूड मतदारसंघात एक लाखाहून अधिक मतांची आघाडी घेत मोठा विजय मिळवला आहे. ते शिवसेनेचे (उद्धव बाळासाहेब ठाकरे) उमेदवार चंद्रकांत मोकाटे यांच्या विरोधात लढत होते. विजया नंतर कोथरूड मध्ये भाजप कार्यकर्त्यांनी मोठा जल्लोष केला आहे.

भारतीय जनता पक्षाचा बालेकिल्ला असलेल्या कोथरूड मतदार संघात पाटील यांच्या मोठ्या विजयाचा अंदाज वर्तवण्यात आला होता. त्यानुसारच पाटील यांनी एक लाखाहून अधिक मताधिक्य मिळवून विजय मिळवला आहे.

भारतीय जनता पक्षाचा (भाजप) पारंपारिक बालेकिल्ला असलेल्या कोथरूडमध्ये सहज विजय मानला जात होता, विशेषत: पाटील यांना सलग दुसऱ्यांदा भाजपचे उमेदवार म्हणून उभे केले होते. मूळचे कोल्हापूरचे असलेले पाटील यांनी 2019 मध्ये पहिल्यांदा कोथरूडमधून निवडणूक लढवली होती. त्यावेळी डॉ. मेधा कुलकर्णी आणि मुरलीधर मोहोळ हे इच्छुक उमेदवारही रिंगणात होते, पण डॉ. कुलकर्णी यांची राज्यसभा खासदार म्हणून नियुक्ती झाली आणि मुरलीधर मोहोळ पुण्याचे खासदार आणि केंद्रीय मंत्री झाले.

कोथरूडमध्ये एकूण 4.31 लाख नोंदणीकृत मतदार होते, ज्यात 52.18% मतदान झाले. झालेले मतदान पाहता, चंद्रकांत पाटील यांना एकतर्फी विजय अपेक्षित होता, जो त्यांनी सहज मिळवला.