पुणे शहरातील विकासकामे, नागरिकांची दैनंदिन कामे तातडीने होण्यासाठी राष्ट्रवादी काँग्रेसचे शहराध्यक्ष दीपक मानकर यांनी घेतली पुणे मनपा आयुक्तांची भेट
पुणे : पुणे शहरातील अनेक प्रलंबित प्रश्नांबाबत राष्ट्रवादी काँग्रेस पार्टी शहराध्यक्ष दीपक मानकर यांनी पुणे महानगरपालिका आयुक्तांची भेट घेऊन चर्चा केली. विधानसभा निवडणुकीच्या आचारसंहितेमुळे पुणे शहरातील विकासकामे किंवा प्रभागातील मूलभूत कामे ठप्प झाली होती. ती लवकरात लवकर सुरू करून पूर्ण करावीत. त्यामध्ये प्रामुख्याने कचरा व्यवस्थापन, विद्युत खांब बसविणे, ड्रेनेज, पाणी पुरवठा, विविध रस्ते, वाहतुकीचे प्रश्न यांसह विविध प्रमुख विभागामध्ये असलेली नागरिकांची दैनंदिन कामे याबाबत सविस्तर चर्चा करण्यात आली.
यावेळी आयुक्त राजेंद्र भोसले यांनी यासंदर्भात सकारात्मक प्रतिसाद देत तातडीने कार्यवाही करण्याचे संबधित विभाग प्रमुखांना निर्देश दिले. सदरप्रसंगी शहराध्यक्ष श्री. दीपक मानकर, मा.विरोधी पक्षनेते दत्ता सागरे,राहुल कांबळे , पदाधिकारी आदी उपस्थित होते.
मानकर म्हणाले, गेल्या अनेक दिवसांपासून पुणे शहरातील अनेक कामे प्रलंबित आहेत. यामध्ये विकास कामे आणि मूलभूत प्रश्न प्रलंबित आहेत. त्यामूळे या विषया बाबत महापालिका आयुक्तांसोबत बैठक घेऊन चर्चा केली. आयुक्तांनी देखील सकारात्मक प्रतिसाद देत तातडीने हि कामे मार्गी लावण्याचे आश्वासन दिले.
