कर्वेनगरकरांची दिवाळी पाडवा पहाट लतादीदींच्या गीतांनी ठरली संस्मरणीय..

कर्वेनगर : गानसम्राज्ञी लता मंगेशकर यांच्या गीतांनी आज कर्वेनगर वासियांची दीवाळी पाडवा पहाट सुरमयी स्वरांनी संस्मरणीय ठरली. दिवाळी पाडवा निमित्त भारतरत्न गानसम्राजी स्व. लता मंगेशकर यांच्या सांगीतिक कारकिर्दीचा मागोवा घेत त्यांना मानवंदना देणारा मराठी आणि हिंदी अजरामर गीतांचा सुरेल कार्यक्रम कर्वेनगर मध्ये आयोजित करण्यात आला होता. या कार्यक्रमात सादर झालेल्या लतादीदींच्या गीतांनी उपस्थित रसिक श्रोते मंत्रमुग्ध झाले.

माजी नगरसेविका लक्ष्मी दुधाने व राष्ट्रवादी काँग्रेसचे शहर उपाध्यक्ष स्वप्नील दुधाने यांच्या वतीने या दिवाळी पाडवा पहाट कार्यक्रमाचे आयोजन करण्यात आले होते. यावेळी गायक मीनल फडके पोंक्षे, मालविका दीक्षित, अजित विसपुते, रमा कुलकर्णी यांनी लतादीदींची गाणी सादर करत उपस्थित रसिकांची दाद मिळवली.

डौल मोराच्या मानचा रं डौल मानचा याबरोबरच राम कदम यांचे संगीत आणि जगदीश खेबूडकर यांचे गीत असणारे पिंजरा चित्रपटातील दे रे कान्हा, चोळी अन्‌ लुगडी, ना. धों. महानोर लिखित व पं. हृदयनाथ मंगेशकर यांनी संगीतबद्ध केलेल्या राजसा, जवळी जरा बसा, जीव हा पिसा तुम्हांविण बाई, या लतादीदींच्या सादर झालेल्या गीतांनी दिवाळी पाडवा पहाट रंगतदार ठरली.

या बरोबरच महल या हिंदी चित्रपटातील आएगा आएगा आनेवाला, गाईड मधील पिया तोसे नैना लागे रे, नैना लागे रे, परख चित्रपटातील ओ सजना, बरखा बहार आयी या गीतांनी उपस्थित रसिक मंत्रमुग्ध झाले. ए मेरे वतन के लोगो या लता दीदींच्या देशभक्तीपर अजरामर गीताने कार्यक्रमाची सांगता झाली. या संगीत मैफलीत वादक म्हणून प्रसन्न बाम, विशाल गंडूतवार, अजय अत्रे, सचीन जांभेकर यांनी साथ दिली तर अभिजीत कुलकर्णी यांनी कार्यक्रमाचे निवेदन केले.

यावेळी नेपाळ येथील तायक्वांदो जी टू स्पर्धेत कर्वेनगरमधील शिवानी भिलारे हीचा सिल्व्हर पदक मिळवल्याबद्दल तसेच सिंहगडावर १ हजार 7 वेळा ट्रेकिंग केलेल्या 72 वर्षीय उत्तमराव ओवले यांचा यावेळी लक्ष्मी दुधाने व स्वप्नील दुधाने यांच्या वतीने विशेष सन्मान करण्यात आला.