२१ हजार दिव्यांमधून साकारले तेजोमय ‘जय श्रीराम’
पुणे : अयोध्येतील श्रीराम प्राणप्रतिष्ठा सोहळ्याच्या पार्श्वभूमीवर आपल्या संस्कृती प्रतिष्ठान आणि शिप्र मंडळींच्या वतीनं स.प. महाविद्यालय मैदानातील श्रीराम नगरीत भव्य दीपोत्सव साजरा कऱण्यात आला. आणि महाआरती करण्यात आली. या महाआरतीसह श्रीराम कथेचा समारोप झाला.
हजारो पुणेकरांसमवेत तब्बल २१ हजार दिव्यांनी प्रभू श्रीरामाची तेजोमय प्रतिकृती या दिव्यांनी साकारली. हजारो दिव्यांनी आणि नयनरम्य आतषबाजीने श्रीराम नगरी परिसर उजळून निघाला. भाजप सरचिटणीस आणि माजी महापौर मुरलीधर मोहोळ यांनी या कार्यक्रमाचे आयोजन केले होते.
२१ हजारांहून अधिक लखलखत्या दिव्यांपासून सूर्याच्या व कमळाच्या आकृतीमध्ये तेजोमय ‘श्रीराम’ अशी रामाची प्रतिकृती साकारली होती. या अशा अभूतपूर्व उपक्रमाला महिलांनी मोठ्या संख्येने उपस्थित राहून दीप प्रज्वलीत केले. रामगीते, रामनामाचा जयघोष, रामाची आराधना आणि अखेरीस झालेली महाआरती यामुळे परिसर भक्तिमय झाला होता.
‘जय श्री राम’, ‘सियावर रामचंद्र की जय’ ‘श्रीराम जय राम जय जय राम’ अशा उद्घोषांनी परिसर दुमदुमला होता. राम मंदिराच्या प्रतिकृतीवर झालेला लेझर शो आणि फटाक्यांच्या आतषबाजीने उपस्थितांच्या डोळ्यांचे पारणे फेडले. यावेळी झालेल्या गंगा घाट आरतीने भक्तिरसाची अनुभूती दिली.
अयोध्येतील श्रीरामांची मूर्ती साकारताना स्थापित केलेल्या समितीमधील ज्येष्ठ मूर्तिकार डॉ. गो. बं. देगलूरकर, निवृत्त पोलीस अधिकारी भानुप्रताप बर्गे यांच्या शुभहस्ते पहिला दिवा प्रज्वलित करण्यात आला. त्यानंतर हजारो महिलांनी दिवे प्रज्वलित केले.
