पुण्यात मनसेची गळती सुरूच; आणखी दोन पदाधिकाऱ्यांचे राजीनामे

पुणे : पुण्यातील मनसेला लागलेली गळती सुरूच असून आणखी दोन पदाधिकाऱ्यांनी पक्षातून बाहेर पडण्याचा निर्णय घेतला आहे. मनसेचे शहर उपाध्यक्ष अझरुद्दीन सय्यद यांनी आपल्या पदासह पक्षाच्या प्राथमिक सदस्यत्वाचा राजीनामा मनसेचे नवनियुक्त शहराध्यक्ष साईनाथ बाबर यांच्याकडे पाठवला आहे.

‘मी अतिशय दु:खी आणि निराश मनाने पक्षातून बाहेर पडण्याचा निर्णय घेतला आहे. ज्या पक्षाला सर्वस्व मानून काम करत होतो, त्या पक्षाच्या अध्यक्षांनीच मुस्लीम समाजाबद्दल चुकीची भूमिका घेऊन पक्ष सोडण्यास प्रवृत्त केलं आहे, त्यांचे आभार,’ असं सय्यद यांनी आपल्या राजीनाम्यात म्हटलं आहे. दुसरीकडे पुण्यातील मनसेच्या आणखी एका उपविभाग अध्यक्षानेही राजीनामा दिला आहे. पुण्यातून सर्वात आधी मनसेचे शाखाध्यक्ष माजिद शेख आणि वाहतूक सेनेचे उपाध्यक्ष शहाबाज पंजाबी यांनी आपल्या पदाचा राजीनामा दिला होता. 

राज ठाकरे यांनी गुढीपाडवा मेळाव्यात मशिदीवरील भोंगे हटवले नाहीत तर तिथंच दुप्पट आवाजात हनुमान चालिसा लावण्याचे आदेश कार्यकर्त्यांना दिले. मदरशांमध्ये धाडी टाका, म्हणजे त्यात काय-काय मिळेल हे तुमच्या लक्षात येईल, असं राज यांनी म्हटलं. पक्षाच्या अध्यक्षांनी घेतलेल्या या भूमिकेमुळे मनसेत पडझड सुरू झाली आहे. अनेकांनी पक्षापासून दूर होण्याचा निर्णय घेतला. राज ठाकरे 12 एप्रिल रोजी ठाण्यात जाहीर सभा घेणार आहेत. या सभेच्या माध्यमातून ते टीकाकारांना प्रत्युत्तर देतील, असं मनसेच्या नेत्यांकडून सांगण्यात येत आहे.