पुणे लोकसभा पोटनिवडणूक ओबीसी आघाडी लढवणार
पुणे : लोकसभा पोटनिवडणूक झाल्यास ती लढविण्याचा निर्धार ‘ओबीसी राजकीय आघाडी’चे संस्थापक अध्यक्ष प्रा. श्रावण देवरे यांनी व्यक्त केला आहे. पुण्यात घेण्यात आलेल्या पत्रकार परिषदेत त्यांनी ही माहिती दिली. २२ ओबीसी संघटनांनी आम्हाला पाठिंबा जाहीर केल्याचा दावा त्यांनी केला.
ओबीसी जनगणना व जातीनिहाय जनगणनेचा मुद्दा
ओबीसी जनगणना व जातीनिहाय जनगणनेचा मुद्दा राजकीय अजेंड्यावर आल्याशिवाय तो सुटणार नाही. त्यासाठी ‘ओबीसीं’नी आपली स्वतंत्र राजकीय आघाडी स्थापन करून निवडणुकीत आपले स्वतंत्र उमेदवार उभे केले पाहिजेत, असा निर्णय ओबीसी बैठकीत झाल्याचे त्यांनी सांगितले. आजवर सर्वच राजकीय पक्षांनी खोटी आश्वासने देऊन ओबीसींच्या तोंडाला पाने पुसल्याचे त्यांनी म्हटलंय.
“मराठा समाजाला दिलेले आरक्षण सर्वोच्च न्यायालयाने नाकारले असून यासंदर्भात महाराष्ट्र शासनाने २९ मे रोजी काढलेला अध्यादेश म्हणजे सर्वोच्च न्यायालयाचा अवमान आहे,” असे सांगून प्रा. देवरे यांनी अध्यादेशाची प्रत फाडून निषेध नोंदविला.
